മലയാളത്തിന് അനേകം സൂപ്പര്‍ ഹിറ്റുകള്‍ സമ്മാനിച്ച സംവിധായകന്‍ ഷാജി കൈലാസ് ഒരു ഇടവേളക്ക് ശേഷം മടങ്ങിയെത്തുന്ന ചെയ്യുന്ന ചിത്രമാണ് ‘കടുവ.’ പൃഥ്വിരാജാണ് കേന്ദ്ര കഥാപാത്രത്തെ അവതരിപ്പിക്കുന്നത്. സായ് കുമാര്‍, സിദ്ദിഖ്, ജനാര്‍ദ്ദനൻ, വിജയരാഘവൻ, അജു വര്‍ഗീസ്, ഹരിശ്രീ അശോകൻ, രാഹുല്‍ മാധവ്, കൊച്ചുപ്രേമൻ, സംയുക്ത മേനോൻ, സീമ, പ്രിയങ്ക തുടങ്ങിയവര്‍ മറ്റ് വേഷങ്ങളില്‍ അഭിനയിക്കുന്ന ‘കടുവ’യില്‍ ബോളിവുഡ് താരം വിവേക് ഒബ്‍റോയ് ചിത്രത്തില്‍ വില്ലനായി എത്തുന്നു. ഏറെ നാളത്തെ കാത്തിരിപ്പിനൊടുവില്‍ പ്രതിസന്ധികള്‍ തരണം ചെയ്ത് പൃഥ്വിരാജിന്റെ 'കടുവ' റിലീസ് ചെയ്തിരിക്കുകയാണ്. ഷാജി കൈലാസിന്റെ തിരിച്ചുവരവായി മാറുന്ന പക്കാ മാസ് എന്റര്‍ടെയ്‌നറാണ് കടുവയെന്ന റിപ്പോര്‍ട്ടുകളാണ് പുറത്തുവരുന്നത്. ചിത്രത്തില്‍ ഉടനീളം പൃഥ്വിരാജ് പൂണ്ടുവിളയാടുകയാണെന്നാണ് കണ്ടിറങ്ങിയവര്‍ പറയുന്നത്. തുടക്കം മുതല്‍ ഒടുക്കം വരെ അടിമുടി മാസ് പടമെന്നാണ് ആദ്യ ഷോയ്ക്ക് ശേഷമുള്ള പ്രേക്ഷകരുടെ പ്രതികരണം. മലയാളത്തില്‍ അടുത്ത കാലത്തൊന്നും കാണാത്ത തരത്തിലുള്ള മാസ് എന്റര്‍ടെയ്നറെന്നാണ് ആദ്യ റിവ്യു. ഷാജി കൈലാസ് തന്റെ പ്രതാപ കാലത്തേയ്ക്ക് തിരിച്ചെത്തിയെന്ന് പറയുന്നവരും ഏറെയാണ്. ശരാശരിയില്‍ ഒതുങ്ങേണ്ട കഥയെ അവതരണ രീതിയിലെ വ്യത്യസ്തത കൊണ്ട് വേറെ ലെവലിലേയ്ക്ക് ഉയര്‍ത്തിയെന്നാണ് പൊതുവിലുള്ള അഭിപ്രായം. കാസ്റ്റിംഗ് മികച്ചതാണെന്നും പൃഥ്വിരാജ് കൂടുതല്‍ എനര്‍ജറ്റിക്ക് ആയിട്ടുണ്ടെന്നുമാണ് ആദ്യ പ്രതികരണം.

ചിത്രം ബ്ലോക്ക് ബസ്റ്ററാണെന്ന് പൃഥ്വിരാജ് ഫാന്‍സ് ഉറപ്പിച്ചുകഴിഞ്ഞു. എന്തായാലും കാത്തിരിപ്പ് വെറുതെയായില്ല എന്നാണ് ചിത്രത്തെ കുറിച്ച് സാമൂഹ്യമാധ്യമങ്ങളില്‍ വരുന്ന പ്രതികരണങ്ങള്‍ സൂചിപ്പിക്കുന്നത്. അതേസമയം, ചിത്രത്തില്‍ വ്യത്യസ്തമായി ഒന്നുമില്ലെന്നും നാട്ടുരാജാവും നരസിംഹവും കണ്ടവര്‍ക്ക് കടുവ കണ്ടാല്‍ പ്രത്യേകിച്ച് ഒന്നും തോന്നില്ലെന്നും പറഞ്ഞവരുണ്ട്. 'കടുവ' അഞ്ച് ഭാഷകളിലാണ് പ്രദര്‍ശനത്തിന് എത്തുന്നത്. മലയാളത്തിനു പുറമേ തമിഴ്, കന്നഡ, തെലുങ്ക്, ഹിന്ദി ഭാഷകളിലാണ് ചിത്രം പുറത്തിറങ്ങുന്നത്.