ഫഹദ് ഫാസില്‍, രജിഷ വിജയന്‍ എന്നിവര്‍ പ്രധാന കഥാപാത്രങ്ങളാവുന്ന 'മലയന്‍കുഞ്ഞി'ന്റെ ട്രെയ്ലര്‍ കഴിഞ്ഞ ദിവസം പുറത്തിറങ്ങിയിരുന്നു. ഒരു മലയോര ഗ്രാമത്തിലെ കാഴ്ചകളും ഉരുള്‍പ്പൊട്ടലുമാണ് പ്രമേയമെന്ന സൂചനകളാണ് ട്രെയ്ലര്‍ നല്‍കുന്നത്. ഒരു സര്‍വൈവല്‍ ത്രില്ലറായാണ് 'മലയന്‍കുഞ്ഞ്' ഒരുങ്ങുന്നത്. ഇപ്പോഴിതാ 'മലയന്‍കുഞ്ഞിന്' ആശംസകൾ അറിയിച്ച് തമിഴ് നടൻ സൂര്യ. ട്രെയ്‌ലര്‍ പങ്കുവച്ചുകൊണ്ടാണ് താരം ഫഹദ് ഫാസിലിന്റെ അഭിനയത്തെ കുറിച്ച് പറഞ്ഞത്. ഫഹദ് എപ്പോഴും അദ്ദേഹത്തിന്റെ കഥകൾ കൊണ്ട് ആശ്ചര്യപ്പെടുത്തുന്നു എന്നും അഭിനയത്തിൽ തികച്ചും വ്യത്യസ്തത തീർക്കുന്ന ദൃശ്യങ്ങൾ കണ്ട് അത്ഭുതപ്പെട്ടു എന്നും താരം ട്വിറ്ററിൽ കുറിച്ചു. ഫാസിൽ സാറിനോട് സ്നേഹവും ആദരവും. ഫഹദ്, നിങ്ങൾ എപ്പോഴും പുതിയ കഥകൾ കൊണ്ട് എന്നെ ആശ്ചര്യപ്പെടുത്തുകയാണ്. തികച്ചും വ്യത്യസ്തത തീർക്കുന്ന ദൃശ്യങ്ങൾ കണ്ട് ഞാൻ അത്ഭുതപ്പെട്ടു. സൂര്യ പോസ്റ്റിൽ പറഞ്ഞു.