വേറിട്ട സിനിമ കാഴ്‍ചകള്‍ക്ക് കാത്തിരിക്കുന്നവര്‍ക്ക് ഒരു ദൃശ്യ വിസ്‍മയമാകും 'മഹാവീര്യര്‍'. മലയാളത്തിന്റെ വെള്ളിത്തിരയിലേക്ക് ഫാന്റസിയുടെ ലോകം തുറന്നിടുന്ന ചിത്രം തന്നെയാണ് 'മഹാവീര്യര്‍'. ചിരിപ്പിച്ചും ചിന്തിപ്പിച്ചും വേദനിപ്പിച്ചും സമകാലീന സമൂഹത്തോട് സംവദിക്കുന്ന തരത്തിലാണ് 'മഹാവീര്യ'രുടെ ആഖ്യാനം. ഒറ്റക്കാഴ്‍ചയില്‍ വിരസതയില്ലാതെ എന്റര്‍ടെയ്‍ൻ ചെയ്യാനും തുടര്‍ കാഴ്‍ചകളിലും ആലോചനകളിലും ചര്‍ച്ച ചെയ്യാനും സാധ്യതകളുള്ള ചിത്രമായി മാറിയിരിക്കുന്നു 'മഹാവീര്യര്‍'.

മലയാളത്തിലെ ആദ്യ ടൈം ട്രാവല്‍ ചിത്രമായ മഹാവീര്യറില്‍ കേന്ദ്രകഥാപാത്രങ്ങളെ അവതരിപ്പിക്കുന്നത് നിവിന്‍ പോളിയും ആസിഫ് അലിയുമാണ് . രണ്ടര വര്‍ഷത്തിന് ശേഷം ഒരു നിവിന്‍ പോളി ചിത്രം തിയറ്ററുകളില്‍ എത്തി എന്നതും ഏറെ ശ്രദ്ധേയമാണ്. ഒരിടവേളക്ക് ശേഷം ചിരിപടര്‍ത്താന്‍ എബ്രിഡ് ഷൈന്‍ ചിത്രത്തിന് സാധിച്ചുവെന്നാണ് പ്രേക്ഷകര്‍ പറയുന്നത്. മലയാളത്തിലിറങ്ങുന്ന സിനിമകള്‍ക്ക് പുതുമ ഇല്ലെന്ന പഴങ്കഥ ഇവിടെ അവസാനിക്കുന്നുവെന്നാണ് പലരും അഭിപ്രായപ്പെടുന്നത്. നോട്ട് എവരിവണ്‍സ് കപ്പ് ഓഫ് ടീ എന്നും പ്രേക്ഷകര്‍ പ്രതികരിച്ചിട്ടുണ്ട്. ‘ഫസ്റ്റ് ഹാഫ് വളരെ മികച്ചതായിരുന്നു. ഈയിടെയൊന്നും ഒരു മലയാളം സിനിമ കണ്ട് ഇത്രയും ചിരിച്ചിട്ടില്ല, നിവിന്‍ പോളി കഥാപാത്രം പൊളിച്ചു, തിയറ്ററുകളില്‍ വിസ്മയങ്ങളുടെ വിരുന്ന്. ഓരോ തവണയും നോവലും അത്യധികം ഭാവനാത്മകവുമായ ആശയങ്ങള്‍ കൊണ്ട് നമ്മെ എബ്രിഡ് ഷൈന്‍ അത്ഭുതപ്പെടുത്തുന്നു, വളരെ തൃപ്തികരമായ കഥപറച്ചില്‍, എന്നിങ്ങനെ പോകുന്നു കമന്റുകള്‍.