നിവിൻപോളി അവതരിപ്പിച്ച അപൂർണാനന്ദസ്വാമി എന്ന കഥാപാത്രത്തിലൂടെ എബ്രിഡ് ഷൈൻ സംവിധാനം ചെയ്ത മഹാവീര്യരെ പ്രേക്ഷകരുടെ പ്രിയപ്പെട്ട ചിത്രമാക്കുന്നു. നിവിൻ- എബ്രിഡ് ഷൈൻ കൂട്ടുകെട്ടിൽ പിറന്ന 1983, ആക്‌ഷൻ ഹീറോ ബിജു എന്നീ സൂപ്പർഹിറ്റ് ചിത്രങ്ങളുടെ വിജയം മഹാവീര്യർ ആവർത്തിക്കാൻ ഒരുങ്ങുന്നു. വ്യത്യസ്തമായ സിനിമകൾ കാണണമെന്ന് ആഗ്രഹിക്കുന്ന പ്രേക്ഷകർക്ക് പുത്തൻ അനുഭവം തന്നെയാണ് മഹാവീര്യർ. നിവിനൊപ്പം ആസിഫ് അലിയും ചിത്രത്തിലെ പ്രധാന കഥാപാത്രമാണ്. പുതുമയുള്ള ട്രെയിലറിനൊപ്പം കഥാപാത്രങ്ങളുടെ പേര് പോലും സസ്പെൻസാക്കി വച്ചാണ് ചിത്രം പുറത്തിറങ്ങിയത്. രണ്ട് കാലഘട്ടത്തിലെ കഥ പറയുന്ന ചിത്രത്തിൽ വ്യത്യസ്തമായ വേഷപ്പകർച്ചയിലാണ് നിവിൻ പോളി ചിത്രത്തിലെത്തുന്നത്.

താരത്തിന്റെ അപൂർണാനന്ദസ്വാമി എന്ന കഥാപാത്രം പ്രേക്ഷകന് മുന്നിൽ അപൂർണമായി ആദ്യാവസാനം വരെ തുടരുന്നു .മനോമയ രാജ്യത്തെ രുദ്ര മഹാവീര രാജാവും അദ്ദേഹത്തിന് വേണ്ടി ജീവൻ കൊടുക്കാൻ പോലും തയ്യാറായ മന്ത്രി മുഖ്യൻ സചിവോത്തമനും പൂവിൽപ്പനക്കാരി ദേവയാനിയുമാണ് പൂർവകാല കഥയിലുള്ളത്. മഹാരാജാവായി ലാലും മന്ത്രിയായി ആസിഫ് അലിയും ദേവയാനിയായി ഷാൻവി ശ്രീവാസ്തവയും എത്തുന്നു. ഒരു ക്ഷേത്രത്തിലെ വിഗ്രഹമോഷണവും തുടർന്നുള്ള കോടതി വ്യവഹാരവുമാണ് ചിത്രത്തിന്റെ ആദ്യപകുതി. ചീഫ് ജുഡീഷ്യൽ മജിസ്‌ട്രേറ്റ് ആയി സിദ്ദിഖും പബ്ലിക് പ്രോസിക്യൂട്ടറായി ലാലു അലക്സും വർത്തമാനകാല കഥാപാത്രങ്ങളായാണ് ചിത്രത്തിലെത്തുന്നത്. പൂർവകാലവും വർത്തമാനകാലവും ഇടകലർന്ന ചിത്രത്തിൽ കോടതിയിലെ വാദപ്രതിവാദ രംഗങ്ങൾ ആസ്വാദ്യകരമാണ്. രണ്ട് കാലഘട്ടത്തിലെയും കഥാപാത്രങ്ങൾ ഒന്നിക്കുന്ന തരത്തിലാണ് ഇന്റർവൽ കഴിഞ്ഞുള്ള ഭാഗം.സിനിമയുടെ ആദ്യപകുതി ചിരി പടർത്തിയെങ്കിൽ രണ്ടാം പകുതി ചിന്തിപ്പിക്കുകയാണ്.

ടൈം ട്രാവലാണോ അതോ കഥാപാത്രങ്ങൾ സ്വപ്നം കാണുന്നതാണോ സിനിമയുടെ ഉള്ളടക്കമെന്ന് പ്രേക്ഷകരിൽ ചിലർക്കെങ്കിലും തോന്നിയേക്കാം. പ്രശസ്ത സാഹിത്യകാരൻ എം. മുകുന്ദന്റെ കഥയ്ക്ക് തിരക്കഥ ഒരുക്കി ചലച്ചിത്ര ഭാഷ്യം നൽകിയിരിക്കുന്നത് സംവിധായകൻ എബ്രിഡ് ഷൈനാണ്. ലാൽ, ലാലുഅലക്സ്, സിദ്ദിഖ്, വിജയ്‌മേനോൻ, മേജർ രവി, മല്ലിക സുകുമാരൻ, സുധീർ കരമന, കൃഷ്ണപ്രസാദ്, പ്രമോദ് വെളിയനാട്, ഷൈലജ പി. അമ്മു എന്നിവരാണ് മറ്റു താരങ്ങൾ.പോളി ജൂനിയർ പിക്ചേഴ്സ്, ഇന്ത്യൻ മൂവി മേക്കേഴ്സ് എന്നീ ബാനറുകളിൽ നിവിൻ പോളി, പി.എസ്. ഷംനാസ് എന്നിവർ ചേർന്ന് നിർമ്മിക്കുന്നു. സംസ്ഥാന അവാർഡ് ജേതാവായ ചന്ദ്രു സെൽവരാജ് ആണ് ഛായാഗ്രഹണം .ഇഷാൻ ചാമ്പ്ര സംഗീതവും പശ്ചാത്തലസംഗീതവും ഒരുക്കിയിരുന്നു. മനോജിന്റെ ചിത്രസംയോജനവും വിഷ്ണു ഗോവിന്ദിന്റെയും ശ്രീശങ്കറിന്റെയും ശബ്ദമിശ്രണവും സിനിമയോട് പൂർണമായും നീതി പുലർത്തുന്നു.