നാലാം വിവാഹ വാർഷികത്തിന് വെറും ദിവസങ്ങൾ മാത്രം ബാക്കി നിൽക്കെയാണ് നാ​ഗചൈതന്യയും സാമന്തയും വിവാഹമോചനം ഔദ്യോ​ഗികമായി അറിയിച്ചത്. ഏറെ നാളായി പ്രചരിച്ചുകൊണ്ടിരുന്ന അഭ്യൂഹങ്ങൾക്ക് വിരാമമിട്ടാണ് നാ​ഗചൈതന്യയും സാമന്തയും ഇക്കഴിഞ്ഞ ഒക്ടോബറിൽ വിവാഹമോചന വാർത്തയിൽ ഔദ്യോ​ഗിക സ്ഥിരീകരണം വ്യക്തമാക്കിയത്. തെന്നിന്ത്യൻ സിനിമാ ലോകവും ആരാധകരും ഏറെ ആഘോഷമാക്കിയ ഒന്നായിരുന്നു ഇരുവരുടെയും പ്രണയവും വിവാഹവുമെല്ലാം. നീണ്ട നാല് വർഷത്തെ വിവാഹ ജീവിതത്തിന് ശേഷമാണ് ഇരുവരും വേർപിരിഞ്ഞത്. ജീവിത പങ്കാളികൾ എന്ന നിലയിൽ തങ്ങൾ വേർപിരിയുകയാണെന്നും ഏതാണ്ട് പത്ത് വർഷത്തിലധികമായി തമ്മിലുള്ള സൗഹൃദം ഇനിയും നിലനിൽക്കുമെന്ന് പ്രതീക്ഷിക്കുന്നതായും വിവാഹമോചന വാർത്തയിൽ സ്ഥിരീകരണം അറിയിച്ച് താരങ്ങൾ പങ്കുവെച്ച കുറിപ്പിൽ പറഞ്ഞിരുന്നു. എന്നാലിപ്പോഴിതാ ചിലരുടെ ദാമ്പത്യ ജീവിതം സുഖകരമല്ലാത്തതാകാൻ കാരണക്കാർ കരൺ ജോഹർ അടക്കമുള്ള സംവിധായകരാണെന്ന് തുറന്ന് പറയുകയാണ് സാമന്ത. ബോളിവുഡിലെ ഏറ്റവും പ്രശസ്ത സെലിബ്രിറ്റി ചാറ്റ് ഷോയായ 'കോഫി വിത്ത് കരൺ' എന്ന ഷോയിലാണ് താരം ഇക്കാര്യം പറഞ്ഞത്. വിവാഹത്തിനെ നിങ്ങൾ സിനിമകളിലൂടെ വളരെയധികം മാർക്കറ്റ് ചെയ്യുന്നുണ്ട്. വിവാഹവസ്ത്രം, പാട്ടുകൾ, ആഘോഷം, നൃത്തം തുടങ്ങി ഇത്തരം സിനിമകൾ കാണുമ്പോൾ പുതുതലമുറ കരുതുന്നത് വിവാഹജീവിതം എന്നത് കഭി ഖുശി കഭി ഘം പോലെ ആവും എന്നാണ്. എന്നാൽ ജീവിതത്തിലേയ്ക്ക് വരുമ്പോഴാണ് കെജിഎഫ് പോലെയാണെന്ന് തിരിച്ചറിയുന്നതെന്നും സാമന്ത പറഞ്ഞു. നാഗ ചൈതന്യയുമായുള്ള വിവാഹമോചനത്തെക്കുറിച്ചും നടി സംസാരിച്ചിരുന്നു. അത് ഇപ്പോഴും ബുദ്ധിമുട്ടുള്ള കാര്യമാണെന്നും അതിനോട് പൊരുത്തപ്പെടാനുള്ള ശ്രമത്തിലാണെന്നുമാണ് സാമന്ത പറഞ്ഞത്.