ലോകേഷ് കനകരാജിന്റെ സംവിധാനത്തില്‍ കമല്‍ഹാസന്‍ നായകനായി പുറത്തുവന്ന വിക്രം സകല കളക്ഷന്‍ റെക്കോഡുകളും തകര്‍ത്താണ് തിയേറ്ററുകളില്‍ പ്രദര്‍ശനം അവസാനിപ്പിച്ചത്. 50 ദിവസത്തിലധികമായി തിയ്യറ്ററുകളില്‍ ഓടുന്ന ചിത്രം ആഗോള തലത്തില്‍ നേടിയത് 400 കോടി രൂപയാണ്. തിയേറ്ററിലെ ഓളം പോലെ തന്നെ ചിത്രത്തിന് ഒ.ടി.ടിയിലും വമ്പന്‍ സ്വീകരണമാണ് ലഭിച്ചത്. ഇപ്പോഴിതാ ചിത്രത്തിന്റെ വിജയാഘോഷത്തിനും അടുത്ത ബിഗ് ബഡ്ജറ്റ് ചിത്രത്തിന്റെ തയ്യാറെടുപ്പുകള്‍ക്കുമായി താരം അമേരിക്കയിലേക്ക് പോയി എന്നാണ് റിപ്പോര്‍ട്ട്. സംവിധായകന്‍ ശങ്കറിനോടൊപ്പം വീണ്ടും ഒരുമിക്കുന്ന ഇന്ത്യന്‍ 2വിന്റെ ചിത്രീകരണം വീണ്ടും ആരംഭിക്കുന്നതിന്റെ ഒരുക്കങ്ങള്‍ക്ക് വേണ്ടിയാണ് കമല്‍ അമേരിക്കയിലെത്തിയത്.

മൂന്നാഴ്ചയോളം കമല്‍ യുഎസിലുണ്ടാവും. ഇന്ത്യന്‍ 2 സെപ്തംബറില്‍ ആരംഭിച്ചേക്കുമെന്നാണ് റിപ്പോര്‍ട്ടുകള്‍. അടുത്ത മാസം ആദ്യത്തോടെ ചിത്രത്തിന്റെ പ്രീ പ്രൊഡക്ഷന്‍ ആരംഭിക്കും. 2017ലാണ് ചിത്രം പ്രഖ്യാപിച്ചത്. 2019ല്‍ ചിത്രീകരണം ആരംഭിക്കാനാണ് ഉദ്ദേശിച്ചിരുന്നത്. എന്നാല്‍ ചിത്രീകരണം ആരംഭിക്കാനിരിക്കുന്നതിന് മുമ്പ് സിനിമാ സെറ്റിലെ ക്രെയിന്‍ തകര്‍ന്നു വീണതിനെ തുടര്‍ന്ന് മൂന്ന് അസിസ്റ്റന്റ് ഡയറക്ടര്‍മാര്‍ക്ക് പരിക്കേല്‍ക്കുകയും മരണം സംഭവിക്കുകയും ചെയ്തിരുന്നു. അതിനെ തുടര്‍ന്ന് ചിത്രം വൈകിയിരുന്നു.

വിക്രമിന്റെ വിജയത്തിന് പിന്നാലെ വീണ്ടും ചിത്രീകരണം ആരംഭിക്കാന്‍ തീരുമാനിക്കുകയുമായിരുന്നു. 1996ല്‍ പുറത്തിറങ്ങിയ ഇന്ത്യന്റെ രണ്ടാം ഭാഗമാണ് ചിത്രം. കമല്‍ഹാസനെ കൂടാതെ ചിത്രത്തില്‍ കാജല്‍ അഗര്‍വാള്‍, പ്രിയ ഭവാനി ശങ്കര്‍, രാകുല്‍ പ്രീത്, സിദ്ധാര്‍ത്ഥ് എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ലൊക്കേഷനില്‍ നടന്ന അപകടത്തില്‍ ചിത്രത്തിന്റെ അണിയറ പ്രവര്‍ത്തകര്‍ മരിച്ചിരുന്നു. നിര്‍മാണ കമ്പനി യായ ലൈക്കാ പ്രൊഡക്ഷന്‍സിന്റെ സാമ്പത്തിക പ്രതിസന്ധി കാരണമാണ് ചിത്രത്തിന്റെ ഷൂട്ടിങ് നിര്‍ത്തി വെച്ചത് എന്ന് റിപ്പോര്‍ട്ടുകള്‍ ഉണ്ടയിരുന്നു.