സമൂഹ മാധ്യമത്തിൽ നഗ്ന ചിത്രങ്ങൾ പ്രചരിപ്പിച്ച സംഭവത്തിൽ നടൻ രൺവീർ സിങ്ങിനെതിരെ മുംബൈയിൽ പോലീസ് കേസെടുത്തിരുന്നു. സമൂഹ മാധ്യമങ്ങളിലൂടെ നഗ്നചിത്രങ്ങൾ പ്രചരിപ്പിക്കുന്നത് സ്ത്രീകളുടെ വികാരം വ്രണപ്പെടുത്തുന്നതിനാൽ നടനെതിരെ കേസെടുക്കണ​മെന്നാവശ്യപ്പെട്ട് കിഴക്കൻ മുംബൈയിലെ ചെമ്പൂർ പൊലീസ് സ്റ്റേഷനിൽ ഒരു സന്നദ്ധ സംഘടനയുടെ ഭാരവാഹികൾ പരാതി നൽകിയിരുന്നു. ഇതിന്റെ അടിസ്ഥാനത്തിലാണ് എഫ്.ഐ.ആർ രജിസ്റ്റർ ചെയ്തത്. നടനെതിരെ വിമർശനങ്ങൾ ഉയർന്നപ്പോഴും സഹതാരങ്ങൾ നടനെ പിന്തുണച്ച് രംഗത്തെത്തിയിരുന്നു. അത്തരത്തിൽ പൂർണ പിന്തുണയുമായി എത്തുകയാണ് നടി വിദ്യാ ബാലൻ. രൺവീർ ചെയ്തതിൽ താൻ തെറ്റൊന്നും കാണുന്നില്ല എന്നും എഫ്ഐആർ ഫയൽ ചെയ്തവർക്ക് കാര്യമായ ജോലി ഒന്നുമില്ലാത്തത് കൊണ്ടായിരിക്കാം ഇത്തരമൊരു പരാതി എന്നും നടി പറഞ്ഞു. ഫട്ക മറാത്തി സിനി അവാർഡ്‌സിൽ പങ്കെടുക്കവെയാണ് വിദ്യാ ബാലന്റെ പ്രതികരണം.'അതിൽ എന്താണ് കുഴപ്പം? ആദ്യമായാണ് ഒരു പുരുഷൻ ഇങ്ങനെ ചെയ്യുന്നത്. ഞങ്ങൾ അതൊന്നു ആസ്വദിച്ചോട്ടേ', നടി പറഞ്ഞു. രൺവീറിന്റെ ചിത്രം മൂലം വിഷമം തോന്നുന്നവർ അങ്ങോട്ട് നോക്കാതിരുന്നാൽ പോരെ എന്നും വിദ്യ ചോദിക്കുന്നു. 'ചിലപ്പോൾ ആ എഫ്ഐആർ ഫയൽ ചെയ്തവർക്ക് പ്രത്യേകിച്ച് ജോലി ഒന്നും കാണില്ല. അതുകൊണ്ടാണ് ഇത്തരം കാര്യങ്ങളിൽ സമയം കളയുന്നത്. നിങ്ങൾക്ക് അതിൽ വിഷമം തോന്നിയാൽ അങ്ങോട്ട് നോക്കാതിരുന്നാൽ പോരെ. അതിന് എഫ്ഐആർ എന്തിന് ഫയൽ ചെയ്യണമെന്നും വിദ്യാ ബാലൻ പ്രതികരിച്ചു.