മലയാളത്തിലെ പ്രശസ്ത അവതാരകയും മുൻ ബിഗ് ബോസ് താരവുമാണ് രഞ്ജിനി ഹരിദാസ്. സിനിമയിൽ നായികയായും അഭിനയിച്ചിട്ടുള്ള രഞ്ജി ഹരിദാസ് വാർത്തകളിലും സോഷ്യൽ മീഡിയയിലും നിറഞ്ഞു നിൽക്കുന്ന വ്യക്തിയാണ്. വളർത്തു മൃഗങ്ങളെ സ്നേഹിക്കുന്ന രഞ്ജിനി ഹരിദാസ്, അവയുടെ സംരക്ഷണത്തിനു വേണ്ടിയുള്ള ഇടപെടലും നടത്തി വരുന്നു. അതുപോലെതന്നെ ഒരുപാട് സൂപ്പർഹിറ്റ് ഗാനങ്ങളിൽ പ്രതിഫലിച്ച പുതുമ നിറഞ്ഞ ശബ്ദം കൊണ്ട് മലയാളികളുടെ ഹൃദയത്തിൽ ഇടം പിടിച്ച ഗായികയും നടിയുമാണ് രഞ്ജിനി ജോസ്. രഞ്ജിനി ജോസും രഞ്ജിനി ഹരിദാസും വളരെ അടുത്ത സുഹൃത്തക്കളാണ്. ഇരുവരും ഒരുമിച്ചുള്ള ചിത്രങ്ങളും വീഡിയോയും സോഷ്യൽമീഡിയയിൽ പങ്കുവയ്ക്കാറുണ്ട്. ഇപ്പോഴിതാ തങ്ങളൊരുമിച്ച് സോഷ്യൽമീഡിയയിൽ പങ്കുവെച്ച ചിത്രങ്ങൾക്ക് ലഭിച്ച മോശം കമന്‍റുകളെ കുറിച്ച് പറഞ്ഞിരിക്കുകയാണ് ഇരുവരും.

ഞങ്ങൾ സോഷ്യൽമീഡിയയിൽ പങ്കുവയ്ക്കാറുള്ള ചിത്രങ്ങൾ കണ്ടിട്ട് ലെസ്ബിയന്‍സ് ആണോ എന്ന് പലരും ചോദിച്ചിട്ടുണ്ടെന്നാണ് ഗൃഹലക്ഷ്മിക്ക് നൽകിയ അഭിമുഖത്തിൽ രഞ്ജിനിമാർ പറയുന്നത്. രണ്ട് പതിറ്റാണ്ടുകളായി ഇരുവരും സുഹൃത്തുക്കളാണ്. ദയവുചെയ്ത് ഞങ്ങളുടെ സൗഹൃദത്തെ ആരും റൊമാന്‍റിസൈസ് ചെയ്യരുതെന്നും ഇരുവരും പറയുന്നു. ഗായകന്‍ വിജയ് യേശുദാസുമായി ബന്ധം എന്ന രീതിയിൽ തന്നെ കുറിച്ച് പ്രചരിച്ച വാർത്തകളെ കുറിച്ചും രഞ്ജിനി ജോസ് പ്രതികരിച്ചു. ഒരു ഷൂട്ടിനിടയിലാണ് താനും വിജയ് യേശുദാസുമായി ബന്ധമാണെന്ന രീതിയിലൊരു വാര്‍ത്ത ഓണ്‍ലൈനില്‍ കണ്ടത്. ഞങ്ങൾ നല്ല സുഹൃത്തുക്കളാണ് വാർത്ത കണ്ടയുടൻ വിജയ്ക്ക് മെസ്സേജ് അയക്കുകയായിരുന്നു. നമ്മള്‍ എപ്പോൾ പ്രേമത്തിലായി എന്നായിരുന്നു അപ്പോള്‍ വിജയ് തിരിച്ച് ചോദിച്ചത്. തെറ്റായ വാര്‍ത്ത പ്രചരിപ്പിച്ച ഓണ്‍ലൈന്‍ മാധ്യമങ്ങള്‍ക്കെതിരേ കേസ് കൊടുക്കാൻ ചിലർ ഉപദേശിച്ചിരുന്നുവെന്നും രഞ്ജിനി ജോസ് പറഞ്ഞു.