ആരാണീ ബൈജു കൊട്ടാരക്കര? കൊച്ചിയിൽ നടി ആക്രമിക്കപ്പെട്ട സംഭവത്തിന് ശേഷം പലരും ചോദിച്ച ഒരു ചോദ്യമായിരുന്നു ഇത്. നടി ആക്രമിക്കപ്പെട്ട സംഭവത്തിന് പിന്നാലെ ചാനലുകളിലെ ചർച്ചകളിൽ സജീവ സാന്നിദ്ധ്യമായിരുന്നു ബൈജു കൊട്ടാരക്കര. യുവനടിയെ ആക്രമിച്ച കേസിൽ ദിലീപിനെ അറസ്റ്റ് ചെയ്തപ്പോൾ സിനിമാരംഗത്തെ പലരും പ്രതികരിക്കാൻ മടികാണിച്ചിരുന്നു. പക്ഷേ, ആ സമയത്തെല്ലാം ചാനൽ സ്റ്റുഡിയോകളിൽ ഓടിനടന്ന് ദിലീപിനെതിരെ സംസാരിക്കാൻ മുൻനിരയിലുണ്ടായിരുന്നത് ബൈജുവായിരുന്നു. ഇപ്പോൾ സ്വന്തം ചാനലിലൂടെയും താരം തന്റേതായുള്ള അഭിപ്രായങ്ങൾ പറയാറുണ്ട്. ഇപ്പോഴിതാ മഞ്ജു വാര്യർക്കെതിരെ രൂക്ഷ വിമർശനവുമായി എത്തിയിരിക്കുകയാണ് ബൈജു കൊട്ടാരക്കര. മായം കലർന്നുവെന്ന് പരിശോധനയില്‍ കണ്ടെത്തിയ കറി പൗഡറുകളുടെ പരസ്യത്തില്‍ അഭിനയിക്കുന്നത് ചൂണ്ടിക്കാട്ടിയാണ് ബൈജു കൊട്ടാരക്കരയുടെ വിമർശനം.

ബൈജു കൊട്ടാരക്കരയുടെ വാക്കുകൾ ഇങ്ങനെയായിരുന്നു...

മഞ്ജു വാര്യർ നല്ല നടിയാണെന്ന കാര്യത്തില്‍ ആർക്കും സംശയമില്ല. ഈ പുഴയും കടന്ന് എന്ന ചിത്രത്തിലൂടെ സംസ്ഥാന അവാർഡ് വാങ്ങിച്ച ആളാണ്. അതുപോലെ കണ്ണെഴുതി പൊട്ടുംതൊട്ട് എന്ന സിനിമയ്ക്ക് ദേശീയ ചലച്ചിത്ര പുരസ്കാര ജൂറിയുടെ പ്രത്യേക പരാമർശവും നേടി. നല്ല ഡാന്‍സറുമാണ്. ഇതൊക്കെ അറിയാവുന്ന ഒരുപാട് ആരാധകരും താരത്തിനുണ്ട്. പക്ഷെ ഈ മഞ്ജുവിനെ നിർത്തി മുതലെടുപ്പ് നടത്തുന്ന ഒരുപാട് പരസ്യക്കമ്പനികളുണ്ട്. അതിന് നിന്നുകൊടുത്ത മഞ്ജു വാര്യറാണ് ഏറ്റവും വലിയ കുഴപ്പം കാണിച്ചതെന്നും ബൈജു കൊട്ടാരക്കര അഭിപ്രായപ്പെടുന്നു. പരസ്യങ്ങളില്‍ മോഡലായി നില്‍ക്കുന്നതിനൊന്നും ആരും എതിരല്ല. പക്ഷെ ഇതിലൊരു വലിയ ചതി ഒളിഞ്ഞ് കിടപ്പുണ്ട്. ജനങ്ങളുടെ മനസ്സില്‍ കയറിപ്പറ്റിയ സിനിമാ നടീ-നടന്മാരേയും സ്പോർട് താരങ്ങളേയുമൊക്കെയാണല്ലോ പരസ്യത്തിന് വേണ്ടി മോഡലുകളായി തിരഞ്ഞെടുക്കുന്നത്.

ബാക്കിയുള്ള ആളുകളെ വെക്കുന്നതിനേക്കാള്‍ വേഗത്തില്‍ ശ്രദ്ധിക്കപ്പെട്ട ഇവരുടെ പരസ്യത്തിനായിരിക്കും. മഞ്ജു വാര്യർ വന്ന് കിച്ചണ്‍ ട്രഷർ നന്നായിരിക്കുന്നു എന്ന് പറഞ്ഞാല്‍ ആളുകള്‍ക്ക് അത് വാങ്ങാന്‍ തോന്നും. ചില സ്ത്രീകളൊക്കെ പറയും നമ്മുടെ മഞ്ജു വാര്യറൊക്കെ ഉപയോഗിക്കുന്നതല്ലേ നല്ലതായിരിക്കുമെന്നും. എന്നാല്‍ മഞ്ജു വാര്യർ തന്നെ അറിയേണ്ട കാര്യമുണ്ട്. താന്‍ മോഡലായ കറി പൗഡറില്‍ മായം കലർന്നിട്ടുണ്ട്. മനുഷ്യന്റെ ആരോഗ്യ നില മോശമാക്കുന്ന വസ്തുക്കളാണ് കറി പൌഡറുകളിലുള്ളത്. അത് ഏതെങ്കിലും ഒരു കമ്പനിയുടേത് മാത്രമല്ല. വേറേയും കുറേയുണ്ട്. കേരളത്തിലെ ഭക്ഷ്യ സുരക്ഷ വകുപ്പാണ് ഇത് കണ്ടെത്തിയത്. എന്നാല്‍ ഇക്കാര്യത്തില്‍ ഇതുവരെ ഒരു നടപടിയും ഉണ്ടായിട്ടില്ല. എല്ലാ ജില്ലകളിലും ഭക്ഷ്യ സുരക്ഷ ഉദ്യോഗസ്ഥർ പരിശോധന നടത്തുമെന്നാണ് ഈ വിവരം പുറത്ത് വരുമ്പോള്‍ സർക്കാർ പറയുന്നത്. പാവപ്പെട്ടവർ വില്‍ക്കാന്‍ വെച്ച നാരങ്ങാ മിഠായി, അച്ചാർ എന്നിവയിലൊക്കെ ആയിരിക്കും ചില ഉദ്യോഗസ്ഥരുടെ നോട്ടം. അവിടുന്നു എന്തെങ്കിലുമൊക്കെ കൈക്കൂലി കിട്ടുകയുള്ളു. എന്നാല്‍ ആരും ഇതുപോലുള്ള കോർപ്പറേറ്റ് ഭീമന്‍മാരെ തൊടില്ല. ജനങ്ങളെ അക്ഷരാർത്ഥത്തില്‍ പറ്റിച്ചിട്ടും മുഖ്യധാര മാധ്യമങ്ങള്‍ ഒരക്ഷരം മിണ്ടുന്നില്ല. അവർക്കെല്ലാം കോടിക്കണക്കിന് രൂപയാണ് കിട്ടുന്നത്.

രാഷ്ട്രീയക്കാരാവട്ടെ തിരഞ്ഞെടുപ്പൊക്കെ വരുമ്പോള്‍ സമീപിക്കുന്നത് ഇങ്ങനെയുള്ള കോർപ്പറേറ്റ് ഭീമന്‍മാരേയാണ്. അതുകൊണ്ട് തന്നെ ഇങ്ങനെയുള്ള വിഷം ആർക്ക് കലക്കി കൊടുത്താലും അവർക്ക് പ്രശ്നമില്ല. ഏറ്റവും കൂടുതല്‍ ക്യാന്‍സർ രോഗികളുള്ള നാടാണ് കേരളം. ഒരു പ്രമുഖ ചാനല്‍ സംഘടിപ്പിച്ച കേരള ക്യാന്‍ എന്ന പരിപാടിയിലും പരസ്യ മോഡല്‍ മഞ്ജു വാര്യറാണ്. ഈ ക്യാന്‍സർ ഉണ്ടാക്കുന്ന മരുന്ന് എന്ന് പറയുന്നത് താന്‍ അഭിനയിക്കുന്ന കറി പൗഡറാണെന്ന് മഞ്ജു വാര്യർ മനസ്സിലാക്കണം. ജനങ്ങളെ മിസ് ലീഡ് ചെയ്യിക്കുന്നതിന് കേസെടുക്കാനും വകുപ്പുണ്ടെന്ന കാര്യം മഞ്ജു വാര്യർ മനസ്സിലാക്കണം. ഭക്ഷ്യ സുരക്ഷ നിയമത്തിന്റെ 2006 ലെ സെക്ഷന്‍ 53 പ്രകാരം ജനങ്ങളെ മിസ് ലീഡ് ചെയ്യുന്ന പരസ്യങ്ങള്‍ ചെയ്താല്‍ തീർച്ചയായും നിങ്ങള്‍ അകത്ത് കിടക്കേണ്ടി വരും. 2009 ലെ കണ്‍സൂമർ ആക്ടിലും കേസെടുക്കാന്‍ വകുപ്പുണ്ട്. ഒരു 50 കേസുകള്‍ നിങ്ങളുടെ പേരിലുണ്ടെങ്കില്‍ പിന്നെ ജന്മത്ത് പരസ്യം ചെയ്യാന്‍ തോന്നില്ല. നിങ്ങള്‍ ഉപയോഗിച്ച് ബോധ്യപ്പെട്ട വസ്തുക്കളുടെ പരസ്യത്തില്‍ നിങ്ങള്‍ അഭിനയിച്ചോളൂ. അല്ലാതെ ഇത്തരം മായം കലർന്ന വസ്തുക്കളുടെ പരസ്യത്തില്‍ അഭിനയിച്ചതിന് മഞ്ജു വാര്യർ മാപ്പ് പറയാന്‍ തയ്യാറാകണമെന്നും പറയുകയാണ് ബൈജു കൊട്ടാരക്കര.