പൊരിങ്ങല്‍ക്കുത്ത് ഡാമിന്‍റെ നാലാമത്തെ ഷട്ടര്‍ കൂടി തുറക്കുന്നതിനാൽ ചാലക്കുടി പുഴക്കരയിലുള്ളവര്‍ അടിയന്തരമായി മാറിത്താമസിക്കണമെന്ന മുന്നറിയിപ്പും നൽകിയിട്ടുണ്ട്. ചാലക്കുടി പുഴയിലെ ജല നിരപ്പ് അപകട നിലയിലേക്ക് ഉയരാന്‍ സാധ്യതയുള്ളതിനാല്‍ തീരത്തുള്ളവര്‍ ഏറ്റവും അടുത്തുള്ള ക്യാമ്പുകളിലേക്ക് അടിയന്തരമായി മാറിത്താമസിക്കണമെന്നാണ് മുന്നറിയിപ്പ്. അതോടെ കലാഭവൻ മണിയുടെ നാടായ ചേനത്ത് നാട്ടിൽ നാട്ടുകാർ തോണിയിറക്കി സുരക്ഷിത സ്ഥാനത്തേക്ക് മാറാനുള്ള എല്ലാ ഒരുക്കങ്ങളും സജ്ജമാക്കിയിട്ടുണ്ട്. കലാഭവൻ മണിയുടെ സഹോദരൻ ആർഎൽവി രാമകൃഷ്ണൻ ജനങ്ങളെല്ലാം ആശങ്കയിൽ ആണെന്ന് പറഞ്ഞു.

ഉച്ചയ്ക്ക് ശേഷം ഈ പ്രദേശത്ത് വലിയ രീതിയിൽ വെള്ളം ഉയരാനുള്ള സാധ്യത ഉള്ളതായാണ് കണക്കു കൂട്ടൽ. ഈ സാധ്യത മുന്നിൽ കണ്ടാണ് തയാറെടുപ്പുകൾ നടത്തുന്നത്. ‘2018 ൽ ചേനത്ത് നാട് പ്രദേശം ആകെ മുങ്ങിയിരുന്നുവെന്ന് കലാഭവൻ മണിയുടെ സഹോദരൻ ആർഎൽവി രാമകൃഷ്ണൻ പറഞ്ഞു. ഇന്നത്തെ അവസ്ഥ ആശങ്ക ഉണ്ടാക്കുന്നുണ്ടെന്നും പ്രദേശത്ത് നിന്ന് മാറേണ്ട അവസ്ഥയാണെന്നും ആർഎൽവി രാമകൃഷ്ണൻ പറഞ്ഞു. ഞങ്ങളെല്ലാം വീട്ടിൽ നിന്ന് സാധനങ്ങളല്ലൊം സുരക്ഷിത സ്ഥാനത്തേക്ക് മാറ്റിയതായും ആർഎൽവി രാമകൃഷ്ണൻ പറഞ്ഞു.