മലയാള സിനിമയ്ക്ക് തിയറ്ററുകളില്‍ പ്രേക്ഷകര്‍ കയറുന്നില്ലെന്ന ആശങ്കകള്‍ക്കിടെ രണ്ട് ചിത്രങ്ങളാണ് ആ ധാരണ തിരുത്തിയത്. ഷാജി കൈലാസിന്‍റെ പൃഥ്വിരാജ് ചിത്രം കടുവയും ജോഷിയുടെ സുരേഷ് ഗോപി ചിത്രം പാപ്പനും. ഇതില്‍ കഴിഞ്ഞ വാരാന്ത്യത്തില്‍ എത്തിയ പാപ്പന്‍ മികച്ച ഇനിഷ്യല്‍ കളക്ഷനുമായി മുന്നോട്ട് കുതിക്കുകയാണ്. ആദ്യ വാരാന്ത്യത്തില്‍ സമീപകാലത്തെ ഏറ്റവും മികച്ച കളക്ഷന്‍ നേടിയ ചിത്രം പ്രതികൂലാവസ്ഥയ്ക്കിടയിലും ഭേദപ്പെട്ട കളക്ഷന്‍ നേടി. ഒരിടവേളയ്ക്കു ശേഷം സുരേഷ് ഗോപി പൊലീസ് വേഷത്തില്‍ എത്തുന്ന ചിത്രമാണിത്. എബ്രഹാം മാത്യു മാത്തന്‍ എന്നാണ് കഥാപാത്രത്തിന്‍റെ പേര്. 'സലാം കാശ്‍മീരി'നു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രവുമാണിത്. ലേലം, പത്രം, വാഴുന്നോര്‍ തുടങ്ങി ഈ കോമ്പിനേഷനില്‍ പുറത്തെത്തിയ ചിത്രങ്ങളില്‍ പലതും സൂപ്പര്‍ഹിറ്റുകള്‍ ആയിരുന്നു. പൊറിഞ്ചു മറിയം ജോസിനു ശേഷം ജോഷിയുടെ സംവിധാനത്തില്‍ എത്തുന്ന ചിത്രവുമാണ് പാപ്പന്‍. ഗോകുല്‍ സുരേഷും ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇരുവരും ആദ്യമായി ഒരുമിച്ചെത്തുന്ന ചിത്രം എന്ന പ്രത്യേകതയുമുണ്ട്. ഡേവിഡ് കാച്ചപ്പിള്ളി പ്രൊഡക്ഷന്‍സ് നിര്‍മ്മിക്കുന്ന സുരേഷ് ഗോപിയുടെ കരിയറിലെ 252-ാം ചിത്രവുമാണിത്. ക്രൈം ത്രില്ലര്‍ വിഭാഗത്തില്‍ പെടുന്ന ചിത്രത്തില്‍ നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍, സണ്ണി വെയ്ന്‍ തുടങ്ങിയവരും അഭിനയിച്ചിരിക്കുന്നു.

പോലീസ് വേഷത്തിൽ തിളങ്ങിയ താരം തന്നെയാണ് സുരേഷ്‌ഗോപിയുടെ മകളായി അഭിനയിച്ച വിൻസി എന്ന നീത പിള്ള. ഇപ്പോഴിതാ തന്റെ വേഷത്തെക്കുറിച്ച് തുറന്ന് പറയുകയാണ് താരം. ഈ പോലീസ് വേഷം ചെയ്യാൻ തന്നെ സഹായിച്ചത് സുരേഷ് ഗോപിയാണെന്ന് തുറന്നു പറയുകയാണ് താരം. പോലീസ് എന്ന് പറയുമ്പോൾ നമ്മുടെ മനസ്സിൽ ആദ്യം ഓടിയെത്തുന്നത് സുരേഷ് ഗോപിയുടെ മുഖമാണ്. സുരേഷ് സാറിന്റെ കൂടെ നിന്ന് പോലീസ് വേഷം ചെയ്യുക എന്നുള്ളത് തന്നെ സംബന്ധിച്ച് ടെൻഷൻ ഉള്ള കാര്യമായിരുന്നു. അദ്ദേഹത്തിനൊപ്പം നിൽക്കുമ്പോൾ തന്റെ അഭിനയം മോശമായാൽ മുഴുവൻ സിനിമയെ അത് ബാധിക്കും. തന്റെ പ്രകടനം താഴെപോയാൽ ‘അയ്യോ ഈ കുട്ടിയെ എന്തിനാണ് ഈ കഥാപാത്രത്തിലേക്ക് കാസ്റ്റ് ചെയ്തത്’ എന്ന് ആളുകൾ ചോദിക്കും. അങ്ങനെയൊന്നും വരരുതെന്ന് താൻ ആഗ്രഹമുണ്ടായിരുന്നു. കൂടുതൽ ടേക്ക് പോകരുത് എന്നുള്ള ടെൻഷൻ ഉണ്ടായിരുന്നു. പക്ഷേ ഒപ്പം നിൽക്കുമ്പോൾ താൻ ടെൻഷൻ ആകാതിരിക്കാൻ അദ്ദേഹവും ശ്രദ്ധിച്ചിരുന്നു. തന്നെ വളരെ കംഫർട്ടബിൾ ആക്കാൻ ശ്രമിക്കുമായിരുന്നു സുരേഷ് ​ഗോപി. ഒരു ചെറിയ നിൽപ്പും നോട്ടവും പോലും ഇങ്ങനെ ചെയ്തു നോക്കൂ എന്ന് സുരേഷ് സാർ പറഞ്ഞു തന്ന അവസരങ്ങൾ ഉണ്ടെന്നും നീത പറഞ്ഞു. പോലീസ് വേഷം നന്നാക്കാൻ സാറിന്റെ ഇൻപുട്ട് ഒരുപാടുണ്ടായിരുന്നുവെന്നും അവർ കൂട്ടിച്ചേർത്തു.