പ്രശസ്ത സംവിധായകനായ പ്രിയദര്‍ശന്റെയും നടി ലിസിയുടെയും മകളാണ് കല്യാണി. ന്യൂയോര്‍ക്കിലെ പഠനത്തിന് ശേഷം നാട്ടില്‍ തിരിച്ചെത്തിയ കല്യാണി ഇപ്പോള്‍ സിനിമാ മേഖലയില്‍ സജീവമാണ്. വിക്രമും നയന്‍കാരയും കേന്ദ്ര കഥാപാത്രങ്ങളെ അവതരിപ്പിച്ച ഇരുമുഖനില്‍ കല്യാണി സംവിധാന സഹായിയായി പ്രവര്‍ത്തിച്ചിരുന്നു. തെലുങ്ക് ചിത്രത്തിലാണ് കല്യാണി ആദ്യമായി അഭിനയിക്കുന്നത്. ഹൃദയം, ബ്രോ ഡാഡി, മരയ്ക്കാര്‍ അറബിക്കടലിന്റെ സിംഹം എന്നീ ചിത്രങ്ങളില്‍ കല്യാണി ശ്രദ്ധേയമായ പ്രകടനം തന്നെ കാഴ്ചവെച്ചിരുന്നു. ടൊവിനോ തോമസ് നായകനാകുന്ന തല്ലുമാലയാണ് കല്യാണിയുടെ ഏറ്റവും പുതിയ ചിത്രം. ടൊവിനോയും കല്യാണിയും ആദ്യമായി ഒന്നിക്കുന്ന ചിത്രമാണ് തല്ലുമാല. ഓഗസ്റ്റ് 12നാണ് ചിത്രം തിയേറ്ററുകളില്‍ എത്തുക.

സോഷ്യൽമീഡിയയിൽ സജീവമായ താരം പങ്കുവെച്ച പുതിയ ചിത്രവും അതിന് താഴെ നല്‍കിയിരിക്കുന്ന ക്യാപ്ഷനുമാണ് ഇപ്പോൾ ആരാധകർ ഏറ്റെടുത്തിരിക്കുന്നത്. ഒരു സംഭാഷണം പോലെ തോന്നിപ്പിക്കുമെങ്കിലും ആരാധകരുടെ ചോദ്യത്തിനുള്ള മറുപടിയെന്ന രീതിയിലാണ് ക്യപ്ഷന്‍ നല്‍കിയിരിക്കുന്നത്. ക്യാപ്ഷന് കല്യാണി നല്‍കിയിരിക്കുന്ന ചിത്രവും രസകരമായ ഒന്നാണ്.

'അവര്‍: നിങ്ങള്‍ സഹനടന്മാരില്‍ ഒരാളുമായി എപ്പോഴെങ്കിലും പ്രണയത്തിലായിട്ടുണ്ടോ?
ഞാന്‍: ഉണ്ട്, പക്ഷേ ആ സ്‌നേഹം തിരികെ ലഭിച്ചെന്ന കാര്യത്തില്‍ എനിക്ക് ഉറപ്പില്ല' എന്നായിരുന്നു കല്യാണിയുടെ ക്യാപ്ഷന്‍. ചുരുണ്ട രോമമുള്ള ഒരു പട്ടിക്കുട്ടിയെ എടുത്ത് നില്‍ക്കുന്ന ചിത്രങ്ങളാണ് കല്യാണി പങ്കുവെച്ചിരിക്കുന്നത്. പട്ടിക്കുട്ടിയ്ക്ക് ഉമ്മ കൊടുക്കുന്നതും വിവിധ തരത്തില്‍ പോസ് ചെയ്യുന്നതുമെല്ലാം ചിത്രങ്ങളിലുണ്ട്. ഒരു വീഡിയോയും കല്യാണി ഇതില്‍ ഉള്‍പ്പെടുത്തയിട്ടുണ്ട്. കല്യാണിയുടെ പുതിയ സിനിമയില്‍ ഈ പട്ടിക്കുട്ടിയും ഉണ്ടെന്നതാണ് ശ്രദ്ധേയം. നിരവധിയാളുകളാണ് ചിത്രത്തിന് താഴെ കമന്റുകളുമായെത്തിയിരിക്കുന്നത്. രണ്ട് പേരും ക്യൂട്ടാണല്ലോ എന്നും സുന്ദരരമായ ചിത്രങ്ങളാണ് താരം പങ്കുവെച്ചിരിക്കുന്നതെന്നും ആരാധകര്‍ പറയുന്നു. ക്യൂട്ട് തലൈവി എന്നാണ് ഒരു ആരാധകന്‍ കല്യാണിയെ വിശേഷിപ്പിച്ചത്.