മലയാളികളുടെ സ്വന്തം സൂപ്പർ ഹീറോ ചിത്രം മിന്നൽ മുരളിയ്ക്ക് വീണ്ടും ഒരു അഭിമാന നേട്ടം. ടൊവിനോ നായകനായെത്തിയ ചിത്രത്തിന് വൻ സ്വീകാര്യതയാണ് ലഭിച്ചത്. നിരവധി പുരസ്കാരങ്ങളും ചിത്രത്തെ തേടിയെത്തി. ഇപ്പോഴിതാ  സിനിമയിൽ ഷിബു എന്ന കഥാപാത്രമായി സിനിമാപ്രേമികളുടെ മനസ്സിൽ ഇടം നേടിയ നടൻ ഗുരു സോമസുന്ദരത്തിന് ഏഷ്യൻ അക്കാദമി ക്രിയേറ്റീവ് അവാർഡ്സിൽ മികച്ച നടനുള്ള പുരസ്കാരം ലഭിച്ചിരിക്കുകയാണ്. മിന്നൽ മുരളി ഒരുക്കിയ ബേസിൽ ജോസഫിനാണ് മികച്ച സംവിധായകനുള്ള പുരസ്കാരം. മികച്ച വിഷ്വൽ എഫ്.എക്സ് ഫീച്ചർ ഫിലിമിനുള്ള പുരസ്കാരവും മിന്നൽ മുരളിക്ക് ലഭിച്ചു. ഏഷ്യ - പസഫിക് റീജിയണിലെ 16 രാജ്യങ്ങളിൽ നിന്നുമുള്ള സിനിമകളും ടെലിവിഷൻ പരമ്പരകളും പരിഗണിച്ചതിൽ നിന്നാണ് ഇന്ത്യയിൽ നിന്ന് 'മിന്നൽ മുരളി' ഈ അഭിമാന നേട്ടം കരസ്ഥമാക്കിയത്. 52-ാം സംസ്ഥാന ചലച്ചിത്ര അവാർഡ്സ്, സൈമ അവാർഡ്സ് ഉൾപ്പെടെ നിരവധി പുരസ്കാരങ്ങൾ ഇതിനകം മിന്നൽ മുരളി ടീം സ്വന്തമാക്കി കഴിഞ്ഞിട്ടുണ്ട്. അതിന് പിന്നാലെയാണിപ്പോൾ വീണ്ടും അംഗീകാരം തേടിയെത്തിയിരിക്കുന്നത്. 2011- മുതൽ സിനിമാലോകത്ത് സജീവമായുള്ളയാളാണ് ഗുരു സോമസുന്ദരം. ആരണ്യകാണ്ഡം എന്ന തമിഴ് ചിത്രമായിരുന്നു ആദ്യമായി അഭിനയിച്ചത്. ജിഗർതണ്ട, ജോക്കർ തുടങ്ങിയ സിനിമകളിലൂടെ ഏറെ ശ്രദ്ധേയനായി. 2015-ൽ കോഹിന്നൂർ എന്ന മലയാളം സിനിമയിലും അഭിനയിച്ചിട്ടുണ്ട്. നാലാം മുറ, ചേര, കാപ്പ, ഇന്ദിര, നീരജ തുടങ്ങിയ സിനിമകൾ അദ്ദേഹത്തിന്റേതായി പുറത്തിറങ്ങാനുണ്ട്.