പ്രഖ്യാപിച്ച നാൾ മുതൽ തന്നെ തെന്നിന്ത്യൻ സിനിമാലോകം ഉറ്റുനോക്കുന്ന ബ്രഹ്മാണ്ഡചിത്രമായിരുന്നു 'പൊന്നിയിൻ സെൽവൻ 1'. വൻതാരനിര അണിചേരുന്ന ചിത്രത്തിൽ ആൾവാർകടിയാൻ നമ്പി എന്ന കഥാപാത്രവുമായി ജയറാമും എത്തിയിരുന്നു. മറ്റു താരങ്ങൾക്കൊപ്പം തന്നെ ജയറാമും സ്‌ക്രീനിൽ നിറഞ്ഞു നിന്നു. അതിന്റെ വിജയ തിളക്കത്തിലാണ് താരങ്ങൾ. ഇപ്പോഴിതാ കന്നഡ സിനിമയില്‍ അരങ്ങേറ്റത്തിനൊരുങ്ങുകയാണ് നടന്‍ ജയറാം. ശിവരാജ്കുമാര്‍ കേന്ദ്ര കഥാപാത്രമായി എത്തുന്ന 'ഗോസ്റ്റ്' എന്ന ചിത്രത്തിലൂടെയാണ് നടന്റെ അരങ്ങേറ്റം.

സംവിധായകന്‍ എം ജി ശ്രീനിവാസനാണ് ഇക്കാര്യം അറിയിച്ചത്. നായകനൊപ്പം നില്‍ക്കുന്ന ശക്തനായ നടനെ ആഗ്രഹിച്ചുവെന്നും ജയറാം എത്തിയതില്‍ സന്തോഷമുണ്ട് എന്നും സംവിധായകന്‍ പറഞ്ഞു.'ഞങ്ങള്‍ രണ്ടു പേരും ഒരു ജ്വല്ലറി ബ്രാന്‍ഡിന്റെ ഭാഗമായതിനാല്‍ ഞങ്ങള്‍ പലപ്പോഴും കണ്ടുമുട്ടാറുണ്ട്. കാണുമ്പോഴെല്ലാം ഒരുമിച്ച് സിനിമ ചെയ്യാനുള്ള ആഗ്രഹം പ്രകടിപ്പിച്ചിരുന്നു. ഒടുവില്‍ അത് ഗോസ്റ്റിലൂടെ സംഭവിക്കുന്നതില്‍ എനിക്ക് സന്തോഷമുണ്ട്, 'സാധാരണയായി, ഒരു കഥയ്ക്ക് ഒരു നായകനും ഒരു വില്ലന്‍ ഉണ്ടാകും. എന്നാല്‍ ഇവിടെ അങ്ങനെ ഒരു വില്ലനല്ല. ഇരുവശത്തും ഗുണങ്ങളുണ്ട്. ജയറാമിന്റെ വേഷം അത്യധികം ശക്തമാണ്. ശിവരാജ്കുമാറില്‍ നിന്ന് തികച്ചും വ്യത്യസ്തമായിരിക്കും. ഒക്‌ടോബര്‍ അവസാനം ബംഗളൂരുവിലെ ലൊക്കേഷനില്‍ ജയറാം ചേരും. രണ്ടുപേരും സ്‌ക്രീനില്‍ കാണാന്‍ ഒരു ട്രീറ്റ് ആയിരിക്കും,' ശ്രീനിവാസ കൂട്ടിച്ചേര്‍ക്കുന്നു.