സെല്‍ഫിയെടുക്കാന്‍ എത്തിയ ആരാധകരോട് ജയ ബച്ചന്‍ ചോദിച്ചത് അല്പം കടന്നുപോയി എന്നു വേണം പറയാന്‍. പൊതുവെ പാപ്പരാസികളോട് ദേഷ്യത്തിലാണ് ജയ ബച്ചന്‍ പെരുമാറാറുള്ളത്. അനാവശ്യ ചോദ്യങ്ങളെയൊന്നും ജയ ബച്ചന്‍ പ്രോത്സാഹിപ്പിക്കാറില്ല.

മാധ്യമങ്ങളോട് ഇവര്‍ ദേഷ്യപ്പെട്ട പല സാഹചര്യങ്ങളും ഉണ്ടായിട്ടുണ്ട്. ഇപ്പോഴിതാ ആരാധകരോടും ദേഷ്യപ്പെട്ടിരിക്കുകയാണ് ജയ ബച്ചന്‍. ഭോപ്പാലില്‍ മകന്‍ അഭിഷേക് ബച്ചനൊപ്പം പൊതുസ്ഥലത്ത് വെച്ച് ആരാധകര്‍ വളഞ്ഞതാണ് ജയ ബച്ചനെ ചൊടിപ്പിച്ചത്.

സെല്‍ഫിയെടുക്കാന്‍ ആരാധകര്‍ കൂടിയപ്പോഴാണ് ജയ ബച്ചന്‍ ദേഷ്യപ്പെട്ടത്. കാളി ബാരി ക്ഷേത്രത്തില്‍ വെച്ചാണ് സംഭവം. 'നിങ്ങളെന്താണ് ചെയ്യുന്നത്. ഞങ്ങള്‍ പറ്റില്ലെന്ന് പറഞ്ഞതല്ലേ. കുറച്ച് മര്യാദ കാണിക്കൂ. ഭോപാലിലെ ആളുകള്‍ക്ക് കുറച്ച് മര്യാദ വേണം' എന്നാണ് ജയ ബച്ചന്‍ പറഞ്ഞത്.

എന്നാല്‍, അതൊന്നും കാര്യമാക്കാതെ വീണ്ടും ആളുകള്‍ സെല്‍ഫി എടുത്ത് തുടങ്ങി. ഇതോടെ നിങ്ങള്‍ക്കൊന്നും നാണമില്ലേ എന്നാണ് ജയ ബച്ചന്‍ വീണ്ടും ദേഷ്യത്തോടെ ചോദിച്ചത്. ഇതിന്റെ വീഡിയോ സോഷ്യല്‍ മീഡിയയില്‍ പ്രചരിക്കുന്നുണ്ട്. ആളുകള്‍ ഇത്തരത്തില്‍ വളഞ്ഞത് തെറ്റാണെങ്കിലും ജയ ബച്ചന്‍ മോശമായ ഭാഷയിലാണ് പ്രതികരിച്ചതെന്ന് സോഷ്യല്‍ മീഡിയ അഭിപ്രായപ്പെടുന്നു.