സോഷ്യൽ മീഡിയയിലൂടെ ഉയരുന്ന സൈബർ ആക്രമണങ്ങൾക്കെതിരെ അടുത്തിടെ ഗായികയും മുൻ ബിഗ് ബോസ് താരവുമായ അഭിരാമി സുരേഷ് പൊട്ടിത്തെറിച്ചിരുന്നു. ഇനിയും അധിക്ഷേപിക്കുന്നവർക്കെതിരെ നിയമനടപടി സ്വീകരിക്കുമെന്നായിരുന്നു അഭിരാമി വ്യക്തമാക്കിയത്. ഇപ്പോഴിതാ സോഷ്യല്‍ മീഡിയയിലെ അതിക്രമങ്ങളെക്കുറിച്ച് പ്രതികരണവുമായി എത്തിയിരിക്കുകയാണ് അഭിരാമി. ചെറുപ്പക്കാര്‍ ഞങ്ങളുടെ കാര്യത്തില്‍ സപ്പോര്‍ട്ട് ചെയ്യുന്നവരാണ്. ഞങ്ങളുടെ പിള്ളേരാണ്. അവരെ ഞങ്ങള്‍ക്കുള്ളൂ. കമന്റ് ചെയ്യുന്നത് കുറച്ച് പ്രായമുള്ളവരാണ്. കാര്യം അവര്‍ പറയുന്നത് സംസ്‌കാരത്തെക്കുറിച്ചാണ്. പക്ഷെ പറയുന്നത് മൊത്തം തെറിയാണ്. മോളെ എന്നു പോലുമല്ല വിളിക്കുന്നത്. ക്രിയാത്മക വിമര്‍ശനം എടുക്കുന്നവരാണ് ഞങ്ങള്‍. പക്ഷെ തെറി വിളിച്ചിട്ട് പോവുകയാണ്. ഇതാണ് അവര്‍ കാണിച്ചു തരുന്ന സംസ്‌കാരം. അവര്‍ കാണിക്കുന്നത് സംസ്‌കാരത്തിന് എതിരാണ് എന്നതാണ് സത്യമെന്നാണ് അഭിരാമി പറയുന്നത്. അമ്മ അടിസ്ഥാനപരമായ ശക്തിയുള്ള ആളല്ല. ഞങ്ങളോട് കാണിക്കുന്നതേയുള്ളൂ. പുറത്ത് വന്നാല്‍ പൂച്ചക്കുട്ടിയാണ്. വേഗം കരയും. അമ്മ കരയുന്നത് എന്തിനാണെന്ന് മനസിലാക്കാനുള്ള ബുദ്ധി എനിക്കും ചേച്ചിയ്ക്കും വേണം. അമ്മ വിളിച്ചിട്ട് ദേഷ്യപ്പെടുകയോ കരയുകയോ ചെയ്താല്‍ അത് ഇന്ന് വന്ന വിവാദവും അതിന് താഴെ നമ്മള്‍ മറുപടി കൊടുക്കാത്ത കമന്റുമാണ് കാരണമെന്ന് മനസിലാക്കി എടുക്കണം. ഇപ്പോള്‍ ഞാന്‍ വീഡിയോ ചെയ്തതിന് ശേഷം അമ്മയൊന്ന് ശാന്തയായിട്ടുണ്ട്. വല്യമ്മയും ചേച്ചിയും അമ്മയുടെ സുഹൃത്തുക്കളുമൊക്കെ ഓടി വരും. പക്ഷെ എന്തിനാണ് ഇങ്ങനെ ചെയ്യുന്നത് എന്ന ചോദ്യത്തിന് മാത്രം ആര്‍ക്കും ഉത്തരമില്ലെന്നും അഭിരാമി പറയുന്നു. ഏറ്റവും കൂടുതല്‍ സര്‍ച്ച് ചെയ്ത ആളുകളാണ് എന്നത് മാത്രമാണ് നേട്ടം. ഇതില്‍ അഭിമാനിക്കാനൊന്നുമില്ല. നമ്മളുടെ നേട്ടങ്ങള്‍ പോലും അംഗീകരിക്കാതെയുള്ള ആരോപണങ്ങളും വിമര്‍ശനങ്ങളുമാണ്. ഒരിക്കലും ഗുണമുണ്ടായിട്ടില്ല. ഞങ്ങളുടെ ഫോളോവേഴ്‌സിന്റെ പത്ത് ശതമാനവും ഹേറ്റേഴ്‌സാണ്. പിന്നെ ബാക്കിയുള്ളവരും. വലിയൊരു ഗ്രൂപ്പ് തന്നെയുണ്ട്. എന്താണ് കാരണമെന്ന് മനസിലാകുന്നില്ല. ഇതില്‍ പെണ്‍കുട്ടികളില്ല, പക്ഷെ ആന്റിമാരുണ്ടെന്നും താരം പറയുന്നു. മാളത്തിലേക്ക് ഒതുങ്ങാന്‍ ശ്രമിച്ചോ? എന്ന ചോദ്യത്തിനും അഭിരാമി മറുപടി നല്‍കുന്നുണ്ട്. താന്‍ എപ്പോഴും മാളത്തില്‍ ഒളിക്കാന്‍ നോക്കുന്നയാളാണ്. ബ്രേക്ക് എടുക്കുകയോ ഡീ ആക്ടിവേറ്റ് ചെയ്യുകയോ ട്രാവല്‍ എന്നു പറഞ്ഞ് വീട്ടില്‍ തന്നെ ഇരിക്കുകയോ ഒക്കെ ചെയ്യാറുണ്ട്. ഞാന്‍ നല്ല ഇമോഷണല്‍ ആയ ആളാണ്. ഒരുപാട് മാളത്തില്‍ ഒതുങ്ങിയിട്ടില്ല. പക്ഷെ ഇത്തവണ മാളത്തില്‍ ഒതുങ്ങില്ല. നിയമപരമായി തന്നെ നേരിടും. ആരെങ്കിലും പ്രതികരിച്ചാലെ എന്തെങ്കിലുമൊക്കെ മാറ്റമുണ്ടാകും. എന്നേയും എന്റെ അച്ഛനേയും അമ്മയേയും പറയാന്‍ ഞാന്‍ അവരോട് ഒന്നും ചെയ്തിട്ടില്ലെന്നാണ് അഭിരാമി പറയുന്നത്.