കാതോടു കാതോരം, കുട്ടേട്ടൻ, സംഘം തുടങ്ങിയ സിനിമകളിലൂടെ മലയാളികളുടെ ഇഷ്ടനായികമാരിൽ ഒരാളായി മാറിയ നടിയായിരുന്നു സരിത. ജന്മം കൊണ്ട് ആന്ധ്രാ സ്വദേശിനിയാണ് എങ്കിലും, തമിഴ് ഇൻഡസ്ട്രിയിൽ വേരുറപ്പിച്ച താരം കൂടിയായിരുന്നു സരിത. കന്നഡ, മലയാളം, തെലുഗു തുടങ്ങിയ ഭാഷകളിലും തന്റേതായ ഇടം നടി കണ്ടെത്തി.

ഇപ്പോഴിതാ പത്ത് വർഷത്തെ ഇടവേളയ്ക്ക് ശേഷം, സരിത വെള്ളിത്തിരയിലേയ്ക്ക് മടങ്ങി വരികയാണ് സരിത. നാല് ഭാഷകളിലായി അഞ്ഞൂറിലധികം സിനിമകളിൽ അഭിനയിച്ചിട്ടുള്ള സരിത, അഭിനയത്തിന് പുറമെ പ്രമുഖ ദക്ഷിണേന്ത്യൻ നായികമാരുടെ സ്വരമായും സിനിമകളിൽ തിളങ്ങിയിരുന്നു. വിജയശാന്തി, രമ്യ കൃഷ്ണൻ, മീന, സുഹാസിനി, നഗ്മ, സൗന്ദര്യ തുടങ്ങിയ പ്രമുഖ നായികമാർക്ക് വേണ്ടി, കൂടുതൽ സിനിമകളിലും ഡബ്ബ് ചെയ്തു വന്നിരുന്നത് സരിതയാണ്.

മികച്ച നടിക്കുള്ള തമിഴ്,തെലുഗു, കന്നഡ ഇന്ഡസ്ട്രികളിലെ അവാർഡുകൾ നേടിയിട്ടുള്ള സരിത, മികച്ച ഡബ്ബിങ് ആർട്ടിസ്റ്റിനുള്ള പുരസ്കാരവും പലതവണ നേടിയിട്ടുണ്ട്. അമ്മക്കിളിക്കൂട് എന്ന സിനിമയിലാണ്; മലയാളത്തിൽ സരിത അവസാനമായി അഭിനയിച്ചത്. തമിഴ് യുവതാരം ശിവകാർത്തികേയൻ നായകനാകുന്ന മാവീരൻ എന്ന സിനിമയിലൂടെയാണ് സരിത വീണ്ടും വെള്ളിത്തിരയിൽ മടങ്ങിയെത്തുന്നത്. താൻ ആദ്യസിനിമ ചെയ്യുമ്പോൾ ഉള്ള അതേ ത്രില്ലിലാണ്, ഈ സിനിമ ചെയ്യുന്നത് എന്ന്; സരിത മാധ്യമങ്ങളോട് പറഞ്ഞു.

മലയാള സിനിമാ ലോകം വലിയ ആഘോഷമാക്കിയ വിവാഹമായിരുന്നു അഭിനേതാക്കളായ മുകേഷിന്റെയും സരിതയുടെയും. ഭർത്താവിനേക്കാൾ ഏറെ താരമൂല്യമുള്ള അഭിനേത്രിയുമായിരുന്നു 1987 കാലഘട്ടത്തിൽ സരിത. എന്നാൽ വിവാഹശേഷം, തുടർച്ചയായി സിനിമകൾ ചെയ്യുന്നത് ഒഴിവാക്കി; കുടുംബകാര്യങ്ങളിൽ ശ്രദ്ധ കേന്ദ്രീകരിച്ചു. തമിഴിലും കന്നഡയിലും മലയാളത്തിലുമായി അന്ന് സരിത തിളങ്ങി നില്‍ക്കുകയായിരുന്നു. കമല്‍ഹാസനുമായി ഒന്നിച്ചഭിനയിച്ച സരിത അതിവേഗമാണ് മലയാളികളുടെ പ്രിയപ്പെട്ട നായികയായത്.

പിന്നീട് നടന്‍ മുകേഷുമായി പ്രണയത്തിലാണെന്ന് അറിഞ്ഞതോടെ സരിതയുമായി ബന്ധപ്പെട്ട വാര്‍ത്തകള്‍ മലയാളികളുടെ നിത്യജീവിതത്തിന്റെ ഭാഗമായി. സിനിമയില്‍ സജീവമാകുന്നതിനു മുന്‍പ് തന്നെ വിവാഹം കഴിച്ച താരമാണ് സരിത. പതിനാറ് വയസ്സുള്ളപ്പോഴാണ് സരിതയുടെ ആദ്യ വിവാഹം.

തെലുങ്ക് നടനായ വെങ്കട സുബയ്യയായിരുന്നു സരിതയുടെ ആദ്യ ഭര്‍ത്താവ്. ഈ ദാമ്പത്യത്തിനു വെറും ആറ് മാസത്തെ ആയുസ് മാത്രമേ ഉണ്ടായിരുന്നുള്ളൂ. അഭിപ്രായ ഭിന്നതയെ തുടര്‍ന്ന് വെങ്കട സുബ്ബയ്യയും സരിതയും വേര്‍പിരിഞ്ഞു. ആദ്യ വിവാഹബന്ധം തകര്‍ന്നത് സരിതയെ മാനസികമായി ഏറെ തളര്‍ത്തിയിരുന്നു. ഈ മാനസിക ബുദ്ധിമുട്ടുകളില്‍ നിന്ന് രക്ഷ നേടാന്‍ സരിത സിനിമയില്‍ വളരെ സജീവമായി.

എണ്‍പതുകളുടെ തുടക്കത്തിലാണ് മുകേഷ് സിനിമയിലെത്തുന്നത്. 1982 ല്‍ ബലൂണ്‍ എന്ന സിനിമയില്‍ മുകേഷ് നായകനായി. പിന്നീട് മോഹന്‍ലാലിനൊപ്പം നിരവധി ഹിറ്റ് സിനിമകളുടെ ഭാഗമായി. പിസി 369 എന്ന സിനിമയിലൂടെയാണ് മുകേഷും സരിതയും തമ്മില്‍ അടുപ്പത്തിലാകുന്നത്. ആദ്യമൊക്കെ ഇരുവരും തമ്മില്‍ നല്ല സൗഹൃദമായിരുന്നു. പിന്നീട് അത് കടുത്ത പ്രണയമായി. തനിയാവര്‍ത്തനം എന്ന സിനിമയില്‍ മമ്മൂട്ടിയുടെ ഭാര്യയായി സരിതയും മമ്മൂട്ടിയുടെ അനിയനായി മുകേഷും ഒന്നിച്ചഭിനയിച്ചു.

ഈ സിനിമയുടെ സെറ്റിലാണ് മുകേഷും സരിതയുമായുള്ള പ്രണയം തീവ്രതയിലേക്ക് എത്തിയത്. മമ്മൂട്ടിയും ഈ പ്രണയത്തിനു സാക്ഷിയാണ്. ഒടുവില്‍ മുകേഷും സരിതയും വിവാഹം കഴിക്കാന്‍ തീരുമാനിച്ചു. ഇരുവരുടെയും പ്രണയവും വിവാഹവും തെന്നിന്ത്യന്‍ സിനിമാലോകം വലിയ ആഘോഷമാക്കി. മുകേഷിനെ വിവാഹം ചെയ്തതോടെ സരിത അഭിനയം നിർത്തി കുടുംബ ജീവിതത്തിലേക്ക് കടന്നു.

പക്ഷെ സന്തോഷം നിറഞ്ഞ ദാമ്പത്യ ജീവിതം പ്രതീക്ഷിച്ച് പോയ സരിതയ്ക്ക് മുകേഷിനൊപ്പമുള്ള ജീവിതം വേദനകൾ നിറഞ്ഞതായിരുന്നു. വർഷങ്ങൾക്ക് മുമ്പ് സരിത താൻ അനുഭവിച്ച ദുരിതങ്ങൾ വെളിപ്പെടുത്തിയപ്പോൾ മലയാളികൾ അമ്പരന്നു. അത്രത്തോളം ക്രൂരമായിട്ടാണ് ഭർത്താവ് മുകേഷ് തന്നോട് പെരുമാറിയിരുന്നതെന്നാണ് സരിത പറഞ്ഞിരുന്നത്.