സിനിമ,സീരിയല്‍ നടന്‍  കൈലാസ് നാഥ് (65) അന്തരിച്ചു... സംസ്‌കാരം ഇന്ന്.... കൊച്ചിയിലെ സ്വകാര്യ ആശുപത്രിയില്‍ ചികിത്സയില്‍ കഴിയവേയാണ് മരണം സംഭവിച്ചത്.

കരള്‍ രോഗത്തിന് ദീര്‍ഘനാളായി ചികിത്സയിലായിരുന്ന ഇദ്ദേഹത്തെ വിദഗ്ദ്ധ ചികിത്സയ്ക്കായി ജൂണ്‍ 20നാണ് തിരുവനന്തപുരം എസ്.കെ ആശുപത്രിയില്‍ നിന്ന് കൊച്ചി റിനൈ മെഡിസിറ്റി ആശുപത്രിയിലെത്തിച്ചത്.


കലശലായ പ്രമേഹവും ഹൃദ്രോഗവും നില വഷളാക്കി. ഇതിനിടെ എച്ച് 1.എന്‍ 1ഉം ബാധിച്ചു. മൃതദേഹം തൃപ്പൂണിത്തുറയിലെ മകളുടെ വസതിയിലേക്ക് മാറ്റി.

ഇന്ന് രാവിലെ തിരുവനന്തപുരം വലിയവിള നീലമന വീട്ടില്‍ എത്തിക്കും. സംസ്‌കാരം ഇന്ന് ഉച്ചയ്ക്ക് രണ്ടിന് കരമന ബ്രാഹ്മണസഭ ശ്മശാനത്തില്‍.ഭാര്യ:അജിത,മകള്‍:ധന്യ കൈലാസ് (എച്ച്.ഡി.എഫ്.സി. ലൈഫ്,എറണാകുളം). മരുമകന്‍:ശ്രീകാന്ത്.


ആദ്യ കാലത്ത് സിനിമയിലും പിന്നീട് മലയാള സീരിയല്‍ രംഗത്തും ശ്രദ്ധേയമായ നിരവധി കഥാപാത്രങ്ങള്‍ക്ക് ജീവന്‍ നല്‍കി.
ദീര്‍ഘകാലം ശ്രീകുമാരന്‍ തമ്പിയുടെ സംവിധാന സഹായിയായി പ്രവര്‍ത്തിച്ചിട്ടുള്ള കൈലാസ് നാഥ് മലയാളത്തില്‍ 'ഇതു നല്ല തമാശ' എന്ന ചിത്രം സംവിധാനം ചെയ്തിട്ടുണ്ട്.

ചിരഞ്ജീവി,ശങ്കര്‍,ശ്രീനാഥ്,നാസര്‍ എന്നിവര്‍ക്കൊപ്പം ഫിലിം ഇന്‍സ്റ്റിറ്റ്യൂട്ടില്‍ പഠനം പൂര്‍ത്തിയാക്കിയ കൈലാസ് നാഥിന്റെ ആദ്യചിത്രമായ സംഗമം 1977ലാണ് പുറത്തിറങ്ങിയത്.


'ഒരു തലൈ രാഗം' എന്ന തമിഴ് ചിത്രം ശ്രദ്ധിക്കപ്പെതോടെ കൈലാസ് നാഥിനെ തേടി നിരവധി ചിത്രങ്ങളെത്തി. പാലവനൈ ചോല എന്ന ചിത്രത്തിലെ കഥാപാത്രവും ഏറെ ശ്രദ്ധിക്കപ്പെട്ടു. തമിഴില്‍ തൊണ്ണൂറിലധികം ചിത്രങ്ങളില്‍ വേഷമിട്ടു. രജനീകാന്തിനൊപ്പം വള്ളി എന്ന സിനിമയിലും അഭിനയിച്ചിട്ടുണ്ട്.


സേതുരാമയ്യര്‍ സി.ബി.ഐയിലെ സ്വാമി,സ്വന്തമെന്ന പദത്തിലെ കൊച്ചു കുട്ടന്‍,ഇരട്ടി മധുരത്തിലെ സുമന്‍,ശ്രീനാരായണ ഗുരുവിലെ ചട്ടമ്പി സ്വാമി,ശരവര്‍ഷത്തിലെ അയ്യര്‍ തുടങ്ങിയവ അദ്ദേഹത്തിന്റെ ശ്രദ്ധേയമായ വേഷങ്ങളാണ്. മിന്നുകെട്ട്,എന്റെ മാനസപുത്രി,പ്രണയം,മനസറിയാതെ തുടങ്ങിയ സീരിയലുകളിലും വേഷമിട്ടിട്ടുണ്ട്.