കലാഭവന്‍ മണിയും ഷാജി കൈലാസും അടുത്ത സുഹൃത്തുക്കളാണ്. ദി സ്‌റ്റേറ്റ് എന്ന ചിത്രത്തിലാണ് മണിയുമായി ഷാജി കൈലാസ് അവസാനമായി സഹകരിച്ചത്. എന്നാല്‍ ഈ ചിത്രം പൂര്‍ത്തിയാക്കാനാകാതെ പോയതിന്റെ ദുഃഖത്തിലാണ് ഷാജി കൈലാസ്.
കലാഭവന്‍ മണിക്ക് നിരവധി മികച്ച വേഷങ്ങള്‍ ഷാജി കൈലാസ് സമ്മാനിച്ചിട്ടുണ്ട്. നീണ്ട ഇടവേളയ്ക്ക് ശേഷം താന്‍ സംവിധാനം ചെയ്ത ചിത്രത്തിലും മണിക്ക് മികച്ച വേഷമാണ് ഷാജി നല്‍കിയത്.
ദി സ്‌റ്റേറ്റില്‍ ഒരു പോലീസ് വേഷമാണ് മണിക്ക് ഷാജി നല്‍കിയിരുന്നത്. സാമ്പത്തിക പ്രതിസന്ധി ഉള്‍പ്പെടെ വിവിധ കാരണങ്ങളാള്‍ ഈ സിനിമയുടെ ചിത്രീകരണം മുടങ്ങിപ്പോകുകയായിരുന്നു. സിനിമയുടെ കഥയ്ക്ക് വഴിത്തിരിവുണ്ടാക്കുന്ന കോയമ്പത്തൂര്‍ എസ്.ഐയുടെ വേഷമായിരുന്നു മണിക്ക് ചിത്രത്തില്‍. സുരേഷ് ഗോപി നായകനായ ചിത്രത്തില്‍ മണി ആറ് ദിവസം ചിത്രീകരണത്തില്‍ പങ്കെടുക്കുകയും ചെയ്തിരുന്നു.
ചിത്രീകരണം മുടങ്ങിയെങ്കിലും സിനിമ പുനരാരംഭിച്ചാല്‍ എത്ര തിരക്കുണ്ടെങ്കിലും ചിത്രവുമായി സഹകരിക്കാന്‍ തയ്യാറാണെന്ന് മണി അറിയിച്ചിരുന്നു. ഇക്കാര്യം പറഞ്ഞ് ഇടയ്ക്ക് വിളിച്ചിരുന്നതായും ഷാജി കൈലാസ് ഫെയ്‌സ്ബുക്ക് പോസ്റ്റില്‍ വ്യക്തമാക്കി. കലാഭവന്‍ മണിയുടെ മരണം ഇനിയും വിശ്വസിക്കാനായിട്ടില്ല. അത്രയ്ക്ക് പ്രതിഭയും സ്‌നേഹവുമുള്ള ആളായിരുന്നു മണിയെന്നും ഷാജി കൈലാസ് പറഞ്ഞു. ദി സ്‌റ്റേറ്റിലെ മണിയുടെ ചില സ്റ്റില്ലുകളും ഷാജി കൈലാസ് ഫെയ്‌സ്ബുക്കില്‍ ഷെയര്‍ ചെയ്തിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha