ന്യൂസിലൻഡിനെതിരായ ഒന്നാം ക്രിക്കറ്റ് ടെസ്റ്റിന്റെ രണ്ടാം ദിനം... മികച്ച ബാറ്റിങുമായി ഇന്ത്യ...

ന്യൂസിലൻഡിനെതിരായ ഒന്നാം ക്രിക്കറ്റ് ടെസ്റ്റിന്റെ രണ്ടാം ദിനത്തിൽ മികച്ച ബാറ്റിങുമായി ഇന്ത്യ. ന്യൂസിലൻഡിനെ 368 റൺസിൽ പുറത്താക്കി ഒന്നാം ഇന്നിങ്സ് തുടങ്ങിയ ഇന്ത്യ രണ്ടാം ദിനത്തിലെ കളി അവസാനിക്കുമ്പോൾ ഒരു വിക്കറ്റ് നഷ്ടത്തിൽ 159 റൺസെന്ന നിലയിൽ. ന്യൂസിലൻഡിന്റെ സ്കോറിനൊപ്പമെത്താൻ ഇന്ത്യക്ക് ഇനി 209 റൺസ് കൂടി മതിയാകും. ഓപ്പണർമാരായ യശസ്വി ജയ്സ്വാളും കെഎൽ രാഹുലും ചേർന്നു മിന്നും തുടക്കമാണ് ഇന്ത്യക്ക് നൽകിയത്.
യശസ്വി ആക്രമണ മൂഡിലും കെഎൽ രാഹുൽ പ്രതിരോധിച്ചും കളിച്ചതോടെ കിവി ബൗളർമാർ ഹതാശരായി. ഇരുവരും ചേർന്നു ഓപ്പണിങിൽ 130 റൺസ് ചേർത്താണ് പിരിഞ്ഞത്. അർധ സെഞ്ച്വറി നേടിയ ഓപ്പണർ യശസ്വി ജയ്സ്വാളിന്റെ വിക്കറ്റാണ് ഇന്ത്യക്ക് നഷ്ടമായത്. സെഞ്ച്വറിയിലേക്ക് നീങ്ങുന്നതിനിടെയാണ് ജയ്സ്വാളിന്റെ അപ്രതീക്ഷിത പുറത്താകൽ.
യശസ്വി 89 പന്തിൽ 16 ഫോറുകൾ സഹിതം 85 റൺസ് വാരിയാണ് മടങ്ങിയത്. താരത്തിന്റെ 14ാം ടെസ്റ്റ് അർധ സെഞ്ച്വറിയാണിത്. മാറ്റ് ഹെന്റിയാണ് സെഞ്ച്വറിയിലേക്ക് നീങ്ങിയ ഇന്ത്യൻ ഓപ്പണറെ മടക്കി കിവികൾക്ക് ആശ്വാസമേകിയത്. പിന്നാലെ കെഎൽ രാഹുലും അർധ സെഞ്ച്വറി നേടി. കളി നിർത്തുമ്പോൾ രാഹുൽ 116 പന്തിൽ 5 ഫോറുകൾ സഹിതം 52 റൺസുമായി ക്രീസിൽ തുടരുന്നു.
35 പന്തിൽ 3 ഫോറുകൾ സഹിതം 16 റൺസുമായി ദേവ്ദത്ത് പടിക്കലാണ് രാഹുലിനൊപ്പം ക്രീസിലുള്ളത്. രാഹുലിന്റെ 22ാം ടെസ്റ്റ് അർധ സെഞ്ച്വറിയാണിത്. നേരത്തെ ഒന്നാം ദിനത്തിൽ ഇന്ത്യൻ ക്യാംപിലേക്ക് പോരാട്ടം നയിച്ച ഹെന്റി നിക്കോൾസും ഗ്ലെൻ ഫിലിപ്സും ഒഴികെയുള്ള കിവി ബാറ്റർമാർക്കൊന്നും രണ്ടാം ദിനത്തിലും ക്രീസിൽ നിൽക്കാൻ കഴിഞ്ഞില്ല.
നിക്കോൾസ് 175 റൺസുമായി പുറത്താകാതെ നിന്നു. 21 ഫോറുകൾ സഹിതമാണ് താരത്തിന്റെ മികച്ച ബാറ്റിങ്. ഗ്ലെൻ ഫിലിപ്സ് 118 റൺസുമായി മടങ്ങി. താരം 14 ഫോറുകൾ പറത്തി.
ആദ്യ ദിനത്തിൽ 3 വിക്കറ്റുകൾ വീഴ്ത്തിയ ജസ്പ്രിത് ബുംറ രണ്ടാം ദിവസം ഒരു വിക്കറ്റ് കൂടി നേടി മൊത്തം നേട്ടം 4 വിക്കറ്റാക്കി. ആകാശ് ദീപ് 3 വിക്കറ്റുകളും അൻഷുൽ കാംബോജ് 2 വിക്കറ്റുകളും പ്രസിദ്ധ് കൃഷ്ണ ഒരു വിക്കറ്റും വീഴ്ത്തുകയായിരുന്നു
https://www.facebook.com/Malayalivartha
























