ശബരിമല തീര്ത്ഥാടനം ആസൂത്രിതമായി അട്ടിമറിക്കാന് നീക്കം..ബുക്കിങ്ങിന് ശ്രമിക്കുമ്പോള് സ്ലോട്ടുകള് ലഭ്യമല്ലെന്നാണ് വെബ്സൈറ്റില് കാണിക്കുന്നത്..അവധി ദിവസങ്ങളില് പോലും തീര്ത്ഥാടകരുടെ എണ്ണം വളരെ കുറവാണ്..

ശബരിമല തീര്ത്ഥാടനം ആസൂത്രിതമായി അട്ടിമറിക്കാന് ചില ലോബികള് ശ്രമിക്കുന്നുണ്ടോ എന്ന സംശയം ബലപ്പെടുന്നു. വെര്ച്വല് ക്യൂ വഴി സ്ലോട്ടുകള് കൂട്ടത്തോടെ ബുക്ക് ചെയ്ത ശേഷം ദര്ശനത്തിന് എത്താതെ മാറിനില്ക്കുന്ന പ്രവണതയില് സര്ക്കാര് വലിയ അസ്വാഭാവികത കാണുന്നുണ്ട്. ഇക്കാര്യത്തില് അടിയന്തര പരിശോധന നടത്താന് ദേവസ്വം മന്ത്രി കെ. മുരളീധരന് ക്രമസമാധാന ചുമതലയുള്ള എഡിജിപി പി. വിജയനോടും ദേവസ്വം ബോര്ഡ് പ്രസിഡന്റ് കെ. ജയകുമാറിനോടും ആവശ്യപ്പെട്ടു.
മുന്വര്ഷങ്ങളെ അപേക്ഷിച്ച് ശബരിമലയില് തിരക്ക് ഗണ്യമായി കുറഞ്ഞതിന്റെ പിന്നില് കൃത്രിമമായ ഇടപെടലുകള് നടന്നിട്ടുണ്ടെന്നാണ് വിലയിരുത്തല്. സാധാരണയായി വെള്ളി, ശനി, ഞായര് ദിവസങ്ങളില് സന്നിധാനത്ത് വലിയ ഭക്തജനത്തിരക്ക് അനുഭവപ്പെടാറുണ്ട്. എന്നാല് ഇത്തവണ അവധി ദിവസങ്ങളില് പോലും തീര്ത്ഥാടകരുടെ എണ്ണം വളരെ കുറവാണ്.കഴിഞ്ഞ ചൊവ്വാഴ്ച അന്പത്തിയാറായിരത്തിലധികം പേര് വെര്ച്വല് ക്യൂ വഴി ദര്ശനത്തിനായി ബുക്ക് ചെയ്തിരുന്നു. എന്നാല് അന്ന് മലകയറിയത് നാല്പത്തിയെട്ടായിരത്തോളം പേര് മാത്രമാണ്.
പ്രതിദിനം ബുക്ക് ചെയ്യുന്നവരില് ഇരുപതിനായിരം മുതല് മുപ്പത്തയ്യായിരം വരെ പേര് ദര്ശനത്തിന് എത്തുന്നില്ല എന്ന ഞെട്ടിക്കുന്ന കണക്കുകളാണ് പുറത്തുവരുന്നത്.സംഭവത്തില് ടൂര് ഏജന്സികള്ക്കും ട്രാവല് ഏജന്റുമാര്ക്കും പങ്കുണ്ടോയെന്ന സംശയവും ഉയര്ന്നിട്ടുണ്ട്.ഈ മാസം 25 വരെയുള്ള വെര്ച്വല് ക്യൂ ബുക്കിങ് ഇതിനോടകം പൂര്ത്തിയായിട്ടുണ്ട്. വരും ദിവസങ്ങളില് ശബരിമല ദര്ശനത്തിന് എത്താന് ആഗ്രഹിക്കുന്നവര് ബുക്കിങ്ങിന് ശ്രമിക്കുമ്പോള് സ്ലോട്ടുകള് ലഭ്യമല്ലെന്നാണ് വെബ്സൈറ്റില് കാണിക്കുന്നത്.
പ്രതിദിനം 80,000 പേര്ക്കാണ് നിലവില് ദര്ശനത്തിന് അനുമതിയുള്ളത്. ഇതില് 66,000 പേര്ക്ക് വെര്ച്വല് ക്യൂ വഴിയും 14,000 പേര്ക്ക് സ്പോട്ട് ബുക്കിങ് വഴിയുമാണ് പ്രവേശനം. കഴിഞ്ഞ ദിവസം വെര്ച്വല് ക്യൂ വഴി ബുക്ക് ചെയ്ത 58,697 പേരില് 37,341 പേര് മാത്രമാണ് ദര്ശനത്തിനെത്തിയത്.സാധാരണ നിലയില് ആയിരത്തോളം പേരുടെ കുറവ് ഉണ്ടാകാറുണ്ടെങ്കിലും ഇത്രയധികം പേര് എത്താതിരിക്കുന്നത് അധികൃതരില് സംശയമുണ്ടാക്കിയിട്ടുണ്ട്. കൂട്ടത്തോടെ സ്ലോട്ടുകള് ബുക്ക് ചെയ്തശേഷം ദര്ശനത്തിന് ആഗ്രഹിക്കുന്ന ഭക്തരില്നിന്ന് അമിത തുക ഈടാക്കി അവസരം ഒരുക്കുന്ന തട്ടിപ്പാണോ നടക്കുന്നതെന്നും പരിശോധിക്കുന്നുണ്ട്.
ടൂര് ഏജന്സികളും ട്രാവല് ഏജന്റുമാരും ഇത്തരമൊരു നീക്കത്തിന് പിന്നിലുണ്ടോയെന്നാണ് സംശയം.
https://www.facebook.com/Malayalivartha

























