ഭാര്യ ലിസിയും താനും തമ്മില്‍ പിരിഞ്ഞതിന് ഒരേയൊരു കാരണം മാത്രമേയുള്ളൂ... തുറന്ന് പറഞ്ഞ് പ്രിയദര്‍ശന്‍
ഭാര്യ ലിസിയും താനും തമ്മില്‍ പിരിഞ്ഞതിന് ഒരേയൊരു കാരണം മാത്രമേയുള്ളൂവെന്ന് സംവിധായകന്‍ പ്രിയദര്‍ശന്‍. അത് ഈഗോ ആണെന്നും ഇക്കാരണത്താലാണ് തങ്ങളുടെ വിവാഹബന്ധം വേര്‍പിരിയുന്ന സ്ഥിതിയുണ്ടായതെന്നും പ്രിയദര്‍ശന്‍ പറഞ്ഞു. ഒരു മാസികയ്ക്ക് നല്‍കിയ അഭിമുഖത്തിലാണ് പ്രിയദര്‍ശന്‍ മനസ്സ് തുറക്കുന്നത്.
ലിസിയുമൊത്തുള്ള തന്റെ ജീവിതം സ്വര്‍ഗതുല്ല്യമായിരുന്നുവെന്നും പിരിഞ്ഞെങ്കിലും പരസ്പരമുള്ള ബഹുമാനം ഇപ്പോഴും ഇരുവര്‍ക്കും കുറഞ്ഞിട്ടില്ലെന്നും പ്രിയദര്‍ശന്‍ പറഞ്ഞു. ഇപ്പോള്‍ പിരിഞ്ഞിട്ടു പോലും വീടിന്റെ മുമ്പിലെ പ്രിയദര്‍ശന്‍ ലിസി എന്ന പേരു താന്‍ മാറ്റിയിട്ടില്ല. ഈഗോ മാത്രം ഒഴിവാക്കിയിരുന്നുവെങ്കില്‍ ബന്ധം പിരിയേണ്ടി വരില്ലായിരുന്നുവെന്നും അദ്ദേഹം പറഞ്ഞു.
എന്നെ സംബന്ധിച്ച് അതൊരു ഷോക്കായിരുന്നു. അതിന്റെ കാരണമൊക്കെ വിട്ടേക്ക്. അതെന്തെങ്കിലും ആവട്ടെ. എനിക്കെന്റെ ഭാര്യയെക്കുറിച്ച് ഒരു പരാതിയുമില്ല. എന്റെ വിജയത്തിന്റെ മുഴുവന്‍ കാരണക്കാരി എന്റെ ഭാര്യയാണ്. ഒരുദിവസം പോലും ഞങ്ങള്‍ തമ്മിലൊരു വഴക്കുണ്ടായിട്ടില്ല. ഞാനെവിടെ പോയാലും എന്തിന് പോയെന്നോ പൈസ എന്തിനുവേണ്ടി ചെലവാക്കിയെന്നോ ഒന്നും അവള്‍ ചോദിച്ചിട്ടില്ല. അതായിരുന്നു എന്റെ വിജയരഹസ്യവും. ലിസി എന്നെ ഒരുവിധത്തിലും ഇറിറ്റേറ്റ് ചെയ്തിട്ടില്ല. എന്റെ കുട്ടികളെ അന്തസ്സായിട്ടാണ് വളര്‍ത്തിയത്.
ഒരമ്മ എന്ന നിലയില്‍ ഷി വാസ് ദി ബൈസ്റ്റ് മദര്‍ ഇന്‍ ദ വേള്‍ഡ്. അച്ഛന് കഷ്ടപ്പെട്ടിട്ടാണ് പടമെടുക്കുന്നതെന്നും ആ പണത്തിന് അതിന്റെ വില കൊടുക്കണമെന്നുമൊക്കെ മക്കളോട് പറയുന്നത് ഞാന്‍ കേട്ടിട്ടുണ്ട്. എന്റെ മകന്‍ വിലയുള്ള ഒരു കാറില്‍ കയറില്ല. ഒരിക്കല്‍ ഞാനൊരു ബീറ്റില്‍ കാറ് വാങ്ങിച്ചിട്ട് സ്‌കൂളില്‍ അവനെ പിക്ക് ചെയ്യാന്‍ പോയി. ഇനി മേലില്‍ അച്ഛന് ഈ കാറ് കൊണ്ടുവരരുതെന്നാണ് അവന്‍ പറഞ്ഞത്. അങ്ങനെ വളരെ സിംപിളായിട്ടാണ് ലിസി കുട്ടികളെ വളര്‍ത്തിയത്. പണത്തിന്റെ വില, സ്റ്റാറ്റസ്, അന്തസ്സ് എല്ലാം അവര്‍ക്ക് പഠിപ്പിച്ചുകൊടുത്തിട്ടുണ്ട്.
ഞങ്ങള്‍ തമ്മിലുണ്ടായിട്ടുള്ള പ്രശ്‌നങ്ങള്‍ ശരിക്കുമൊരു ഈഗോയുടെ പുറത്തുണ്ടായതാണ്. ഞാനൊരു കണ്‍സേര്‍വേറ്റീവ് കുടുംബത്തില്‍ ജനിച്ചുവളര്‍ന്നതാണ്. പുരുഷന്റെ മനസ്സിലെ ഭാര്യ എന്നുപറയുന്നതിന് മിക്കവാറും അമ്മയാവും മാതൃക. പക്ഷേ കല്യാണം കഴിക്കുമ്പോള്‍ അമ്മയില്‍ കണ്ടിട്ടുള്ള കാര്യങ്ങള്‍ ഒരിക്കലും ഭാര്യയില്‍ പ്രതീക്ഷിക്കരുത്. അത് കിട്ടില്ല. കാരണം വേറൊരു ജനറേഷനില്‍ ജനിക്കുന്നവരാണ് ഇവര്‍. എന്റെ അച്ഛനും അമ്മയ്ക്കുമൊക്കെ ലിസിയെ ഭയങ്കര ഇഷ്ടമായിരുന്നു. നടക്കാന്‍ പറ്റുന്ന കാലം വരെ അച്ഛനാണ് ലിസിയെ എയര്‍പോര്‍ട്ടില്‍ വിടുന്നതും പിക്ക് ചെയ്യുന്നതുമൊക്കെ. അച്ഛന് എന്റെ അനിയത്തിയെക്കാളും ഇഷ്ടമായിരുന്നു ലിസിയെ. അനിയത്തി ഡോക്ടറേറ്റ് എടുത്തൊരു പ്രൊഫസറാണ്.
അച്ഛന് അവളോട് പറയുന്നത് ലിസിയുടെ ഡിസിപ്ലിന്‍ കണ്ടുപഠിക്കെന്നാണ്. ഇത്രയും വര്‍ഷം ഞാന്‍ ലിസിയുമൊത്ത് ജീവിച്ചത് സ്വര്‍ഗത്തില്‍ തന്നെയാണ്. ഇപ്പോള്‍ ഞങ്ങള്‍ തമ്മില്‍ പിരിഞ്ഞു. എങ്കിലും എന്റെ വീടിന്റെ മുന്നിലെ പ്രിയദര്‍ശന്‍ ലിസി എന്ന ബോര്‍ഡ് ഞാന്‍ മാറ്റിയിട്ടില്ല. എനിക്കറിയാം, എന്തൊക്കെ പ്രശ്‌നങ്ങള്‍ ഉണ്ടെങ്കിലും അവള്‍ക്ക് എന്നോടുള്ള ബഹുമാനവും എനിക്ക് അവളോടുള്ള ബഹുമാനവുമൊന്നും നഷ്ടപ്പെട്ടില്ലെന്ന്...
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
