ആരോടും യാത്ര ചോദിക്കാതെ നമ്മെ വിട്ടകന്ന നടനവിസ്മയം..ഇതായിരുന്നു ചിത്രത്തിന്റെ പരസ്യവാചകം. മലയാള സിനിമാ സ്‌നേഹികളെ സംബന്ധിച്ചിടത്തോളം, ഈ ചിത്രം കാണുവാന്‍ ആഗ്രഹം തോന്നുവാന്‍ തക്കവണ്ണം ഈ പരസ്യവാചകം തന്നെ ധാരാളം.

മരണശേഷമാണ് നമ്മള്‍ മറ്റുള്ളവരിലെ നന്മകളെയും കഴിവുകളെയും മറ്റും പ്രശംസിച്ച് തുടങ്ങുന്നത്. അതിന്റെ ഏറ്റവും ശക്തമായ ഉദാഹരണമാണ് കലാഭവന്‍ മണി എന്ന നടന്റെ മരണം. ഒരു നടന് ലഭിക്കാവുന്നതിനുമപ്പുറത്തെ അന്തിമോപചാരങ്ങള്‍ അര്‍പ്പിക്കുന്നതില്‍ നാമെല്ലാം ഉത്സുകരായിരുന്നു. അഭ്രപാളികളില്‍ കണ്ട ഒരു നടനേയും നമ്മള്‍ ഇന്നോളം ഇത്രയേറെ ദുഃഖത്തോടെ യാത്രയാക്കിയിട്ടില്ല.

കലാഭവന്‍ മണി അവസാനമായി അഭിനയിച്ച ചിത്രമെന്ന നിലയില്‍, ഈ ചിത്രം തീര്‍ച്ചയായും ശ്രദ്ധേയമാണെങ്കിലും, ജഗതി ശ്രീകുമാര്‍ എന്ന അതുല്യനടന് അപകടം സംഭവിച്ചശേഷം, വര്‍ഷങ്ങള്‍ക്കു മുന്‍പ് ഷൂട്ടിംഗ് പൂര്‍ത്തീകരിച്ച '3വിക്കറ്റിന് 365 റണ്‍സ്' എന്ന ചിത്രം ഇറങ്ങിയതുപോലെ, 'മണി' എന്ന നടന്റെ വേര്‍പാട് നമ്മിലുളവാക്കിയ ആഘാതത്തെ ചൂഷണം ചെയ്ത് മാര്‍ക്കറ്റ് ചെയ്യുവാനിരിക്കുന്ന തട്ടിക്കൂട്ട് ചിത്രമായിരിക്കുമോ ഇതെന്ന ആശങ്ക എനിക്കുണ്ടായിരുന്നു.

വെറും 99 മിനിറ്റുകള്‍ മാത്രം ദൈര്‍ഘ്യമുള്ള ഈ ചിത്രം, മുന്‍പ് മദ്യപാനിയായിരുന്നെങ്കിലും, ഇന്ന് വളരെ നല്ല കുടുംബജീവിതം നയിക്കുന്ന, കൂലിപ്പണിക്കാരനായ ബാലന്റെ കഥ പറയുന്നു. കുട്ടനാട്ടിലെ ചമ്ബക്കുളത്ത് ജീവിക്കുന്ന ബാലന്റെ മിടുക്കിയായ മകള്‍ പൊന്നു, ഉപരിപഠനാര്‍ത്ഥം എറണാകുളത്തെ ഹോസ്റ്റലില്‍ താമസിക്കുന്നു. അവിടെവച്ച്, ഒരിക്കല്‍ പൊന്നുവിന് ഒരു യുവാവ് സമ്മാനമായി ഒരു മൊബൈല്‍ ഫോണ്‍ നല്‍കുന്നു, അവള്‍ ഒരു വലിയ കെണിയില്‍ അകപ്പെടുന്നു.

ബാലന്‍ എന്ന നായകകഥാപാത്രത്തെ കലാഭവന്‍ മണി, വളരെ നല്ലരീതിയില്‍ അവതരിപ്പിച്ചു. അദ്ദേഹം മരണപ്പെട്ട് 33ാമത്തെ ദിവസമായ ഇന്ന്, കലാഭവന്‍ മണി എന്ന നടന്റെ അവസാനത്തെ പെര്‍ഫോമന്‍സ് കാണുക എന്നത്, വല്ലാത്തൊരു അനുഭവം തന്നെയായിരുന്നു എന്ന് പറയാതെവയ്യ.

സാഹചര്യങ്ങളുടെ സമ്മര്‍ദ്ദം നിമിത്തം നിസ്സഹായനായ പിതാവായും, മകളെ ഏറെ സ്‌നേഹിക്കുന്ന മദ്ധ്യവയസ്‌കനായും, കലാഭവന്‍ മണി, ബാലന്‍ എന്ന കഥാപാത്രമായി മാറുകതന്നെ ചെയ്തു. ചിത്രം തുടങ്ങി, ഗൗരവതരമായ ഒരു രംഗത്തില്‍, ഒറ്റ ഷോട്ടില്‍ എടുത്ത ഒരു കരച്ചില്‍ രംഗം ഹൃദയഭേദകമാണ്. കലാഭവന്‍ മണിയുടെ മേക്കപ് പല സന്ദര്‍ഭങ്ങളിലും അപൂര്‍ണ്ണമായിരുന്നു.

സാദിഖ്, റീന ബഷീര്‍, മീനു കുര്യന്‍ തുടങ്ങിയവരും ചിത്രത്തില്‍ അഭിനയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha