സോഷ്യല്‍ മീഡിയയിലെ സജീവ സാന്നിദ്ധ്യവുമാണ് അന്തരിച്ച കൊല്ലം സുധിയുടെ ഭാര്യ രേണു സുധി. അടുത്തിടെ രേണുവിന് ക്യാന്‍സര്‍ സ്ഥിരീകരിച്ചിരുന്നു. ഇപ്പോഴിതാ തന്റെ ചികിത്സയുമായി ബന്ധപ്പെട്ട് പുതിയ വിവരം പങ്കുവച്ചിരിക്കുകയാണവര്‍. 'നാലാമത്തെ കീമോതെറാപ്പി ചെയ്തതോടെ തീര്‍ത്തും അവശയായി. ഇനി രണ്ട് കീമോ കൂടി ബാക്കിയുണ്ട്. ആദ്യത്തെ മൂന്ന് കീമോ കഴിഞ്ഞ് പത്തുപന്ത്രണ്ട് ദിവസങ്ങള്‍ക്കുള്ളില്‍ യൂട്യൂബില്‍ വീഡിയോ ഇടുമായിരുന്നു. എന്നാലിത്തവണ ഒട്ടും വയ്യാത്ത അവസ്ഥയാണ്. ഛര്‍ദ്ദി ആണ് എപ്പോഴും. നാലാമത്തെ കീമോ ശരീരത്തെ പൂര്‍ണമായും തളര്‍ത്തി.

എന്നെ സ്‌നേഹിക്കുന്ന ആളുകളുടെ ഫോണ്‍ കോള്‍ പോലും എടുക്കാന്‍ പറ്റുന്നില്ല. കോടികളുടെ വരുമാനമൊന്നും എനിക്കില്ല. ബിഗ് ബോസില്‍ നിന്ന് അത്രവലിയ ലക്ഷങ്ങളൊന്നും കിട്ടിയില്ല. പണ്ടുമുതല്‍ തന്നെ അഞ്ചും പത്തും രൂപയ്ക്ക് പോയിരുന്നു. ഞാനന്ന് മണ്ടിയായിരുന്നു. എല്ലാവരും എന്നെവച്ച് റീച്ചുണ്ടാക്കി. അവരെയൊന്നും പിന്നെ കണ്ടിട്ടില്ല.

ബിഗ് ബോസില്‍ ഏറ്റവും കുറവ് പ്രതിഫലം വാങ്ങുന്നത് ഞാനാണെന്ന് പിന്നീടാണ് തിരിച്ചറിഞ്ഞത്. ഇപ്പോള്‍ ആകെയുള്ള വരുമാനം യൂട്യൂബും സബ്‌സ്‌ക്രിപ്ഷനുമാണ്. ഇതില്‍ നിന്നാണ് നാല് കീമോക്കുള്ള പണം കണ്ടെത്തിയത്. ആരോഗ്യത്തോടെ തിരിച്ചുവന്നാല്‍ സബ്‌സ്‌ക്രിപ്ഷനുമായി മുന്നോട്ട് പോകും. അതിന് ആര് എതിരുവന്നാലും വിഷയമല്ല. ഞാന്‍ ചാകാന്‍ നോക്കിയിരിക്കുന്ന ഒരുപാട് പേരുണ്ടെന്നറിയാം. ഇനി എന്നെക്കൊണ്ട് റീച്ചുണ്ടാക്കാന്‍ പറ്റില്ലെന്ന് അവര്‍ക്കറിയാം.

രണ്ടുലക്ഷം രൂപയുടെ മരുന്നാണ് ഇതുവരെ വാങ്ങിയത്. കീമോ കഴിഞ്ഞതോടെ പൈസയൊക്കെ തീര്‍ന്നു. അറിഞ്ഞും കേട്ടും സഹായിച്ച ഒരുപാട് പേരുണ്ട്. ആരൊക്കെ കൂടെയുണ്ടെന്ന് ഇപ്പോള്‍ മനസിലായി. പലരുടെയും വിചാരം രേണു സുധി തീര്‍ന്നുവെന്നാണ്. എന്നാലത് തെറ്റാണ്. മുറികൂടുന്ന ഐറ്റമാണ് രേണു. ആറാമത്തെ കീമോയും സര്‍ജറിയും കഴിഞ്ഞ് തിരിച്ചുവരും' പുതിയതായി പുറത്തുവിട്ട വീഡിയോയില്‍ രേണു പറയുന്നു.