തേനി ജയിലില്‍നിന്ന് രക്ഷപ്പെട്ട 17 വിചാരണത്തടവുകാരില്‍ എട്ടുപേരെക്കൂടി പൊലീസ് പിടികൂടി. ഇതോടെ പിടിയിലായവരുടെ എണ്ണം 13 ആയി. ഇനി നാലുപേരെക്കൂടി കണ്ടെത്താനുണ്ട്. ഡ്രോണ്‍ ഉപയോഗിച്ചുള്ള നിരീക്ഷണം ഉള്‍പ്പെടെ ശക്തമായ തിരച്ചിലാണ് പൊലീസ് നടത്തുന്നത്. ജയില്‍ ചാടിയ അഞ്ചുപേരെ നേരത്തേ വിവിധ സ്ഥലങ്ങളില്‍നിന്ന് പൊലീസ് പിടികൂടിയിരുന്നു. തുടര്‍ന്ന്, തടവുകാര്‍ രക്ഷപ്പെടാന്‍ സാധ്യതയുള്ള സ്ഥലങ്ങളിലും ജയിലിന് സമീപത്തെ കാടുപിടിച്ച പ്രദേശങ്ങളിലും ഡ്രോണ്‍ ഉപയോഗിച്ച് പരിശോധന നടത്തി. ഇതിന്റെ അടിസ്ഥാനത്തിലാണ് എട്ടുപേരെക്കൂടി കണ്ടെത്തി കസ്റ്റഡിയിലെടുത്തത്. ശേഷിക്കുന്ന നാലുപേര്‍ക്കായുള്ള തിരച്ചില്‍ തുടരുകയാണ്.

ആണ്ടിപ്പെട്ടിക്ക് സമീപം തേക്കുംപെട്ടിയിലാണ് തേനി ജില്ലാ ജയില്‍ സ്ഥിതി ചെയ്യുന്നത്. വിവിധ ജില്ലകളില്‍നിന്നുള്ള 334 തടവുകാരാണ് ജയിലിലുള്ളത്. ഇവരെ നാല് ബ്ലോക്കുകളിലായാണ് പാര്‍പ്പിച്ചിരുന്നത്. രാത്രി 10.30ഓടെയാണ് നാടകീയമായ സംഭവങ്ങള്‍ അരങ്ങേറിയത്. ജയിലിലെ മൂന്നാം ബ്ലോക്കിലുണ്ടായിരുന്ന ഒരു തടവുകാരന്‍ അപസ്മാരം ബാധിച്ചതായി അഭിനയിച്ചു. തുടര്‍ന്ന് ഇയാളെ ആശുപത്രിയിലെത്തിക്കണമെന്ന് സഹതടവുകാര്‍ ജയില്‍ ജീവനക്കാരോട് ആവശ്യപ്പെട്ടു.

ഇതനുസരിച്ച് സുരക്ഷാ ഡ്യൂട്ടിയിലുണ്ടായിരുന്ന രണ്ട് ജീവനക്കാര്‍ ബ്ലോക്ക് തുറന്നതോടെ തടവുകാര്‍ കൂട്ടത്തോടെ ഇവരെ ആക്രമിച്ചു. ജീവനക്കാര്‍ക്ക് പരിക്കേല്‍പ്പിച്ചശേഷം തടവുകാര്‍ രക്ഷപ്പെടുകയായിരുന്നു. തുടര്‍ന്ന് ബ്ലോക്കിന്റെ ഗേറ്റ് പൂട്ടി. പ്രധാന കവാടത്തില്‍ തടയാന്‍ ശ്രമിച്ച രണ്ട് സുരക്ഷാ ജീവനക്കാരെയും സംഘം ആക്രമിച്ചു. ഇവരില്‍നിന്ന് താക്കോല്‍ കൈക്കലാക്കിയശേഷമാണ് തടവുകാര്‍ പ്രധാന കവാടം തുറന്ന് പുറത്തുകടന്നത്. രക്ഷപ്പെട്ടവരില്‍ മൂന്നുപേര്‍ കൊലക്കേസ് പ്രതികളാണെന്നാണ് വിവരം.

സംഭവമറിഞ്ഞയുടന്‍ മധുര റേഞ്ച് ഐ.ജി ഉള്‍പ്പെടെയുള്ള ഉന്നത പൊലീസ് ഉദ്യോഗസ്ഥര്‍ ജയിലിലെത്തി. തുടര്‍ന്ന് വന്‍ പൊലീസ് സന്നാഹത്തെ വിന്യസിച്ച് തിരച്ചില്‍ ആരംഭിച്ചു. സമീപത്തെ വിവിധ പൊലീസ് സ്‌റ്റേഷനുകളിലേക്ക് വിവരങ്ങള്‍ കൈമാറുകയും പരിശോധന ശക്തമാക്കുകയും ചെയ്തു. കേരളത്തില്‍ ഇടുക്കി ജില്ലയുമായി അതിര്‍ത്തി പങ്കിടുന്ന പ്രദേശമായതിനാല്‍ തടവുകാര്‍ ഇടുക്കിയിലേക്കോ പാലക്കാട് ജില്ലയിലേക്കോ കടക്കാനുള്ള സാധ്യതയും പൊലീസ് കണക്കിലെടുത്തിരുന്നു. ഇതിന്റെ ഭാഗമായി കേരള പൊലീസിന്റെ സഹായവും തേടി. ഇടുക്കിയിലേക്കുള്ള മൂന്ന് പ്രധാന വഴികളില്‍ പരിശോധന ശക്തമാക്കി. നിലവില്‍ 25 പൊലീസ് സംഘങ്ങളെയാണ് രക്ഷപ്പെട്ട തടവുകാരെ കണ്ടെത്തുന്നതിനായി നിയോഗിച്ചിരിക്കുന്നത്. ശേഷിക്കുന്ന നാലുപേരെക്കൂടി പിടികൂടാനുള്ള ശ്രമം ഊര്‍ജിതമായി തുടരുകയാണ്.