വിമാനം റാഞ്ചി ഭീകരാക്രമണം നടത്തുമെന്ന് മൊബൈല്‍ ഫോണിലൂടെ ഭീഷണി സന്ദേശമയച്ച യാത്രക്കാരന്‍ അറസ്റ്റില്‍. ന്യൂജേഴ്‌സിയിലെ നെവാര്‍ക്കിലേക്ക് പുറപ്പെട്ട വിമാനം ലാസ് വെഗാസിലെ ഹാരി റീഡ് അന്താരാഷ്ട്ര വിമാനത്താവളത്തിലാണ് അടിയന്തര ലാന്‍ഡിംഗ് നടത്തി. സംഭവത്തില്‍ 25കാരനായ ഡാന്റേ മില്‍നെ എന്നയാളെ പൊലീസ് അറസ്റ്റ് ചെയ്തു. ശനിയാഴ്ച (ഒക്ടോബര്‍ 24) ലാസ് വെഗാസില്‍നിന്ന് നെവാര്‍ക്കിലേക്ക് പുറപ്പെട്ട യുണൈറ്റഡ് എയര്‍ലൈന്‍സ് വിമാനമായ 1681ലാണ് സംഭവം.

ആറു ജീവനക്കാരും 150 യാത്രക്കാരുമാണ് വിമാനത്തിലുണ്ടായിരുന്നത്. ഭീകരാക്രമണം നടത്തുമെന്ന് ഭീഷണി മുഴക്കിയതിനും ഭീകരപ്രവര്‍ത്തനവുമായി ബന്ധപ്പെട്ട് തെറ്റായ വിവരങ്ങള്‍ പ്രചരിപ്പിച്ചതിനുമുള്ള ഗുരുതര കുറ്റങ്ങളാണ് ഇയാള്‍ക്കെതിരെ ചുമത്തിയിരിക്കുന്നത്. ലാസ് വെഗാസിലെ ക്ലാര്‍ക്ക് കൗണ്ടി ഡിറ്റന്‍ഷന്‍ സെന്ററിലാണ് ഇയാളെ പാര്‍പ്പിച്ചിരിക്കുന്നത്. സംഭവത്തില്‍ അന്വേഷണം ആരംഭിച്ചതായി അമേരിക്കന്‍ ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ (എഫ്.എ.എ) അറിയിച്ചു.

വിമാനം പുറപ്പെടുന്നതിന് തൊട്ടുമുമ്പ് യുവാവ് മൊബൈല്‍ ഫോണിലൂടെ ഭീഷണി സന്ദേശങ്ങള്‍ അയക്കുന്നത് വിമാനത്തിലെ ജീവനക്കാരന്റെ ശ്രദ്ധയില്‍പ്പെടുകയായിരുന്നു. വിമാനം റാഞ്ചുമെന്നും വിമാനം ഇടിച്ചിറക്കുമെന്നുമായിരുന്നു സന്ദേശത്തിലെ പരാമര്‍ശം. സന്ദേശം ആര്‍ക്കാണ് യുവാവ് അയച്ചതെന്ന് വ്യക്തമായിട്ടില്ല. എന്നാല്‍, ഭീഷണി ശ്രദ്ധയില്‍പ്പെട്ട ജീവനക്കാരന്‍ യാത്രക്കാരനുമായി തര്‍ക്കത്തിലേര്‍പ്പെടാതെ വിവരം ഉടന്‍ പൈലറ്റിനെ അറിയിച്ചു. തുടര്‍ന്ന് വിമാനം തിരിച്ചിറക്കാന്‍ തീരുമാനിക്കുകയായിരുന്നു.

വിമാനം പറന്നുയര്‍ന്നതിന് പിന്നാലെ എയര്‍ ട്രാഫിക് കണ്‍ട്രോളറുമായി സംസാരിക്കവെ പൈലറ്റ് സംഭവത്തിന്റെ വിശദാംശങ്ങള്‍ വെളിപ്പെടുത്തി. വിമാനം തട്ടിയെടുക്കുമെന്ന് യാത്രക്കാരന്‍ സന്ദേശമയക്കുന്നത് ജീവനക്കാരന്‍ കണ്ടെന്നും വിവരം അറിയിച്ചതോടെ സുരക്ഷാ നടപടികള്‍ സ്വീകരിച്ച് ലാസ് വെഗാസിലേക്ക് മടങ്ങുകയായിരുന്നെന്നും പൈലറ്റ് പറഞ്ഞു.