നടി അഹാന കൃഷ്ണയുടെ വിവാഹം സെപ്തംബര്‍ 13ന് കോവളത്തെ താജ് വച്ച് നടന്നിരുന്നു. ഛായാഗ്രാഹകന്‍ നിമിഷ് രവിയാണ് വരന്‍. ഇരുവരുടെയും വിവാഹ റിസപ്ഷനില്‍ പങ്കെടുക്കാനാണ് തെന്നിന്ത്യന്‍ താരം ഋഷഭ് ഷെട്ടിയും ഭാര്യ പ്രഗതി ഷെട്ടിയും തിരുവനന്തപുരത്തെത്തിയത്. ശ്രീപദ്മനാഭ സ്വാമി ക്ഷേത്രത്തില്‍ ദര്‍ശനം നടത്തിയ ഋഷഭ് ഷെട്ടിയുടെയും ഭാര്യയുടെയും ചിത്രങ്ങള്‍ പുറത്തുവന്നിരുന്നു.

താന്‍ ഒരു വിവാഹത്തില്‍ പങ്കെടുക്കാനാണ് എത്തിയതെന്ന് ഋഷഭ് ഷെട്ടി ഒരു മാദ്ധ്യമത്തോട് പറഞ്ഞിരുന്നു. ഋഷഭ് ഷെട്ടിയുടെ ഏറ്റവും പുതിയ ചിത്രമായ 'ജയ് ഹനുമാന്റെ' ഛായാഗ്രാഹകന്‍ നിമിഷ് രവിയാണ്. തെന്നിന്ത്യയില്‍ നിന്നുള്ള നിരവധി താരങ്ങള്‍ റിസപ്ഷനില്‍ എത്തിയേക്കുമെന്നാണ് വിവരം. വൈകിട്ട് ആറര മുതല്‍ സുബ്രഹ്മണ്യം ഹാള്‍ ട്രിവാന്‍ഡ്രം ക്ലബില്‍ വച്ചാണ് റിസപ്ഷന്‍ നടക്കുന്നത്. സെപ്തംബര്‍ 13ന് താജ് കോവളത്ത് വച്ചായിരുന്നു വിവാഹം. അഹാന കൃഷ്ണ നായികയായ ലൂക്ക എന്ന ചിത്രത്തിന്റെ ഛായാഗ്രാഹകനും നിമിഷ് രവിയായിരുന്നു. അഹാനയുടെ വീട്ടിലെ എല്ലാ സ്വകാര്യ ചടങ്ങുകളിലും നിറ സാന്നിദ്ധ്യമാണ് നിമിഷ് രവിയും കുടുംബവും. വിവാഹം ചിത്രങ്ങള്‍ നിമിഷോ അഹാനയോ ഇതുവരെ പങ്കുവച്ചിട്ടില്ല.

രാജീവ് രവി സംവിധാനം ചെയ്ത 'ഞാന്‍ സ്റ്റീവ് ലോപസ്' എന്ന ചിത്രത്തിലൂടെ മലയാളത്തില്‍ അരങ്ങേറ്റം കുറിച്ച താരമാണ് അഹാന കൃഷ്ണ. പിന്നീട് ഞണ്ടുകളുടെ നാട്ടില്‍ ഒരിടവേള, പതിനെട്ടാം പടി, അടി, പാച്ചുവും അത്ഭുതവിളക്കും, നാന്‍സി റാണി എന്നീ ചിത്രങ്ങളിലും അഹാന വേഷമിട്ടിട്ടുണ്ട്. 'ലോക' എന്ന ഹിറ്റ് ചിത്രത്തിലും അതിഥി വേഷത്തില്‍ അഹാന എത്തിയിരുന്നു. ലോകയിലെ ഛായാഗ്രഹണം നിര്‍വഹിച്ചത് നിമിഷ് രവിയാണ്. തിയേറ്ററുകളില്‍ ഇപ്പോള്‍ ഹിറ്റായി പ്രദര്‍ശനം തുടരുന്ന നടന്‍ സൂര്യയുടെ 'വിശ്വനാഥ് ആന്‍ഡ് സണ്‍സി'ന്റെ ഛായാഗ്രഹണം നിര്‍വഹിച്ചിരിക്കുന്നതും നിമിഷാണ്.