മനോജ് അന്ന് സിനിമാരംഗത്തൊന്നും എത്തിയിട്ടില്ല. സിനിമാമോഹങ്ങളുമായി നടക്കുന്ന ഒരു യുവാവുമാത്രമായിരുന്നു. മുന്നേറ്റം, തൃഷ്ണ തുടങ്ങിയ സിനിമകളൊക്കെ കഴിഞ്ഞ് കൂടെവിടെ എന്ന സിനിമയും കൂടി മമ്മൂട്ടി ചെയ്തുകഴിഞ്ഞപ്പോള്‍ നായകപദവിയില്‍ മമ്മൂട്ടി എന്ന നടന്‍ തിളങ്ങാന്‍ തുടങ്ങി. ഈ സിനിമകളൊക്കെയും മനോജ് തീയറ്ററില്‍ പോയി കണ്ടു. ആയിടയ്ക്ക് കോട്ടയം ആസ്ഥാനമായുള്ള ഫിലിം ഡിസ്ട്രിബ്യൂട്ടേഴ്‌സും പ്രൊഡ്യൂസേഴ്‌സും മമ്മൂട്ടിയെ നായകനാക്കി സിനിമകളെടുത്തുതുടങ്ങി.

സെഞ്ച്വറി, ജൂബിലി, റോയല്‍, ചെറുപുഷ്പം തുടങ്ങിയ ഫിലിം കമ്പനികളുടെ ഏതാണ്ട് എല്ലാ ചിത്രങ്ങളുടെയും ഷൂട്ടിംഗ് ആയിടയ്ക്ക് കോട്ടയത്തും പരിസരങ്ങളിലുമായിട്ടാണ് നടന്നത്. കാണാമറയത്ത്, രുഗ്മ, സന്ധ്യയ്ക്കുവിരിഞ്ഞ പൂവ്, നാണയം, പിന്‍നിലാവ്, ആള്‍ക്കൂട്ടത്തില്‍ തനിയെ, ഇതാ ഇന്നുമുതല്‍ തുടങ്ങി കുറെ സിനമകളുടെ ഷൂട്ടിംഗ് അന്ന് കോട്ടയത്ത് നടന്നിരുന്നു. ഒരു ദിവസം പെട്ടെന്നാണ് മനോജ് കെ. ജയന്‍ അറിയുന്നത്. കോട്ടയം ടൗണില്‍ നാണയം എന്ന സിനിമയുടെ ഷൂട്ടിംഗ് നടന്നുകൊണ്ടിരിക്കുന്നു. ഐ.വി. ശശിയാണ് സംവിധായകന്‍, മമ്മൂട്ടി നായകനായി അഭിനയിക്കുന്നു. അത് കേട്ടതും മനോജ് ഷൂട്ടിംഗ് ലൊക്കേഷന്‍ തേടി കോട്ടയം ടൗണിലേയ്‌ക്കോടി.

ഷൂട്ടിംഗ് കാണാന്‍ അന്നവിടെ വലിയ ജനക്കൂട്ടമായിരുന്നത്രെ. മമ്മൂട്ടി ഒരു ജീപ്പിന് മുകളിലിരിക്കുന്ന കാഴ്ചകണ്ടു. അന്ന്, ആ നിമിഷത്തിലാണ് മമ്മൂട്ടി എന്ന നടനെ ഞാനാദ്യമായി കാണുന്നതെന്ന് മനോജ് കെ. ജയന്‍ പറഞ്ഞു. ആളുകളുടെ തിരക്ക് കാരണം സീനെടുക്കാന്‍ കഴിയാതെ ബുദ്ധിമുട്ടിയപ്പോള്‍ ലൊക്കേഷന്‍ ഷിഫ്റ്റ് ചെയ്ത് യൂണിറ്റ് മറ്റെവിടെയ്‌ക്കോ പോയി.

മമ്മൂട്ടി എന്ന നടനെ നല്ല രീതിയില്‍ നന്നായി ഒന്ന് കാണാന്‍ കഴിയാത്തതിന്റെ വിഷമത്തോടെ മനോജ് വീട്ടിലേയക്ക് തിരിച്ചുപോകുകയും ചെയ്തു. മമ്മൂട്ടിയെ കാണാനും ഷൂട്ടിംഗ് കാണാനുമുള്ള ആവേശമായിരുന്നു മനോജിന് അന്ന്. മിക്ക ലൊക്കേഷനുകളിലും മനോജ് അന്ന് പോയിട്ടുണ്ട്. ആ കാലത്ത് മമ്മൂട്ടിയുടെ മിക്ക സിനിമകളുടെയും ഷൂട്ടിംഗ് കോട്ടയത്തും പരിസരങ്ങളിലുമായി നടന്നുകൊണ്ടിരുന്നതിനാല്‍ മമ്മൂട്ടിയെ നേരില്‍ കാണാനുള്ള അവസരങ്ങള്‍ എനിക്ക് ധാരാളമായിരുന്നു. അതോടെ മമ്മൂട്ടിയെന്ന നടന്റെ വലിയ ഒരു ഫാനായി ഞാന്‍ മാറുകയും ചെയ്തിരുന്നു.

മമ്മൂട്ടി എന്ന നടന്‍ കോട്ടയംകാരനായതില്‍ ഞാന്‍ അഭിമാനം കൊണ്ടിട്ടുണ്ടെന്നും ആ സമയത്ത് പലപ്പോഴും പലരോടും മമ്മൂട്ടി കോട്ടയംകാരനാണെന്ന് പറഞ്ഞ് ഞാന്‍ വാദിച്ചിട്ടുണ്ട്. മമ്മൂട്ടി എന്ന നടന്റെ വലിയ ഒരു ഫാനായിരുന്നു ഞാനെന്നുമെന്നുള്ള കാര്യങ്ങളൊന്നും ഇതുവരെയും മമ്മൂട്ടിക്കറിയില്ല.

ഞാന്‍ സിനിമയില്‍ വന്നശേഷം മമ്മൂക്കയുമായി പലകാര്യങ്ങളും സംസാരിച്ചിട്ടുണ്ടെങ്കിലും ഇപ്പോള്‍ പറഞ്ഞതൊന്നും മമ്മുക്കയോട് ഞാന്‍ ഇതുവരെ പറഞ്ഞിട്ടില്ല. മണിരത്‌നത്തിന്റെ ദളപതി എന്ന സിനിമയിലാണ് ഞാനും മമ്മുക്കയും ഒന്നിച്ചഭിനയിക്കുന്നതെങ്കിലും മലയാളത്തില്‍ ഞങ്ങള്‍ ഒരുമിച്ചഭിനയിക്കാന്‍ വൈകി എന്നുവേണം പറയുവാന്‍. ഞങ്ങള്‍ ഒരുമിച്ചഭിനയിച്ച ആദ്യ മലയാള സിനിമ സുകൃതമായിരുന്നു. അതിനുശേഷം പല സിനിമകളിലും ഞങ്ങള്‍ ഒരുമിച്ചഭിനയിച്ചിട്ടുണ്ട്. ഫാന്റം, വല്യേട്ടന്‍, വജ്രം, മായാവി, ബിഗ്ബി, പഴശ്ശിരാജ, രാജമാണിക്യം തുടങ്ങി പതിനഞ്ചോളം സിനിമകളില്‍ ഞങ്ങള്‍ ഒരുമിച്ചഭിനയിച്ചിട്ടുണ്ട്.'