കേരളത്തില്‍ ഒരു നടിക്കു നേരെ ആക്രമണം നടന്നതിനു തൊട്ടുപിന്നാലെ ഒരു പൊതുചടങ്ങില്‍ ഉദ്ഘാടകയായി പ്രസംഗിച്ച ലക്ഷ്മി സിനിമയിലെ ചില മോശമായ പ്രവണതകളെക്കുറിച്ചു പരാമര്‍ശിച്ചിരുന്നു.

പ്രസംഗത്തിനു തൊട്ടുപിന്നാലെ ലക്ഷ്മിയെ ഒരു ഇംഗ്ലിഷ് പത്രത്തിന്റെ ലേഖകന്‍ ഫോണില്‍ വിളിച്ചു. അവരോടും ലക്ഷ്മി തന്റെ നിലപാടുകള്‍ വ്യക്തമാക്കി. എന്നാല്‍ പിറ്റേന്ന് പത്രത്തില്‍ വന്ന വാര്‍ത്ത കണ്ട് ലക്ഷ്മി ഞെട്ടി. തനിക്ക് സിനിമാസെറ്റില്‍ ഓരോ ദിവസവും പല തരത്തിലുള്ള പീഡനങ്ങള്‍ ഏറ്റുവാങ്ങേണ്ടി വന്നുവെന്നാണ് പത്രത്തില്‍ വന്നത്. ലക്ഷ്മി പ്രസംഗത്തില്‍ ഒരു സംവിധായകനില്‍ നിന്ന് തനിക്ക് 2008-ലുണ്ടായ ഒരു അനുഭവവും പറഞ്ഞിരുന്നു. അതെല്ലാം കഴിഞ്ഞ ദിവസം നടന്നുവെന്ന മട്ടിലാണ് വാര്‍ത്ത വന്നതെന്ന് ലക്ഷ്മി പറഞ്ഞു. ഇംഗ്ലിഷ് പത്രത്തില്‍ വന്ന കാര്യങ്ങള്‍ മലയാളത്തിലെ ചില മാധ്യമങ്ങളും ഏറ്റെടുത്തതോടെയാണ് വിശദീകരണവുമായി ലക്ഷ്മി രംഗത്തു വന്നത്.'' നമ്മള്‍ നമ്മുടെ ആത്മാഭിമാനവും മൂല്യങ്ങളും പണയപ്പെടുത്താതെ ജോലി ചെയ്താല്‍ നമ്മളെ ആര്‍ക്കും ഒന്നും ചെയ്യാനാകില്ല എന്നാണ് ഞാന്‍ പറഞ്ഞത്. സ്ത്രീകളോട് മോശമായി പെരുമാറുന്നവര്‍ സിനിമയില്‍ മാത്രമല്ല എല്ലാ രംഗത്തുമുണ്ട്. കോര്‍പ്പറേറ്റ് രംഗത്തും മാധ്യമരംഗത്തുമെല്ലാം അങ്ങനെയുള്ളവരുണ്ടാകാം. ഒരു സ്ത്രീ വലിയ വിജയം നേടിയാല്‍ അവര്‍ എന്തൊക്കെയോ കോംപ്രമൈസ് ചെയ്ത് അതു നേടി എന്നു ചിന്തിക്കുന്നത് രോഗാതരമായ മനസ്സിന്റെ ഉടമകളാണ്. നിങ്ങള്‍ ചിലരുടെ ഔദാര്യത്തില്‍ അവസരങ്ങള്‍ നേടിയാല്‍ അത് നിലനില്‍ക്കില്ല. നിങ്ങളുടെ ടാലന്റും കഠിനാധ്വാനവും മാത്രമേ നിലനില്‍ക്കൂ.''-ലക്ഷ്മി പറഞ്ഞു.

എനിക്ക് സിനിമയില്‍ നിന്ന് ദുരനുഭവങ്ങളുണ്ടായിട്ടുണ്ട്. ചെന്നൈയിലെ ഒരു സ്വാധീനമുള്ള ഒരു വ്യക്തി. അദ്ദേഹം പൊതുചടങ്ങില്‍ കാണുമ്പോള്‍ വലിയ അധികാരത്തോടെ തോളത്ത് കയ്യിടും.എനിക്കത് ഇഷ്ടപ്പെട്ടില്ല. എല്ലാവരും എന്നെ അമ്മായെന്നും ലക്ഷ്മിമാഡമെന്നും വിളിക്കുമ്പോള്‍ ഈ വ്യക്തി ലക്ഷ്മി എന്നാണ് വിളിക്കാറ്.! ഞാന്‍ ഒരിക്കല്‍ അത്തരമൊരു ചടങ്ങില്‍ അദ്ദേഹം എന്നെ പേരുവിളിക്കുമ്പോള്‍ ഞാന്‍ ചെറുപ്പമായി തോന്നുന്നുവെന്ന് പറഞ്ഞു. ഞാനതെന്റെ പ്രതിഷേധമായാണ് പറഞ്ഞത്. അയാള്‍ക്കത് മനസ്സിലായില്ല. അയാള്‍ വീണ്ടും തോളില്‍ കയ്യിടാന്‍ വന്നപ്പോള്‍ ഞാന്‍ കൈതട്ടിമാറ്റി. പിന്നെയൊരിക്കലും അദ്ദേഹം അങ്ങനെ പെരുമാറിയിട്ടില്ല. മാത്രമല്ല എന്നെ കാണുമ്പോള്‍ മാഡമെന്നും വിളിക്കുന്നു.മലയാളത്തില്‍ ഒരു പടം ചെയ്യുമ്പോള്‍ ഞാന്‍ മോണിറ്ററിനടുത്ത് സംവിധായകന് അരുകില്‍ ഇരിക്കുകയായിരുന്നു. ആ സംവിധായകനും ഇതുപോലെ കൈ തോളിലിട്ട് ഇഷ്ടം പ്രകടിപ്പിക്കാന്‍ ശ്രമിച്ചു. ഞാന്‍ മാറിയപ്പോള്‍ ഇഷ്ടമല്ലേ എന്നു ചോദിച്ചു.ഞാന്‍ ഇഷ്ടമല്ല എന്നു പറഞ്ഞു.പിന്നെ സെറ്റില്‍ എനിക്ക് കഷ്ടകാലമായിരുന്നു. വെറുതെ ഒന്നു നടക്കുന്ന ടേക്ക് പോലും ഇരുപത്തഞ്ചു പ്രാവശ്യം എടുപ്പിച്ചു. ആദ്യ ഷെഡ്യൂള്‍ കഴിഞ്ഞപ്പോള്‍ ഞാന്‍ എന്റെ നിലപാട് വ്യക്തമാക്കി. സംവിധായകന്‍ മാപ്പു പറയണമെന്ന് ഒപ്പം അഭിനയിച്ചവര്‍ നിലപാടെടുത്തു. പിന്നീട് സംവിധായകന്‍ മാപ്പു പറഞ്ഞു. ചെന്നൈയില്‍ ഇതേ സംവിധായകനെ ഞാന്‍ വര്‍ഷങ്ങള്‍ക്കു ശേഷം കണ്ടപ്പോള്‍ വളരെ ആദരപൂര്‍വം അദ്ദേഹം പെരുമാറി. അന്ന് ഞാന്‍ അങ്ങനെ പെരുമാറിയില്ലായിരുന്നുവെങ്കിലോ?-ലക്ഷ്മി ചോദിച്ചു.

'' എനിക്ക് പ്രായം അന്‍പതു കഴിഞ്ഞു.എന്റെ മക്കള്‍ വിവാഹതിരായി. എനിക്ക് സിനിമയില്‍ നിന്ന് പീഡനങ്ങള്‍ ഇപ്പോഴും ഏല്‍ക്കേണ്ടി വരുന്നുവെന്ന് മാധ്യമങ്ങളില്‍ വരുമ്പോള്‍ ആ നുണപ്രചാരണത്തിനു മറുപടി പറയണമെന്നു തോന്നി ''-ലക്ഷ്മി പറഞ്ഞു.