പ്രേക്ഷകരുടെ പ്രിയതാരമായ തെന്നിന്ത്യന്‍ താരറാണി അനുഷ്‌ക ഷെട്ടി ഇതാദ്യമായി സിനിമയില്‍ നിന്നും ഇടവേള എടുക്കാന്‍ ഒരുങ്ങുന്നതായുള്ള റിപ്പോര്‍ട്ടുകളാണ് ഇപ്പോള്‍ പുറത്തുവന്നിട്ടുള്ളത്. നിലവില്‍ ഏറ്റെടുത്തിട്ടുള്ള പ്രൊജക്ടുകള്‍ പൂര്‍ത്തിയാക്കിയ ശേഷം സിനിമയില്‍ നിന്നും ബ്രേക്കെടുക്കാനാണ് താരം ആലോചിക്കുന്നത്. 

ബാഹുബലി 2-ലെ ദേവസേനയായി തകര്‍ത്തഭിനയിച്ച താരത്തിന്റെ പ്രകടനം കാണാനുള്ള കാത്തിരിപ്പിലാണ് പ്രേക്ഷകര്‍. ബാഹുബലിക്ക് ശേഷം ഭാഗ്മതിയാണ് താരത്തിന്റെ അടുത്ത ചിത്രം. ബാഹുബലിയുടെ പ്രചാരണാര്‍ത്ഥം കൊച്ചിയിലെത്തിയപ്പോഴാണ് താരം ബ്രേക്കെടുക്കുന്നതിനെക്കുറിച്ച് വെളിപ്പെടുത്തിയിട്ടുള്ളത്.അഞ്ചു വര്‍ഷമായി അനുഷ്‌ക ഷെട്ടി സിനിമയിലെത്തിയിട്ട്. ഇതിനിടയില്‍ ഒരിക്കല്‍പ്പോലും സിനിമയില്‍ നിന്ന് താരം ഇടവേള എടുത്തിട്ടില്ല. ചെയ്യുന്ന കഥാപാത്രത്തിനു വേണ്ടി എന്തു ത്യാഗവും ചെയ്യുന്ന താരം വളരെ പെട്ടെന്നു തന്നെയാണ് പ്രേക്ഷകമനം കീഴടക്കിയത്.

സിനിമാ തിരക്കുകള്‍ക്കിടയില്‍ കുടുംബത്തിനായും വ്യക്തിപരമായും സമയം ചെലവഴിക്കാന്‍ കിട്ടാത്തതിനാലാണ് താരം ചെറിയൊരു ബ്രേക്കെടുക്കാന്‍ ഒരുങ്ങുന്നത്. ചില സിനിമയ്ക്ക് വേണ്ടി ശക്തമായ കായികാധ്വാനവും കഠിനാധ്വാനവും വേണ്ടി വന്നതിനാല്‍ വിശ്രമം അത്യാവശ്യമായി വന്നിരിക്കുകയാണെന്നാണ് അനുഷ്‌ക അറിയിച്ചിട്ടുള്ളത്.രുദ്രമാദേവി, ബാഹുബലി തുടങ്ങിയ സിനിമകള്‍ക്കായി വലിയ ശാരീരിക അധ്വാനം വേണ്ടി വന്നിരുന്നു. ഇഞ്ചയിടുപ്പഴകില്‍ പൊണ്ണത്തടിയുള്ള പെണ്‍കുട്ടിയായാണ് അനുഷ്‌ക അഭിനയിച്ചത്. ശരീരഭാരം 80 കിലോയ്ക്ക് മുകളിലായി വര്‍ധിപ്പിച്ചിരുന്നു. ബാഹുബലിക്ക് വേണ്ടിയും ധാരാളം വര്‍ക്കൗട്ട് ചെയ്യേണ്ടി വന്നിരുന്നു. എന്നാല്‍ ഇതിന് വേണ്ടത്ര വിശ്രമം ലഭിച്ചിരുന്നില്ല. അതിനാല്‍ ബ്രേക്കെടുത്ത് വിശ്രമ ജീവിതം നയിക്കാനാണ് താരം ആഗ്രഹിക്കുന്നത്.