കാവ്യ മാധവനോട് പലവട്ടം പറഞ്ഞതാ ജയിലില്‍ വന്ന് കാണരുതെന്ന്. പക്ഷെ കാവ്യ കേട്ടില്ല. അച്ഛനോടും മീനാക്ഷിയോടും ഒപ്പം അവളെത്തി. പക്ഷെ വന്നപ്പോഴോ പിടിച്ചു നില്‍ക്കാനായില്ല.

നടിയെ ആക്രമിച്ച കേസിലെ ആസൂത്രകയായ മാഡം കാവ്യയാണെന്ന പള്‍സര്‍ സുനിയുടെ വെളിപ്പെടുത്തല്‍ വന്നതോടെയാണ് കാവ്യ ദിലീപിനെ കണ്ടത്. ഭര്‍ത്താവിനെ ഏത് വിധേനയും കാണണം എന്ന ആഗ്രഹം അവര്‍ തുറന്നു പ്രകടിപ്പിക്കുന്നത് അങ്ങനെയാണ്. ഇക്കാര്യം അച്ഛനെയും അറിയിച്ചതോടെ ഇന്ന് കാവ്യ ആലുവ ജയിലില്‍ എത്തിയത്. എന്നാല്‍, തന്നെ കാണാന്‍ വരേണ്ടെന്നായിരുന്നു ദിലീപ് നേരത്തെ കാവ്യയോട് പറഞ്ഞിരുന്നത്. ഭര്‍ത്താവിന്റെ ജയില്‍ ജീവിതം നീളുമെന്ന് ഉറപ്പായതോടെയാണ് കാവ്യ ആലുവ ജയിലില്‍ എത്തിയത്.

ജയിലില്‍ എത്തിയ കാവ്യ മാധവന് ദിലീപിനെ കണ്ടപ്പോള്‍ നിയന്ത്രണം വിട്ടു. 56 ദിവസങ്ങള്‍ക്ക് ശേഷമായിരുന്നു കാവ്യ അവസാനമായി ഭര്‍ത്താവിനെ കണ്ടത്. വീട്ടില്‍ നിന്നും ചോദ്യം ചെയ്യലിനായി കൊണ്ടുപോയ ദിലീപിനെ പിന്നീട് പൊലീസ് അറസ്റ്റു ചെയ്യുകയും കോടതിയില്‍ ഹാജരാക്കി റിമാന്‍ഡ് ചെയ്യുകയും ആയിരുന്നു.

ആലുവ ജയിലില്‍ കഴിയുന്ന താരത്തെ കാണാന്‍ കാവ്യ ആദ്യമായാണ് എത്തിയത്. മുമ്പ് അമ്മ വന്നപ്പോള്‍ സൂപ്രണ്ടിന്റെ മുറിയില്‍ വച്ചായിരുന്നു ദിലീപുമായുള്ള കൂടിക്കാഴ്ച്ച നടന്നത്. എന്നാല്‍, ഇത്തവണ കുറച്ചു കൂടി മുന്‍കരുതല്‍ ജയില്‍ അധികൃതര്‍ കൈക്കൊണ്ടു. കാവ്യക്കെതിരെയും അന്വേഷണം നടക്കുന്നുണ്ട്. ഈ സാഹചര്യത്തില്‍ കാവ്യയും മകളും എത്തുമ്പോള്‍ കാണാന്‍ വേണ്ടി ജയിലിലെ പ്രത്യേക ഇടം ഒരുക്കി.

ഇവിടെ വച്ചായിരുന്നു ദിലീപ് കാവ്യയെ കണ്ടത്. ദിലീപിനെ കണ്ട മാത്രയില്‍ കാവ്യ പൊട്ടിക്കരഞ്ഞു. എന്നാല്‍ അക്ഷോഭ്യനായി കാര്യമായ ഭാവവ്യത്യാസങ്ങളില്ലാതെയാണ് ദിലീപ് നിലകൊണ്ടതെന്ന് ജയില്‍ അധികൃതര്‍ നല്‍കിയ വിവരം. കാവ്യയുട അച്ഛന്‍ മാധവനും ഒപ്പമുണ്ടായിരുന്നു. എന്നാല്‍, ജയില്‍ അധികൃതരെ പോലും ഞെട്ടിച്ചത് മീനാക്ഷിയായിരുന്നു. അച്ഛനെ കണ്ടപ്പോഴും കാവ്യ വികാരനിര്‍ഭരമായി പ്രതികരിച്ചപ്പോഴും കാര്യമായ ഭാവമാറ്റങ്ങളില്ലാതെയാണ് മീനാക്ഷി പ്രതികരിച്ചത്. അച്ഛനോട് കാര്യങ്ങള്‍ തിരക്കിയും അച്ഛന്‍ ചോദിച്ച ചോദ്യങ്ങള്‍ക്ക് ഉത്തരം നല്‍കിയും മീനാക്ഷി കാര്യങ്ങള്‍ കൂളായി കൈകാര്യം ചെയ്തു.

അതേസമയം മീനാക്ഷി അച്ഛനെ കാണുന്നത് ഇതാദ്യമായല്ലെന്ന വിവരവും ജയില്‍ അധികൃതര്‍ വ്യക്തമാക്കിയിട്ടുണ്ട്. ഇത് രണ്ടാം തവണയാണ് അച്ഛനെ കാണാന്‍ മീനാക്ഷി എത്തിയത്. മുമ്പ് മാധ്യമങ്ങളുടെ കണ്ണില്‍പെടാതെ ജയിലില്‍ എത്തി മീനാക്ഷി അച്ഛനെ കണ്ടിരുന്നു എന്നാണ് ലഭിക്കുന്ന വിവരം. പള്‍സര്‍ സുനി കാവ്യയുടെ പേര് പറയുകയും ഇതിന് ഉഭോത്ഭലകമായ തെളിവുകള്‍ ലഭിക്കുകയും ചെയ്ത സാഹചര്യത്തിലാണ് കാവ്യ ദിലീപിനെ കാണാന്‍ എത്തിയത് എന്നത് കേസിന് പുതിയ മാനം നല്‍കുന്നുമുണ്ട്.

അതേസമയം കാവ്യയ്ക്ക് കാണാന്‍ അവസരം ഒരുക്കിയതില്‍ നാദിര്‍ഷായുടെ ഇടപെടലും നിര്‍ണായകമായെന്നാണ് അറിയുന്നത്. കാവ്യ ജയിലില്‍ വരേണ്ടെന്ന നിലപാടിലായിരുന്നു ദിലീപ്. ഈ നിലപാട് തിരുത്തുന്നതിനായാണ് കാവ്യ എത്തും മുമ്പ് ഉറ്റചങ്ങാതി കൂടിക്കാഴ്ച്ചക്ക് എത്തിയതും. നാദിര്‍ഷാ ജയിലില്‍ എത്തി കാര്യങ്ങള്‍ ബോധിപ്പിച്ച ശേഷമാണ് എങ്കില്‍ വന്നോട്ടെ എന്ന നിലപാടിലേക്ക് ദിലീപും എത്തിയത്. ഇതോടെയാണ് ഇന്ന് അപ്രതീക്ഷിതമായി കുടുംബം ആലുവ ജയിലില്‍ എത്തിയത്.

കാവ്യയും മീനാക്ഷിയും ജയിലില്‍ എത്തുന്നതിന് മുമ്പ് തന്നെ അങ്കമാലി കോടതി ദിലീപിന്റെ ശ്രാദ്ധത്തിനായി ജാമ്യം അനുവദിച്ചിരുന്നു. മൂന്ന് മണിക്കൂര്‍ അനുമതി നല്‍കിയെങ്കിലും പുറത്തിറങ്ങിയാല്‍ കുടുംബത്തെ കാണാന്‍ സാധിക്കുമോ എന്ന കാര്യത്തില്‍ ഉറപ്പുണ്ടായിരുന്നില്ല. മാത്രമാല്ല, കഴിഞ്ഞ വര്‍ഷം അച്ഛന് ശ്രാദ്ധം അര്‍പ്പിക്കാത്ത ദിലീപ് ഇത്തവണ അതിന് വേണ്ടി കോടതിയെ സമീപിച്ചതിന്റെ ഉദ്ദേശ്യവും സംശയമാണെന്ന വാദം ഉയരുകയും ചെയ്തു. ഈ സാഹചര്യത്തില്‍ കൂടിയായിരുന്നു കാവ്യയും മീനാക്ഷിയും ജയിലില്‍ എത്തിയതും.

മുമ്പ് മീനാക്ഷി അച്ഛനെ കാണാന്‍ എത്തിയതു പോലെ മാധ്യമങ്ങളുടെ കണ്ണുവെട്ടിക്കാം എന്ന ധാരണ ഉണ്ടായിരുന്നെങ്കിലും ഇത്തവണ ആ നീക്കം പാളി. കാവ്യ ജയിലില്‍ എത്തുന്നു എന്ന വിവരം ന്യൂസ് 18 ലേഖകന്‍ അറിഞ്ഞതോടെ രഹസ്യമായി കൂടിക്കാഴ്ച്ച നടത്താനുള്ള നീക്കം പൊളിയുക ആയിരുന്നു. മാധ്യമപ്രവര്‍ത്തകന്‍ പള്‍സര്‍ സുനി പറഞ്ഞ മാഡത്തെ കുറിച്ച് കാവ്യയോട് ചോദിച്ചെങ്കിലും പ്രതികരിക്കാന്‍ നില്‍ക്കാതെ മടങ്ങുകയാണ് കാവ്യ ചെയ്തത്.