രാമലീലയിലെ സംവിധായകന് ഉദയനാണ് താരത്തിന്റെ ഗതിവരുമെന്ന് കരുതിയില്ല
അരുണ് ഗോപി ചിത്രമായ രാമലീല റിലീസിന് തയ്യാറെടുക്കുന്നതിനിടയിലാണ് നായകന് ദിലീപ് അറസ്റ്റിലായത്. നാളുകള് നീണ്ടു നിന്ന അനിശ്ചിതത്വത്തിനൊടുവിലാണ് ചിത്രം റിലീസ് ചെയ്തത്. അഞ്ചു വര്ഷത്തെ കഠിന പ്രയത്നത്തിനൊടുവിലാണ് ആദ്യ ചിത്രവുമായി അരുണ് ഗോപി പ്രേക്ഷകര്ക്ക് മുന്നിലേക്കെത്തിയത്. രാശിയില്ലാത്ത സംവിധായകനായി താന് മാറുമെന്ന ആശങ്കയോടെയാണ് ഈ സംവിധായകന് സിനിമയില് തുടക്കം കുറിച്ചത്. എന്നാല് ആശങ്കകളൊക്കെ അസ്ഥാനത്താക്കി മികച്ച പ്രതികരണം നേടി ചിത്രം മുന്നേറുകയാണ്.
സിനിമ എന്നത് വ്യക്തിയലധിഷ്ഠിതമല്ല. ഉദയനാണ് താരം സിനിമയിലെ രംഗങ്ങള് തന്റെ ജീവിതത്തിലും ആവര്ത്തിക്കുമെന്ന് അരുണ് ഗോപിയെന്ന സിനിമാമോഹി ഒരിക്കലും കരുതിയിരിക്കില്ല. മറ്റു വിഷയങ്ങള് മാറ്റി നിര്ത്തി ഈ ചിത്രത്തെ പ്രേക്ഷകര് ഏറ്റെടുക്കുമെന്നാണ് കരുതുന്നതെന്ന് സംവിധായകന് നേരത്തെ പറഞ്ഞിരുന്നു. ഉദയഭാനുവിന്റെ സിനിമാജീവിതത്തിന് തടസ്സമായി നില്ക്കുന്നത് നായകനായ സരോജ് കുമാറാണെങ്കില് അരുണ് ഗോപിയുടെ ജീവിതത്തില് രാമലീലയിലെ നായകന് ദിലീപിന്റെ അറസ്റ്റും ജയില് ജീവിതവുമാണ് വില്ലനായെത്തിയത്.
അഞ്ചു വര്ഷത്തെ കഠിന പ്രയത്നത്തിനൊടുവിലാണ് സ്വന്തം ചിത്രവുമായി അരുണ് ഗോപി പ്രേക്ഷകര്ക്ക് മുന്നിലെത്തുന്നത്. ആദ്യ പടം പാതിവഴിയില് നിന്നു പോയാല് രാശിയില്ലാത്ത സംവിധായകനെന്ന പേര് അരുണിന് ചാര്ത്തിക്കിട്ടിയേനെ. കുട്ടികളുടെയും കുടുംബ പ്രേക്ഷകരുടെയും സ്വന്തം താരമായ ദിലീപിനെ നായകനാക്കി ചിത്രം ഒരുക്കുന്നതിനിടയില് ഇത്തരമൊരു പ്രതിസന്ധി നേരിടേണ്ടി വരുമെന്ന് അദ്ദേഹം സ്വപ്നത്തില്പ്പോലും കരുതിക്കാണില്ല.
എന്നാല് പ്രതിസന്ധികളെല്ലാം വിജയകരമായി തരണം ചെയ്ത് ചിത്രം തിയേറ്ററുകളിലേക്ക് എത്തിക്കാന് അദ്ദേഹത്തിന് കഴിഞ്ഞു. ഒരുപാട് പ്രതീക്ഷകളോടെയാണ് അരുണ് ഗോപി രാമലീലയുമായി മലയാള സിനിമയില് അരങ്ങേറ്റം കുറിച്ചത്. ദിലീപിന്റെ അറസ്റ്റുമായി ബന്ധപ്പെട്ട വിവാദങ്ങള് തുടരുമ്പോഴും ചിത്രം തിയേറ്ററുകളിലേക്ക് എത്തിക്കാനും പ്രേക്ഷകര്ക്ക് ഇഷ്ടപ്പെടുമെന്ന പ്രതീക്ഷയും അദ്ദേഹത്തിനുണ്ടായിരുന്നു. തിയേറ്ററുകളില് പ്രദര്ശനം തുടരുന്ന രാമലീലയുടെ വിധി പ്രേക്ഷകര് തീരുമാനിക്കട്ടെ.
https://www.facebook.com/Malayalivartha
