മാള്‍ ഒഫ് ട്രാവന്‍കൂറിലെ കല്യാണ്‍ സില്‍ക്ക്സ് ഷോറൂം ഉദ്ഘാടനം ചെയ്യാനെത്തിയ നടന്‍ പൃഥ്വിരാജിനെ വരവേറ്റത് വന്‍ ജനക്കൂട്ടം. പ്രിയതാരത്തെ ഒരുനോക്ക് കാണാനായി രാവിലെ മുതല്‍ ആയിരക്കണക്കിനാളുകളാണ് മാളില്‍ തടിച്ചുകൂടിയത്. മാളിന്റെ പ്രവേശന കവാടത്തില്‍ സജ്ജീകരിച്ച സ്റ്റേജിലേക്കെത്തിയ ആക്ഷന്‍ ഹീറോ പൃഥ്വിരാജിനെ 'ബോലോ പൃഥ്വിരാജ് കീ ജയ്...' എന്ന ആരവത്തോടെയാണ് ആരാധകവൃന്ദം വരവേറ്റത്.

'തിരുവനന്തപുരം എന്റെ നാടാണ്. ഈ കൂടിയവരില്‍ ഒട്ടേറെ പരിചിതമുഖങ്ങളുണ്ട്. പണ്ട് ഹെല്‍മറ്റ് വച്ചില്ലെങ്കില്‍ പൊലീസ് പിടിക്കാത്ത കാലത്ത് ഈവഴിയൊക്കെ കറങ്ങി നടന്നിട്ടുണ്ട്. എറണാകുളത്തെപ്പോലെ ഇവിടെയും ഒരു മാള്‍ വന്നിരുന്നെങ്കിലെന്ന് ഒത്തിരി ആഗ്രഹിച്ചിരുന്നു. ഇപ്പോള്‍, ഇത്രയും മനോഹരമായ മാള്‍ തലസ്ഥാനത്തെത്തിയതിലും അവിടെ ഞാന്‍ കൂടി ഉള്‍പ്പെടുന്ന കല്യാണ്‍ സില്‍ക്ക്സിന്റെ ഷോറൂം ആരംഭിച്ചതിലും അതിയായ സന്തോഷമുണ്ട്' - പൃഥ്വിരാജിന്റെ ഓരോ വാക്കും നിറഞ്ഞ കയ്യടിയോടെ ആരാധകര്‍ ഏറ്റുവാങ്ങി.

പാട്ട് പാടണമെന്നായിരുന്നു ഫാന്‍സിന്റെ ആവശ്യം. പാട്ടുകാരനല്ലെന്ന് പറഞ്ഞ് ഒഴിഞ്ഞുമാറിയെങ്കിലും സദസിന്റെ കൂട്ടായ നിര്‍ബന്ധത്തിന് പ്രിയതാരം വഴങ്ങി. 'പ്രേമമെന്താല്‍ എന്താണു പെണ്ണേ?... ' പൃഥിരാജിന്റെ വരികള്‍ക്ക് പശ്ചാത്തല സംഗീതം ഉയര്‍ന്നു. ജനക്കൂട്ടം ഏറ്റുപാടി. ഡയലോഗ് പറയണമെന്നായിരുന്നു അടുത്ത ഡിമാന്റ്.

സെവന്‍ത് ഡേ സിനിമയിലെ 'കര്‍ണനും നെപ്പോളിയനും ഭഗത്‌സിംഗുമാണെന്റെ ഹീറോസ്..' എന്നു തുടങ്ങുന്ന ഡയലോഗ് ഘനഗംഭീര സ്വരത്തില്‍ പൃഥ്വി പറഞ്ഞപ്പോള്‍ കൈയടികള്‍ ആകാശത്തോളമെത്തി. ആരാധകരുടെ ഫോണ്‍ വാങ്ങി സെല്‍ഫിയെടുത്തും കൈ വീശിയും ഓട്ടോഗ്രാഫ് നല്‍കിയും താരജാടകളില്ലാതെ പൃഥ്വിരാജ് നീങ്ങി. കല്യാണ്‍ സില്‍ക്‌സ് എക്സിക്യൂട്ടീവ് ഡയറക്ടറായ പ്രകാശ് പട്ടാഭിരാമന്റെ ഫോണ്‍ വാങ്ങി ആരാധകര്‍ക്കൊപ്പമുള്ള ഫോട്ടോ എടുക്കാനും പൃഥ്വി സമയം കണ്ടെത്തി.