നടനും സംവിധായകനുമായിരുന്ന ഭാഗ്യരാജ് മരിച്ചപ്പോള്‍ അദ്ദേഹത്തെ അവസാനമായി ഒരു നോക്കു കാണാന്‍ വരാതിരുന്നതിന്റെ കാരണം വെളിപ്പെടുത്തി ഉര്‍വശി. എപ്പോഴും തമാശ പറഞ്ഞു ചിരിക്കുന്ന ഭാഗ്യരാജ് സാറിന്റെ മുഖമാണ് മനസ്സിലുള്ളത്. കോട്ടും സ്യൂട്ടും ധരിച്ച് അഴകോടെ ഓടി നടക്കുന്ന ദൃശ്യം മനസ്സിലുണ്ടെന്നും അദ്ദേഹം മരിച്ചു കിടക്കുന്നത് കാണാനുള്ള ധൈര്യമില്ലെന്നും ഉര്‍വശി പറയുന്നു. ഏറെ അടുപ്പമുണ്ടായിരുന്ന സില്‍ക്ക് സ്മിത മരിച്ചപ്പോഴും നേരില്‍ പോയി കാണാന്‍ ധൈര്യപ്പെട്ടില്ലെന്ന് ഉര്‍വശി വെളിപ്പെടുത്തി.

ഭാഗ്യരാജ് സാറിന്റെ മരണം അറിഞ്ഞ് അദ്ദേഹത്തിന്റെ വീട്ടിലേക്ക് ഇറങ്ങിയെങ്കിലും വഴിമധ്യേ ആ ദൃശ്യം കാണാനുള്ള മനഃശക്തി ഇല്ലാതെ തിരിച്ചു പോരുകയായിരുന്നുവെന്നും ഉര്‍വശി പറഞ്ഞു. അദ്ദേഹത്തിന് ഇഷ്ടമുള്ള കേരള സ്‌റ്റൈല്‍ ഭക്ഷണം ഒരിക്കല്‍പ്പോലും ഉണ്ടാക്കിക്കൊടുക്കാന്‍ കഴിഞ്ഞില്ലല്ലോ എന്നതാണ് ഏക സങ്കടമെന്നും ഉര്‍വശി നിറകണ്ണുകളോടെ കൂട്ടിച്ചേര്‍ത്തു. 'ഗലാട്ട തമിഴ്' എന്ന ചാനലിനു നല്‍കിയ അഭിമുഖത്തിലാണ് ഉര്‍വശി മനസ്സു തുറന്നത്.

ഞാന്‍ ഭാഗ്യരാജ് സാറിനെ അവസാനമായി കാണാന്‍ പോകാതിരുന്നതില്‍ എന്റെ ഭര്‍ത്താവ് എന്നോടു ദേഷ്യപ്പെട്ടു. ഞാന്‍ പറയുന്നത് ആര്‍ക്കും മനസ്സിലാകില്ല എന്നാണ് അദ്ദേഹം പറഞ്ഞത്. എന്നെ ആളുകള്‍ തെറ്റിദ്ധരിക്കും എന്നു പറഞ്ഞു. പക്ഷേ, ആളുകള്‍ എന്തും വിചാരിച്ചോട്ടെ, എനിക്ക് അദ്ദേഹത്തെ അങ്ങനെ കാണാന്‍ കഴിയില്ലെന്ന് ഞാന്‍ തീര്‍ത്തു പറഞ്ഞു.

മരണവാര്‍ത്ത അറിഞ്ഞപ്പോള്‍ ആദ്യം വിചാരിച്ചത് വ്യാജ വാര്‍ത്തയാണെന്നാണ്. ഇങ്ങനെയൊരു വാര്‍ത്ത പ്രചരിപ്പിക്കുന്നവരെ കൊല്ലാനുളള ദേഷ്യമുണ്ടായിരുന്നു. ആദ്യം എനിക്ക് കോള്‍ വരുന്നത് ഒരു മീഡിയയില്‍ നിന്നാണ്. 'ഭാഗ്യരാജ് സര്‍ മരിച്ചു, എന്താണ് താങ്കളുടെ പ്രതികരണം, ഞാന്‍ കണക്ട് ചെയ്യട്ടെ' എന്ന് മുഖത്തടിച്ച പോലെ ചോദിക്കുകയായിരുന്നു. ഞാനപ്പോള്‍ ഒരു സിനിമയുടെ സെറ്റിലായിരുന്നു. എനിക്ക് അത് വിശ്വസിക്കാനായില്ല. നിങ്ങള്‍ ആരുടെ കാര്യമാണ് പറയുന്നത്, പേരൊന്നും മാറിപ്പോയില്ലല്ലോ എന്ന് ഞാന്‍ വീണ്ടും ചോദിച്ചു. അപ്പോഴാണ് അവര്‍ പറയുന്നത് രാവിലെ അദ്ദേഹം പ്രഭാതസവാരിക്ക് പോയി വരുന്നതിന് ഇടയില്‍ ഹൃദയാഘാതം സംഭവിച്ചു എന്ന്. ഞാനാകെ തരിച്ചിരുന്നു പോയി. ഭാരതിരാജ സാറൊക്കെ വയ്യാതെ ഇരിക്കുകയായിരുന്നല്ലോ. അതുകൊണ്ട് അദ്ദേഹം മരിച്ചപ്പോള്‍ അതു പ്രതീക്ഷിച്ചിരുന്നതുകൊണ്ട് ഇത്ര വലിയ ആഘാതമായില്ല. പക്ഷേ, ഭാഗ്യരാജ് സര്‍ അങ്ങനെയായിരുന്നില്ലല്ലോ. എല്ലായിടത്തും ഓടി നടന്നിരുന്ന ഒരു മനുഷ്യന്‍ എല്ലാ പരിപാടികള്‍ക്കും വരും. ഊര്‍വശി പറഞ്ഞു.