കേരള സര്‍വകലാശാല കലോല്‍സവത്തെ പിടിച്ചുകുലുക്കിയ കലാതിലകപ്പട്ട വിവാദത്തിന് കൊഴുപ്പേകാന്‍ സീരിയല്‍താരം മഹാലക്ഷ്മിയും ഗുരുവായ ഉഷ തെങ്ങിന്‍തൊടിയിലും രംഗത്തെത്തി. താന്‍ ആര്‍ക്കും കോഴ കൊടുത്ത് ഫലം അട്ടിമറിക്കാന്‍ ശ്രമിച്ചിട്ടില്ലെന്നും ഏതന്വേഷണവും നേരിടാന്‍ തയ്യാറാണെന്നുമാണ് സീരിയല്‍ താരം കൂടിയായ മഹാലക്ഷ്മി ഫേസ്ബുക്ക് ലൈവിലൂടെ പറഞ്ഞത്. മഹാലക്ഷ്മിയുടെ ഗുരുവായ ഉഷ തെങ്ങിന്‍തൊടിയിലും ലൈവില്‍ പങ്കെടുത്തു.

സീരിയല്‍ നടി കൂടിയായ മഹാലക്ഷ്മിക്ക് കലാതിലക പട്ടം ലഭിക്കാന്‍ മത്സരഫലം തിരുത്തിയെന്ന വിദ്യാര്‍ത്ഥികളുടെ ആരോപണം ഉയര്‍ന്നതോടെയാണ് സംഭവം ചര്‍ച്ചയായത്. കഴിഞ്ഞ നാല് ദിവസമായി കൊല്ലത്ത് നടന്നുവന്നിരുന്ന കലോത്സവം ശനിയാഴ്ച സമാപിക്കാനിരിക്കെയാണ് വിവാദം ഉണ്ടായത്. അവസാന ദിവസം നടന്ന കുച്ചിപ്പുടിയുടെയും കഥാപ്രസംഗത്തിന്റെയും മത്സരഫലത്തെ ചൊല്ലിയായിരുന്നു തര്‍ക്കം. നേരത്തെ ഫലം പ്രഖ്യാപിച്ച ഈയിനങ്ങളില്‍ പിന്നീട് സീരിയല്‍ നടിയായ വിദ്യാര്‍ത്ഥിനിക്ക് വേണ്ടി മത്സരഫലം തിരുത്തിയെന്ന് ആക്ഷേപം ഉയര്‍ന്നു.

തിരുവനന്തപുരം മാര്‍ ഇവാനിയോസ് കോളേജിലെ വിദ്യാര്‍ത്ഥിനിയും സീരിയല്‍ടിവി താരവുമാണ് മഹാലക്ഷ്മി. ഇവര്‍ക്കായി മത്സരഫലം അട്ടിമറിച്ചെന്നാണ് മറ്റു വിദ്യാര്‍ത്ഥികള്‍ ആരോപിച്ചത്. ഇതോടെ മറ്റു കോളേജിലെ വിദ്യാര്‍ത്ഥികള്‍ കലോത്സവ വേദിയില്‍ പരസ്യ പ്രതിഷേധം സംഘടിപ്പിച്ചു. നേരത്തെ ഈ രണ്ട് മത്സരയിനങ്ങളിലും ആദ്യ മൂന്നു സ്ഥാനങ്ങളില്‍ പോലും എത്തിയിരുന്നില്ല മഹാലക്ഷ്മിയെന്നും ഫലം തിരുത്തി ഒന്നാം സ്ഥാനം നല്‍കിയെന്നും ആയിരുന്നു ആക്ഷേപം.

കലോത്സവത്തില്‍ ഇത് കല്ലുകടിയായതോടെ നടി മഹാലക്ഷ്മിക്ക് നല്‍കിയ കലാതിലക പട്ടം തിരിച്ചുപിടിച്ച് പകരം മാര്‍ ഇവാനിയോസിലെ തന്നെ രേഷ്മയെ പുതിയ കലാതിലകമായി പ്രഖ്യാപിച്ച് അധികൃതര്‍ തിരുത്തി.

മഹാലക്ഷ്മിയുടെ ഫേസ്ബുക്ക് ലൈവ് ഇങ്ങനെ

യൂണിവേഴ്‌സിറ്റി കലോല്‍സവം ഇത് എന്റെ അഞ്ചാമത്തെ വര്‍ഷമാണ്.എംഎ ഫൈനല്‍ ഇയറാണ്. ഡിഗ്രി ഫൈനല്‍ ആയിരുന്നപ്പോള്‍ കലാതിലകപ്പട്ടം നേരത്തെ കിട്ടിയതാണ്. അവസാന വര്‍ഷമായതുകൊണ്ട് തന്നെ 7 ഇവന്റ്‌സില്‍ മല്‍സരിക്കുന്നില്ലായെന്ന് ഞാന്‍ കോളേജില്‍ പറഞ്ഞതാണ്. എന്നാല്‍, മാര്‍ ഇവാനിയോസ് കലോല്‍സവത്തില്‍ മുന്‍പന്തിയില്‍ നില്‍ക്കുന്ന കോളേജ് ആയതുകൊണ്ടും അഞ്ചുവര്‍ഷം ഈ കോളേജില്‍ പഠിച്ചതായതുകൊണ്ടും ഗുരുക്കന്മാരുടെ നിര്‍ബന്ധത്തിന് വഴങ്ങിയാണ് 7 മല്‍സരങ്ങളില്‍ പങ്കെടുത്തത്. എനിക്ക് തൃപ്തികരമല്ലാത്ത കുറെ റിസല്‍റ്റ്‌സ് വന്നപ്പോള്‍ അപ്പീലിന് പോയിരുന്നു. സ്‌റ്റേജില്‍ നന്നായി പ്രകടനം കാഴ്ച വയ്ക്കുക എന്നതല്ലാതെ റിസല്‍റ്റിന് പിന്നാലെ പോകണമെന്ന് ചിന്തയുണ്ടായിരുന്നില്ല. അപ്പീലിന് കൊടുക്കുന്നത് കോളേജുകാരാണ്.

പിന്നെ എന്താണ് സംഭവിച്ചതെന്ന് അറിയില്ല. രേഷ്മയും ഞാനും നല്ല ഫ്രണ്ടസാണ്... ബാച്ച് മാറ്റ്‌സാണ്. അവള്‍ എംകോം. ഞാന്‍ എംഎ.ഞാനും അവളും നല്ല ഫ്രണ്ടസാണ്. നിങ്ങള്‍ മാധ്യമങ്ങള്‍ വെറുതെ സത്യം അറിയാതെ പ്രതികരിക്കുകയാണ്. രേഷ്മയ്ക്ക് കലാതിലക പട്ടം കിട്ടുന്നതില്‍ എനിക്ക് സന്തോഷമേയുള്ളു. അപ്പീല്‍ ഇല്ലാതെ തന്നെ എനിക്ക് 15 പോയിന്റാണ് ഉണ്ടായിരുന്നത്. എന്നാല്‍ ചില ചാനലുകള്‍ എനിക്ക് 5 പോയിന്റ് മാത്രമാണുള്ളതെന്ന് കാര്യമറിയാതെ പറഞ്ഞു. ഭരതനാട്യച്ചിന് തേഡ്,മിമിക്രി, കഥാപ്രസംഗം,ഫോക് ഡാന്‍സ് സെക്കന്‍ഡ് െ്രെപസ്,നങ്ങ്യാര്‍ക്കൂത്തിന് ഫസ്റ്റ്. എല്ലാം കൂടി അപ്പീലില്ലാതെ 15 പോയിന്റ് ഉണ്ട്.

രേഷ്മയ്ക്ക് നാല് ഇവന്റ്‌സുണ്ട്. ഗസല്‍, ഹിന്ദുസ്ഥാനി, ക്ലാസിക്കല്‍ മ്യൂസിക്, ലൈറ്റ് മ്യൂസിക് ഇതിനെല്ലാം മല്‍സരിച്ചിട്ട് രേഷ്മയ്ക്ക് 16 പോയിന്റാണുള്ളത്. ഞങ്ങള്‍ക്ക് തന്നെ കിട്ടുന്നതില്‍ സന്തോഷം മാത്രമേയുള്ളു. ഞാന്‍ കലാതിലകത്തിന് വേണ്ടി ലക്ഷ്യമിട്ടല്ല ഇറങ്ങിയത്. ചാനലുകാര്‍ ഇതിനെ വളച്ചൊടിച്ചു.കഥാപ്രസംഗത്തിനും കുച്ചിപുഡിക്കും ഞാന്‍ അപ്പീല്‍ കൊടുത്തതില്‍..ഈ കഥാപ്രസംഗത്തിന് എനിക്ക് സെക്കന്‍ഡ്... കഴിഞ്ഞ വട്ടം ഞാന്‍ കഥാപ്രസംഗം മല്‍സരിച്ചിരുന്നില്ല. അതിന് മുമ്പ് ഫസ്റ്റായിരുന്നു കഥാപ്രസംഗത്തിന്. എല്ലാ വര്‍ഷവും സമ്മാനം കിട്ടുന്ന ഇവന്റാസായതുകൊണ്ടാണ് തൃപ്തികരമല്ലാത്ത ഫലം വന്നപ്പോള്‍ അപ്പീല്‍ പോയത്. കഥാപ്രസംഗം അപ്പീല്‍ പോയപ്പോള്‍,സെക്കന്‍ഡ് ഫസ്റ്റായി. ഒരു െ്രെപസും ഇല്ലാതിരുന്ന റാണി മോനിച്ചന് തേഡും കിട്ടി. തേഡ് െ്രെപസ് കിട്ടിയ കുട്ടിയും ഫസ്റ്റ് െ്രെപസായിരുന്ന മെറിനും... അത് പോലെ കുച്ചിപുഡിക്ക് ഞാന്‍ അപ്പീല്‍ കൊടുത്തപ്പോള്‍ വിദ്യാ വിജയന്‍ അങ്ങനെ ചിലരൊക്കെ എനിക്കെതിരെ തിരിഞ്ഞു. ഞാനെന്താ തെററു ചെയ്തതതെന്ന് മനസ്സിലാകുന്നില്ല.

ഞാന്‍ കോഴ കൊടുത്തെന്നോ, അട്ടിമറിച്ചെന്നോ ആരോപിക്കുന്ന നിങ്ങള്‍ തന്നെ തെളിയിക്കൂ. ഞാന്‍ എന്തു തെറ്റാണ് ചെയ്തതെന്ന്. ഏതന്വേഷണത്തിനും തയ്യാറാണ്. കാരണം എന്റെ നിരപരാധിത്വം എനിക്ക് തെളിയിക്കണം.സത്യം വിളിച്ചുപറയണമെന്നുണ്ട്. എന്നാല്‍ ആരും അത് ശ്രദ്ധിച്ചില്ല. സത്യം അറിയാതെ ഇങ്ങനെ പറയരുത്. അവിടെ കുട്ടികള്‍ ബഹളമുണ്ടാക്കുമ്‌ബോള്‍ ഞാന്‍ നൃത്ത പരിശീലനത്തിലായിരുന്നു. എന്നോട് വിളിച്ച് സ്ഥിരീകരിക്കാതെ വാര്‍ത്ത കൊടുത്തത് ശരിയായില്ല.

ഉഷാ തെങ്ങിന്‍ തൊടിയിലിന്റെ ഫേസ്ബുക്ക് ലൈവ് ഇങ്ങനെ

കലാകുടുംബത്തില്‍ നിന്ന് വന്ന കഴിവുള്ള കലാകാരിക്ക് ഇത്രയും അധിക്ഷേപം നേരിടേണ്ടി വരിക സങ്കടകരമാണ്. കേരള സര്‍വകലാശാല കലോല്‍സവത്തില്‍ ജഡ്ജിമാരെ സ്വാധീനിച്ചും പണം ഒഴുക്കിയുമാണ് കലാതിലക പട്ടം നേടാന്‍ ശ്രമിച്ചതെന്നും മറ്റും കാമ്ബില്ലാത്ത ആരോപണങ്ങള്‍ ചൊരിഞ്ഞു. എന്താണ് സംഭവിച്ചതെന്ന് മഹാലക്ഷ്മിയോട് ആരാഞ്ഞതിന് ശേഷമാണ് മാധ്യമങ്ങള്‍ വാര്‍ത്ത കൊടുക്കേണ്ടിയിരുന്നത്.

സെലിബ്രിറ്റിയായിട്ടുള്ള, ലോകമറിയുന്ന കുഞ്ഞിനെ താറടിച്ച് കാണിക്കുകയാണ്. കിട്ടിയ അവസരം എല്ലാവരും മുതലാക്കിയെന്നതാണ്. ഒരുനാണയമുണ്ടെങ്കില്‍ അതിന് രണ്ടുവശങ്ങള്‍ ഉണ്ട്. കരയുന്ന കുഞ്ഞിനേ പാലുള്ളു എന്നുള്ളതല്ല. ആ കുട്ടിയോട് കൂടു ചോദിക്കാമായിരുന്നു.. എന്താണ് അവിടെ സംഭവിച്ചത്. അവള്‍ ഏഴെണ്ണത്തില്‍ മാറ്റുരച്ചതാണ്. അങ്ങനെ കലാതിലകം കിട്ടണമെന്ന കുട്ടിയാണെങ്കില്‍ അവള്‍ക്ക് രണ്ടെണ്ണത്തില്‍ അവള്‍ക്ക് ഒരു മാര്‍ക്കും കൊടുത്തിട്ടില്ലായിരുന്നു. അങ്ങനെയാണെങ്കില്‍ അതിനൊക്കെ അപ്പീല്‍ പോവില്ലേ?ഒന്നിനും പോയിട്ടില്ല. പക്ഷേ, ഏതോ രണ്ടെണ്ണത്തിന് അപ്പീല്‍ പോയി... ആ കുട്ടിക്ക് അതിന് മാര്‍ക്ക് കിട്ടി. ഒരു പ്രൈസ്പോലും ഇല്ലാത്ത ഈ പറയുന്ന കുട്ടികള്‍ അപ്പീലിന് പോയപ്പോള്‍, അവര്‍ക്ക് തേഡും അതൊക്കെ കിട്ടിയപ്പോള്‍, സെക്കന്‍ഡ് സ്ഥാനത്തുള്ള കുട്ടി അപ്പീലിന് പോയി. അതിലെന്താ തെറ്റ്?

എല്ലാവരും അപ്പീലിന് പോയിട്ടാണ് അവരുടേതായ മാര്‍ക്കുകള്‍ നേടിയെടുക്കുന്നത്. ജഡ്ജിമാര്‍ പറയുന്നതല്ല. സര്‍ക്കാര്‍ തന്നെ ഇരുത്തിയിരിക്കുന്നതാണ് പരാതികള്‍ കേള്‍ക്കാനുള്ള സമിതി. എന്നിട്ട് ആ കുട്ടി അത് തിരുത്തി ഇതു തിരുത്തി... അങ്ങനെ തേജോവധം ചെയ്യുകയാണ് ആ കുട്ടിയെ.ഈ കുട്ടിക്ക് ഇനിയൊരു കലാതിലക പട്ടം കിട്ടിയിട്ട് വേണോ സ്റ്റാറാകാന്‍?ചില ചാനലുകള്‍ കാട്ടിയത് ഒരു സ്ഥാനത്തുമില്ലാതെയാണ് ഈ കുട്ടി അപ്പീലിന് പോയതെന്നാണ്. അതൊന്നും ശരിയല്ല. യഥാര്‍ത്ഥ സ്ഥിതി അറിഞ്ഞിട്ട് മാത്രം വാര്‍ത്തകള്‍ കൊടുക്കുക.

അഞ്ച് പോയിന്റില്‍ നിന്നാണ് മഹാലക്ഷ്മി ഇത്രയും പോയിന്റുകള്‍ നേടിയെടുത്തതെന്നും പറഞ്ഞു. അതുതന്നെ തെറ്റാണ്. 15 പോയിന്റ് നേടിയ കുട്ടിയാണ് മല്‍സരത്തിന് നില്‍ക്കുന്ന്ത്. പിന്നെ ആ കുട്ടി ആരെ സ്വാധീനിച്ചുവെന്നതിന് തെളിവുണ്ടോ?