രജനീകാന്തും കമല്‍ഹാസനും രാഷ്ട്രീയ പാര്‍ട്ടികള്‍ രൂപീകരിച്ചതിന് പിന്നാലെ തമിഴകത്ത് പല താരങ്ങളെയും രണ്ട് പേരും മറ്റ് രാഷ്ട്രീയ പാര്‍ട്ടികളും വലയിലാക്കാനുളള നീക്കങ്ങള്‍ നടക്കുകയാണ്. കൂട്ടത്തില്‍ ഏറ്റവും ഡിമാന്റുള്ളത് നയന്‍താരയ്ക്കാണ്. നയന്‍സിനെ കളത്തിലിറക്കുമെന്നും ഇറക്കണമെന്നും അണിയറ ചര്‍ച്ചകള്‍ നടക്കുന്നുണ്ട്. രജനീകാന്തിന്റെ നായികയായി അഭിനയിച്ചതോടെയാണ് തമിഴകത്ത് നയന്‍സിന്റെ തലവര തെളിഞ്ഞത്. കമല്‍ഹാസനൊപ്പം അഭിനയിച്ചിട്ടുമില്ല. ഡി.എം.കെയുമായും എ.ഐ.ഡി.എം.കെയുമായും അകലത്തിലുമല്ല താരം. അതുകൊണ്ട് നയന്‍സിന്റെ മനസറിയാന്‍ പ്രയാസമാണ്. രാഷ്ട്രീയത്തില്‍ താല്‍പര്യമില്ലെന്നാണ് താരം പറയുന്നത്. എന്നാല്‍ ഭാവിയില്‍ തീരുമാനം മാറ്റിക്കൂടെന്നുമില്ല.

പത്ത് കൊല്ലത്തിലധികമായി തമിഴകത്ത് നമ്പര്‍ വണ്‍ നായികയായി തിളങ്ങുകയാണ് നയന്‍താര. അറം എന്ന സിനിമയില്‍ കളക്ടറായി അഭിനയിച്ചതോടെ താരത്തിന്റെ ഇമേജ് കൂടിയിട്ടുണ്ട്. സാധരണജനങ്ങളുടെ പ്രശ്‌നങ്ങളിലിടപെടുന്ന കളക്ടറുടെ വേഷമായിരുന്നു അറത്തില്‍. സിനിമയുടെ അവസാനരംഗത്ത് കഥാപാത്രം രാഷ്ട്രീയത്തിലേക്ക് വരുന്നതായാണ് ചിത്രീകരിച്ചിരിക്കുന്നത്. ഇത് ടെസ്റ്റ് ഡോസാണെന്നാണ് അണിയറ സംസാരം. ജനങ്ങളുടെ ഇടയില്‍ താരത്തെ കുറിച്ച് നല്ല മതിപ്പാണെങ്കിലും രാഷ്ട്രീയത്തിലിറങ്ങിയാലുള്ള പിന്തുണ എന്താണെന്ന് മനസിലാക്കാനുള്ള തന്ത്രമായാണ് പലരും വിലയിരുത്തുന്നത്. നയന്‍സ് രാഷ്ട്രീയത്തിലെത്തിയാല്‍ അത് തങ്ങള്‍ക്ക് ഗുണകരമാകുമെന്ന് വിശ്വസിക്കുന്നവര്‍ തമിഴ്‌നാട്ടിലുണ്ട് എന്നതാണ് സത്യം.

വിജയ് ശാന്തിക്ക് ശേഷം തമിഴ് ജനത ലേഡി സൂപ്പര്‍സ്റ്റാര്‍ എന്ന പദവി കൊടുത്തത് നയന്‍താരയ്ക്കാണ്. തമിഴ് സിനിമയുടെ ചരിത്രത്തില്‍ ഏറ്റവും കൂടുതല്‍ പ്രതിഫലം വാങ്ങുന്ന നടിയും താരം തന്നെ. സിനിമയിലും അല്ലാതെയും പലരും താരത്തിന്റെ കാലില്‍ തൊട്ട് വണങ്ങാറുണ്ട്. ഇത് വൃത്തികെട്ട സംസ്‌കാരമാണെന്നാണ് നയന്‍സ് പറയുന്നത്. മാതാപിതാക്കളുടെ കാല്‍ക്കല്‍ മാത്രമേ വീഴാവൂ എന്നും താരം പറയുന്നു. തമിഴ്‌നാട്ടിലെ മേല്‍ക്കോയ്മ രാഷ്ട്രീയത്തിനെതിരെയുള്ള താക്കീതാണെന്നാണ് വിലയിരുത്തുന്നത്. എന്തായാലും താരം ആര്‍ക്കൊപ്പമാവും അണിനിരക്കുക എന്ന് കാത്തിരുന്ന് കാണാം.