വനിതാ സെല്ലില് വച്ച് തനിക്ക് മാനസിക പീഡനവും ഭീഷണിയും നേരിടേണ്ടിവന്നെന്ന് നടി അന്സിബ ഹസ്സന്റെ പരാതി
വ്യാജ പരാതിയുടെ മറവില് തൃപ്പൂണിത്തുറ വനിതാ സെല്ലില് വച്ച് തനിക്കെതിരെ മാനസിക പീഡനവും ഭീഷണിയും ഉണ്ടായെന്ന നടി അന്സിബ ഹസ്സന്റെ പരാതിയില് നടി ലക്ഷ്മിപ്രിയ, ഭര്ത്താവ് ജയേഷ്, വനിതാ സെല് സബ് ഇന്സ്പെക്ടര് രേഷ്മ എന്നിവര്ക്കെതിരെ ഹില് പാലസ് പൊലീസ് കേസെടുത്തു. ആദ്യഘട്ടത്തില് ഈ പരാതി അന്വേഷിച്ച പൊലീസ് കേസെടുക്കാന് സാധിക്കില്ലെന്ന് ചൂണ്ടിക്കാണിച്ച് റിപ്പോര്ട്ട് നല്കിയിരുന്നു. എന്നാല് പൊലീസിന്റെ ഈ നിലപാടിനെ ചോദ്യം ചെയ്തുകൊണ്ട് അന്സിബ തൃപ്പൂണിത്തുറ മജിസ്ട്രേറ്റ് കോടതിയെ സമീപിക്കുകയായിരുന്നു.
അന്സിബയുടെ താല്പര്യങ്ങള്ക്ക് വിരുദ്ധമായി, 'ഇരുപക്ഷവും സംസാരിച്ച് പ്രശ്നങ്ങള് രമ്യമായി പരിഹരിച്ചു' എന്ന് സബ് ഇന്സ്പെക്ടര് സ്റ്റേഷന് റെക്കോര്ഡില് എഴുതിച്ചേര്ക്കുകയും നടിയെ ഭീഷണിപ്പെടുത്തി അതില് ബലമായി ഒപ്പുവയ്പ്പിക്കുകയും ചെയ്തുവെന്നാണ് പരാതി. മലയാളം, തമിഴ് സിനിമകളില് പ്രശസ്തയായ തന്റെ വ്യക്തിത്വത്തിനും പ്രശസ്തിക്കും ഗുരുതരമായ ദോഷം വരുത്താന് പ്രതികള് പരസ്പരം ഒത്തുകളിച്ചതായും എഫ്.ഐ.ആറില് വ്യക്തമാക്കുന്നു.
തുടര്ന്ന് കോടതി നേരിട്ട് അന്സിബയുടെ മൊഴി രേഖപ്പെടുത്തുകയും, പരാതിയില് കൃത്യമായ അന്വേഷണം നടത്തി കേസെടുക്കാന് തൃപ്പൂണിത്തുറ പൊലീസിന് കര്ശന നിര്ദ്ദേശം നല്കുകയുമായിരുന്നു. കോടതി നിര്ദ്ദേശപ്രകാരം ഭാരതീയ ന്യായ സംഹിതയിലെയും കേരള പൊലീസ് ആക്ടിലെയും എട്ടോളം വകുപ്പുകള് ചുമത്തിയാണ് നിലവില് കേസെടുത്തിട്ടുള്ളത്. വരും ദിവസങ്ങളില് കേസുമായി ബന്ധപ്പെട്ട അടുത്ത ഘട്ട നടപടികളിലേക്ക് പൊലീസ് കടക്കും.
കഴിഞ്ഞ ഡിസംബറില് അന്സിബ, ലക്ഷ്മി പ്രിയയുടെ ഫോണിലേക്ക് ഒരു വാട്സാപ്പ് സന്ദേശം അയച്ചിരുന്നു. ഇത് ലക്ഷ്മി പ്രിയയുടെ ഭര്ത്താവ് ജയേഷ് കാണാനിടയാവുകയും ഇവരുടെ ദാമ്പത്യജീവിതത്തില് പ്രശ്നങ്ങള് ഉണ്ടാവുകയും ചെയ്തു. ഈ വിഷയത്തില് ലക്ഷ്മി പ്രിയ വനിതാ സെല്ലില് നല്കിയ പരാതി പരിഹരിക്കാനെന്ന വ്യാജേനയാണ് കഴിഞ്ഞ ജനുവരി 30ന് അന്സിബയെ വനിതാ സെല്ലിലേക്ക് വിളിച്ചുവരുത്തിയത്.
സ്റ്റേഷനിലെത്തിയ അന്സിബയെ അരമണിക്കൂറോളം കാത്തുനിര്ത്തിയ ശേഷം ക്യാബിനിലേക്ക് വിളിച്ചുവരുത്തി ഒരു മണിക്കൂറോളം ചോദ്യം ചെയ്തു. ചോദ്യം ചെയ്യലിനിടയില് നടിക്കെതിരെ ക്രിമിനല് കേസെടുത്ത് ജയിലിലടയ്ക്കുമെന്ന് സബ് ഇന്സ്പെക്ടര് ഭീഷണിപ്പെടുത്തിയതായും എഫ്.ഐ.ആറില് പറയുന്നു. തുടര്ന്ന് സ്ഥലത്തെത്തിയ മറ്റ് പ്രതികളുടെ സാന്നിധ്യത്തിലും ചോദ്യം ചെയ്യല് തുടര്ന്നു. !ഒന്നാം പ്രതിയായ ലക്ഷ്മിപ്രിയയും മൂന്നാം പ്രതിയായ വനിത എസ്ഐയുടെ സാന്നിധ്യത്തില് അന്സിബയെ ചോദ്യം ചെയ്തു. ഇതിനിടെ ലക്ഷ്മിപ്രിയയുടെ ഭര്ത്താവിനോട് നിര്ബന്ധിച്ച് ഫോണിലൂടെ ക്ഷമ ചോദിപ്പിക്കുകയും ചെയ്തു.
https://www.facebook.com/Malayalivartha
