ഇളയരാജയുടെ ജന്മദിനത്തോടനുബന്ധിച്ച് സംഘടിപ്പിച്ച സംഗീത പരിപാടിക്കിടെ വേദിയില് വെള്ളം നല്കിയ ആളോട് കോപിച്ച് ഇളയരാജ, കാലില് തൊട്ട് മാപ്പുചോദിച്ച് ജീവനക്കാരന്
സംഗീത ലോകത്തിന് അകത്തും പുറത്തും ഇളയരാജയുടെ ദേഷ്യം ഏറെ പ്രസിദ്ധമാണ്. സംഗീതത്തിന്റെ കാര്യത്തില് ഒരു വിട്ടുവീഴ്ചയ്ക്കും അദ്ദേഹം തയ്യാറാകാറില്ല. അദ്ദേഹത്തിന്റെ ജന്മദിനത്തോടനുബന്ധിച്ച് സംഘടിപ്പിച്ച സംഗീത പരിപാടിക്കിടെ പൊതുവേദിയില്വച്ച് സുരക്ഷാ ഉദ്യോഗസ്ഥനെ വഴക്കുപറയുന്ന ഇളയരാജയുടെ വിഡിയോയാണ് വൈറലാകുന്നത്.
വേദിയിലുണ്ടായിരുന്ന ഗായകര്ക്ക് കുടിക്കാന് വെള്ളം കൊണ്ടുകൊടുത്ത ജീവനക്കാരനെ തിരിച്ചു വിളിച്ച് വേദിയില് നിര്ത്തി മൈക്കിലൂടെയായിരുന്നു ഇളയരാജയുടെ ശകാരം. 'താങ്കളോട് ആരെങ്കിലും വെള്ളം ആവശ്യപ്പെട്ടിട്ടാണൊ ഇവിടെ കൊണ്ടുവന്ന് വിതരണം ചെയ്തത്' എന്നായിരുന്നു ഇളയരാജ ചോദിച്ചത്.
മൈക്കിലൂടെയുള്ള ഈ വാക്കുകള്ക്കുമുന്നില് ജീവനക്കാരന് ആകെ പരിഭ്രമിച്ചു. താന് സാധാരണയായി ചെയ്തു വരുന്ന ജോലിയാണ് ഇതെന്നുള്ള ജീവനക്കാരന്റെ മറുപടിയില് ഇളയരാജ സംതൃപ്തനായില്ല. തുടര്ന്ന് ഇളയരാജയുടെ കാല്തൊട്ട് ഇയാള് ക്ഷമ ചോദിക്കുകയായിരുന്നു.
പണം നല്കിയെത്തുന്ന കാണികള്ക്ക് അസൗകര്യമുണ്ടാക്കുന്ന ഇത്തരം പ്രവൃത്തികള് നല്ലതല്ലെന്നായിരുന്നു ഇളയരാജ പിന്നീട് ഇതേക്കുറിച്ച് പറഞ്ഞത്. സംഭവത്തിന്റെ വിഡിയോ ദൃശ്യങ്ങള് ഇതിനോടകം തന്നെ വൈറലായി കഴിഞ്ഞു. എസ്.പി ബാല സുബ്രഹ്മണ്യം, യേശുദാസ് തുടങ്ങിയ ഗായകരെല്ലാം പങ്കെടുത്ത പരിപാടിയായിരുന്നു ഇളയരാജയുടെ 75-ാം ജന്മദിന ആഘോഷം.
നേരത്തെ തന്റെ പാട്ടുകള് പൊതുവേദിയില് ആലപിച്ച എസ്.പി ബാലസുബ്രഹ്മണ്യത്തിനെതിരെ ഇളയരാജ വക്കീല് നോട്ടീസ് അയച്ചിരുന്നു. കൂടാതെ 96 എന്ന സിനിമയില് തന്റെ പാട്ടുകള് ഉപയോഗിച്ചതിനേയും അദ്ദേഹം വിമര്ശിച്ചിരുന്നു. തന്റെ പാട്ടുകള് ഉപയോഗിച്ചതിനു കാരണം സംഗീത സംവിധായകനു സമാന നിലവാരമുള്ള പാട്ടുകളുണ്ടാക്കാന് കഴിവില്ലാത്തതുകൊണ്ടാണെന്ന് അദ്ദേഹം തുറന്നടിച്ചിരുന്നു.
https://www.facebook.com/Malayalivartha