സൂപ്പര്‍സ്റ്റാര്‍ രജനികാന്തിന്റെ 'ജയിലര്‍ 2' സിനിമയുടെ ട്രെയിലര്‍ പുറത്തുവിട്ട് അണിയറ പ്രവര്‍ത്തകര്‍. ഒക്ടോബര്‍ 15 ന് ചിത്രം ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും. നേരത്തെ വന്‍ വിജയം നേടിയ 'ജയിലറി'ന്റെ രണ്ടാം ഭാഗമാണ് 'ജയിലര്‍ 2'. നെല്‍സണ്‍ ദിലീപ്കുമാര്‍ സംവിധാനം ചെയ്യുന്ന ചിത്രം സണ്‍ പിക്‌ചേഴ്‌സാണ് ബിഗ് ബഡ്ജറ്റില്‍ ഒരുക്കിയിരിക്കുന്നത്. രജനികാന്തിനൊപ്പം സുരാജ് വെഞ്ഞാറമൂട്, ജാക്കി ഷെറോഫ്, മിഥുന്‍ ചക്രവര്‍ത്തി, ഹൃത്വിക് റോഷന്‍, മോഹന്‍ലാല്‍, ശിവരാജ്കുമാര്‍, വിജയ് സേതുപതി, എസ്.ജെ. സൂര്യ, യോഗി ബാബു, വിദ്യ ബാലന്‍, മിര്‍ണ, പൂര്‍ണ, നോറ ഫത്തേഹി തുടങ്ങി വന്‍ താരനിരയും അണിനിരക്കുന്നുണ്ട്.

തമിഴ് സിനിമയിലെ ഏറ്റവും വലിയ ബോക്‌സ്ഓഫീസ് ഹിറ്റായി 'ജയിലര്‍ 2' മാറുമെന്നാണ് ആരാധകരുടെ പ്രതീക്ഷ. ചിത്രം 1000 കോടിയിലേറെ രൂപ കളക്ഷന്‍ നേടുമെന്ന പ്രതീക്ഷയും ആരാധകര്‍ സോഷ്യല്‍ മീഡിയയില്‍ പങ്കുവയ്ക്കുന്നുണ്ട്. അനിരുദ്ധിന്റെ പശ്ചാത്തല സംഗീതത്തിന്റെ അകമ്പടിയോടെ ആക്ഷനും കോമഡിയും നിറഞ്ഞതാണ് രണ്ടാം ഭാഗത്തിന്റെ ട്രെയിലര്‍. പതിവ് സ്‌റ്റൈലില്‍ രജനികാന്ത് എത്തുന്ന രംഗങ്ങളാണ് ട്രെയിലറിലെ പ്രധാന ആകര്‍ഷണം.

എസ്.ജെ. സൂര്യയും വിദ്യ ബാലനും ശ്രദ്ധേയമായ സാന്നിദ്ധ്യമാണ് ട്രെയിലറില്‍ കാഴ്ചവയ്ക്കുന്നത്. തുടര്‍ന്ന് മോഹന്‍ലാലിന്റെയും ശിവരാജ്കുമാറിന്റെയും സാന്നിദ്ധ്യത്തോടെ ആക്ഷന്‍ രംഗങ്ങള്‍ക്ക് വേഗം കൂടുന്നു. രജനികാന്തിന്റെ മാസ് രംഗങ്ങളും ട്രെയിലറില്‍ നിറഞ്ഞുനില്‍ക്കുന്നുണ്ട്. ആക്ഷനും മാസ് രംഗങ്ങള്‍ക്കുമൊപ്പം കോമഡിക്കും പ്രാധാന്യം നല്‍കുന്ന ചിത്രമായിരിക്കും 'ജയിലര്‍ 2' എന്ന സൂചനയാണ് ട്രെയിലര്‍ നല്‍കുന്നത്.