മനുഷ്യരാശിയെ അത്യധികം ഭയാനകപ്പെടുത്തിയിരുന്ന എയ്ഡ്‌സ് രോഗത്തെ പ്രതിരോധിക്കാനുള്ള നിര്‍ണായക വഴിത്തിരിവ് സൃഷ്ട്ച്ചുകൊണ്ട് ശാസ്ത്രലോകത്തിന്റെ പുതിയ കണ്ടെത്തല്‍. എയ്ഡ്‌സിന് കാരണമാകുന്ന ഹ്യൂമന്‍ ഇമ്മ്യുണോ ഡിഫിഷ്യന്‍സി വൈറസ് ഒളിച്ചിരിക്കുന്ന കേന്ദ്രങ്ങള്‍ കണ്ടെത്താനായി എന്നതാണ് ശാസ്ത്രലോകത്തെ ആഹ്ലാദിപ്പിക്കുന്നത്. ശരീരത്തിന്റെ രോഗപ്രതിരോധ ശേഷിയെ തകര്‍ക്കുകയാണ് എച്ച്‌ഐവി ചെയ്യുന്നത്. അങ്ങനെ മറ്റു രോഗങ്ങള്‍ ബാധിച്ചായിരിക്കും മരണം സംഭവിക്കുക. എന്നാല്‍ നിലവില്‍ എച്ച്‌ഐവിയെ പ്രതിരോധിച്ചു നിര്‍ത്താനുള്ള മരുന്നുകള്‍ വിപണിയിലുണ്ട്. അവ തുടര്‍ച്ചയായി ഉപയോഗിച്ചാല്‍ ശരീരത്തിലെ ഈ വൈറസുകളുടെ വളര്‍ച്ച തടയാനുമാകും. പക്ഷേ വില കൂടിയ മരുന്നുകള്‍ തുടര്‍ച്ചയായി ഉപയോഗിക്കേണ്ടി വരും. എപ്പോഴെങ്കിലും മരുന്ന് തടസ്സപ്പെട്ടാല്‍ ആഴ്ചകള്‍ക്കകം എയ്ഡ്‌സ് വൈറസ് വീണ്ടും തലപൊക്കും.

മരുന്നിന്റെ നിരന്തരമായ ഉപോയോഗത്തെതുടര്‍ന്ന് എച്ച്‌ഐവി ഒളിച്ചിരിക്കുന്നത് എവിടെയാണെന്ന് നേരത്തെതന്നെ കണ്ടെത്തിയിരുന്നു. എന്നാല്‍ ഏതെല്ലാം ടി കോശങ്ങളെയാണ് എച്ച്‌ഐവി ബാധിച്ചിരിക്കുന്നത് എന്നറിയാന്‍ യാതൊരു വഴിയുമുണ്ടായിരുന്നില്ല. ടി കോശങ്ങളെ 'ഹൈജാക്ക്' ചെയ്ത് രോഗിയുടെ ഡിഎന്‍എയിലേക്ക് വൈറസിന്റെ ജീനുകളെ ചേര്‍ക്കുകയാണ് പതിവ്. അതോടെ ടി കോശങ്ങള്‍ എച്ച്‌ഐവിയുടെ 'രഹസ്യത്താവള'വും ആയി മാറും. ഇവയെ തിരഞ്ഞു കണ്ടുപിടിക്കാന്‍ ഏറെ ബുദ്ധിമുട്ടാണ്. കഴിഞ്ഞ 20 വര്‍ഷമായി ഗവേഷകര്‍ ഇതിനുള്ള വഴി തേടുന്നു. ഈ പ്രശ്‌നത്തിനൊരു പരിഹാരമാണ് ഒരുകൂട്ടം ഫ്രഞ്ച് ഗവേഷകര്‍ കണ്ടെത്തിയത്. എച്ച്‌ഐവി ബാധിച്ച ടി കോശങ്ങളുടെ പുറത്ത് ഒരു പ്രത്യേകതരം പ്രോട്ടീന്‍ തന്മാത്രയുടെ സാന്നിധ്യമാണ് അവര്‍ തിരിച്ചറിഞ്ഞത്. പക്ഷേ എച്ച്‌ഐവി ഒളിച്ചിരിക്കുന്ന ടി കോശങ്ങളില്‍ പകുതിയോളം എണ്ണത്തില്‍ മാത്രമേ സിഡി32എ പ്രോട്ടീന്‍ കാണപ്പെടുന്നുള്ളൂവെന്ന വെല്ലുവിളിയുമുണ്ട്. ഈ സാഹചര്യത്തില്‍ കൂടുതല്‍ എയ്ഡ്‌സ് രോഗികളില്‍ നിന്ന് രക്തസാംപിളുകള്‍ ശേഖരിച്ച് പരിശോധനയ്‌ക്കൊരുങ്ങുകയാണ് ഗവേഷകര്‍.

സിഡി32എ എന്നറിയിപ്പെടുന്ന ഈ പ്രോട്ടീന്‍ എച്ച്‌ഐവി ബാധിക്കാത്ത ടി കോശങ്ങളിലോ എച്ച്‌ഐവി സജീവമായി കാണപ്പെടുന്ന ടി കോശങ്ങളിലോ ഉണ്ടാകില്ല എന്ന പ്രത്യേകതയുമുണ്ട്. അതായത് എച്ച്‌ഐവി ഒളിച്ചിരിക്കുന്ന ടി കോശങ്ങളെ കൃത്യമായി ഈ 'ബയോമാര്‍ക്കറി'ലൂടെ 'സ്‌പോട്ട്' ചെയ്യാം. എയ്ഡ്‌സ് രോഗികളുടെ രക്തത്തില്‍ എച്ച്‌ഐവി ഒളിച്ചിരിക്കുന്ന ടി കോശങ്ങളെ ആദ്യമേ കണ്ടെത്തിയാല്‍ അത് ചികിത്സയിലും ഏറെ ഗുണം ചെയ്യുന്നതാണ്. ചികിത്സയുടെ ചെലവ് കുറയുമെന്ന ആശ്വാസവുമുണ്ട്. എയ്ഡ്‌സ് ബാധിച്ച 12 പേരുടെ രക്തസാംപിളെടുത്ത് അവയില്‍ ഈ 'ബയോമാര്‍ക്കറി'ന്റെ സാന്നിധ്യം തിരിച്ചറിയുകയും ചെയ്തു. നിലവില്‍ ലോകത്തില്‍ 3.67 കോടിയോളം പേര്‍ക്ക് എച്ച്‌ഐവി ബാധിച്ചിട്ടുണ്ടെന്നാണു കണക്ക്. അവരില്‍ 1.7 കോടി പേര്‍ക്കുമാത്രമേ എയ്ഡ്‌സിനെ പ്രതിരോധിക്കാനുള്ള ആന്റിറെട്രോവിയല്‍ തെറപ്പി ലഭിക്കുന്നുള്ളൂ.