നീണ്ടകരയിലെ വള്ളം മറിഞ്ഞ അപകടത്തിൽ കാണാതായ ഗൗതം കൃഷ്ണയെന്ന 26 കാരനായ യുവാവിനായുള്ള തിരച്ചിൽ പതിനൊന്നാം ദിവസത്തിലേക്ക് കടക്കുകയാണ്. ഈ നിർണായക ഘട്ടത്തിൽ, നാവികസേനയുടെ രക്ഷാദൗത്യത്തിന് അടിയന്തര കൈത്താങ്ങുമായി എത്തിയിരിക്കുകയാണ് മാതാ അമൃതാനന്ദമയി മഠം. കേന്ദ്രമന്ത്രി സുരേഷ് ഗോപിയുടെയും ജില്ലാ കളക്ടറുടെയും അഭ്യർത്ഥനപ്രകാരം ഒരൊറ്റ രാത്രികൊണ്ടാണ് അമൃതപുരി എൻജിനീയറിങ് കോളേജ് ഗ്രൗണ്ടിൽ മഠം അത്യാധുനിക ഹെലിപാഡ് നിർമ്മിച്ച് സൈന്യത്തിന് കൈമാറിയത്.

'ആ അമ്മയുടെ സങ്കടം എന്റെ സ്വന്തം സങ്കടമാണ്, മകനെ കണ്ടെത്താൻ ഏതറ്റം വരെയും ഞാൻ പോകും' എന്ന് കേന്ദ്രമന്ത്രി സുരേഷ് ഗോപി ഗൗതമിന്റെ അമ്മയ്ക്ക് നേരിട്ട് ഫോണിൽ ഉറപ്പുനൽകിയിട്ടുണ്ട്. കൊച്ചിയിൽ നിന്നുള്ള പ്രത്യേക നാവികസേനാ ഡൈവിംഗ് സംഘവും കോസ്റ്റ് ഗാർഡും സംയുക്തമായി ആഴക്കടലിൽ തിരച്ചിൽ തുടരുകയാണ്.