കേരളത്തില്‍ അര്‍ബുദബാധിതരുടെ എണ്ണത്തില്‍ വര്‍ദ്ധനവ്... അര്‍ബുദബാധിതര്‍ക്ക് രോഗനിര്‍ണയം മുതല്‍ വിവിധ ചികിത്സകള്‍ വരെ ലഭ്യമാക്കാനൊരുങ്ങി സംസ്ഥാനത്തെ സര്‍ക്കാര്‍ ആശുപത്രികള്‍
അര്‍ബുദബാധിതര്‍ക്ക് രോഗനിര്‍ണയം മുതല്‍ വിവിധ ചികിത്സകള്‍ വരെ ലഭ്യമാക്കാനൊരുങ്ങി സംസ്ഥാനത്തെ സര്‍ക്കാര്‍ ആശുപത്രികള്‍. സംസ്ഥാന സര്‍ക്കാറിന്റെ പുതിയ അര്‍ബുദ നയത്തിന്റെ ഭാഗമായി ആശുപത്രികളെ നാല് വിഭാഗമായി തിരിച്ചാണ് പദ്ധതി നടപ്പാക്കുന്നത്. കേരളത്തില്‍ അര്‍ബുദബാധിതരുടെ എണ്ണം ഓരോ വര്‍ഷവും കൂടിവരുന്ന സാഹചര്യത്തിലാണ് സമഗ്ര പ്രതിരോധപദ്ധതിക്ക് രൂപം നല്‍കിയത്. ഓരോ വര്‍ഷവും 58,000 പേര്‍ പുതുതായി അര്‍ബുദത്തിന് ചികിത്സ തേടുന്നെന്നാണ് കണക്ക്.
ഘട്ടംഘട്ടമായി എല്ലാ സര്‍ക്കാര്‍ ആശുപത്രികളിലും അര്‍ബുദബാധിതര്‍ക്ക് മെച്ചപ്പെട്ട ചികിത്സ ഉറപ്പാക്കുകയാണ് ലക്ഷ്യം. നിലവില്‍ ഭൂരിഭാഗം പ്രാഥമികാരോഗ്യകേന്ദ്രങ്ങളിലും അര്‍ബുദനിര്‍ണയത്തിന് സംവിധാനമില്ല. രോഗം സ്ഥിരീകരിച്ചാല്‍തന്നെ ചികിത്സ സംവിധാനങ്ങളും പരിമിതം. പുതിയ പദ്ധതിയുടെ ഭാഗമായി സര്‍ക്കാര്‍ ആശുപത്രികളെ എല്‍ ഒന്ന്, എല്‍ രണ്ട്, എല്‍ മൂന്ന്, എല്‍ നാല് എന്നിങ്ങനെ നാലായി തിരിക്കും. റീജനല്‍ കാന്‍സര്‍ സെന്റര്‍, മലബാര്‍ കാന്‍സര്‍ സന്റെര്‍ തുടങ്ങി ഉന്നത നിലവാരത്തിലുള്ള ചികിത്സ കേന്ദ്രങ്ങളാണ് ആദ്യവിഭാഗത്തില്‍.
രണ്ടാമത്തേതില്‍ മെഡിക്കല്‍ കോളജുകളും മൂന്നാമത്തേതില്‍ ജില്ല ആശുപത്രികളും നാലാമത്തേതില്‍ പ്രാഥമികാരോഗ്യകേന്ദ്രങ്ങളും ഉള്‍പ്പെടുന്നു. ഓരോ വിഭാഗത്തിലെയും ആശുപത്രികളില്‍ നിശ്ചിത ചികിത്സ സംവിധാനങ്ങളും അടിസ്ഥാന സൗകര്യങ്ങളും ഉണ്ടായിരിക്കണമെന്നാണ് നയത്തില്‍ നിഷ്‌കര്‍ഷിക്കുന്നത്. ഉദാഹരണത്തിന് ജില്ല ആശുപത്രികളില്‍ കീമോതെറപ്പി സൗകര്യം നിര്‍ബന്ധമാണ്. ആശുപത്രികളില്‍ നിലവിലുള്ളതും പുതുതായി ഏര്‍പ്പെടുത്തേണ്ടതുമായ സൗകര്യങ്ങളെക്കുറിച്ച് പഠിക്കാനും ആവശ്യമായ സംവിധാനങ്ങള്‍ സജ്ജീകരിക്കാനും ടാറ്റ ട്രസ്റ്റുമായി സര്‍ക്കാര്‍ ധാരണയിലെത്തിയിട്ടുണ്ട്. ലോകാരോഗ്യ സംഘടനയുടെ സഹായത്തോടെയും ആരോഗ്യവകുപ്പിന്റെ പങ്കാളിത്തത്തോടെയും ആവിഷ്‌കരിച്ച പദ്ധതി തിരുവനന്തപുരം റീജനല്‍ കാന്‍സര്‍ സന്റെറും കൊച്ചിന്‍ കാന്‍സര്‍ റിസര്‍ച് സന്റെറും ചേര്‍ന്നാണ് നടപ്പാക്കുന്നത്.
https://www.facebook.com/Malayalivartha
