കെ.എം ഷാജി എം.എല്‍.എക്ക് നേരെ വധഭീഷണിയുമായി മുബൈയില്‍ നിന്നും ഗുണ്ടാ സംഘം. തന്നെ വധിക്കാന്‍ ഗൂഢാലോചന നടന്നെന്നും കണ്ണൂര്‍ പാപ്പിനിശ്ശേരിയിലെ ചിലര്‍ ഇതിനായി മുംബൈയിലെ ഗുണ്ടാ സംഘത്തെ ബന്ധപ്പെട്ടെന്നും കാണിച്ചു കെ.എം.ഷാജി എംഎല്‍എ മുഖ്യമന്ത്രിക്കും ഡിജിപിക്കും പരാതി നല്‍കി. പാപ്പിനിശ്ശേരിയിലെ വ്യക്തി മുംബൈയിലെ ഗുണ്ടാ സംഘാംഗവുമായി ഫോണില്‍ സംസാരിച്ചതിന്റെ ശബ്ദരേഖയുള്‍പ്പെടെയാണു പരാതി നല്‍കിയത്.

കണ്ണൂരിലെ ചില ഗുണ്ടാസംഘങ്ങളുടെ തര്‍ക്കത്തിന്റെ ഫലമായാണ് വധഭീഷണിയുടെ വിവരങ്ങള്‍ തനിക്കു ലഭിച്ചതെന്നും കെ.എം.ഷാജി, മുഖ്യമന്ത്രി പിണറായി വിജയന് നല്‍കിയ കത്തില്‍ പറയുന്നു. ഗൂഢാലോചനയുടെ ശബ്ദരേഖയടക്കം ലഭിച്ചിട്ടുണ്ട്. നേരത്തെയുണ്ടായ ഭീഷണികളുടെ തുടര്‍ച്ചയായാണ് പുതിയ ഭീഷണി.

മുംബൈയിലെ ഗുണ്ടാസംഘങ്ങളുമായി ബന്ധമുള്ള കണ്ണൂര്‍ പാപ്പിനിശ്ശേരി സ്വദേശിയായ തേജസ് എന്നയാളാണ് ഭീഷണിക്ക് പിന്നില്‍. ഇയാളുടെ ഫോട്ടോയും ഗുണ്ടാസംഘങ്ങളുമായി സംസാരിച്ചു എന്നു പറയപ്പെടുന്ന ശബ്ദരേഖയും മുഖ്യമന്ത്രിക്ക് നല്‍കിയ പരാതിയില്‍ കൈമാറി. സമഗ്രമായ അന്വേഷണം നടത്തണമെന്നും കെ.എം.ഷാജി ആവശ്യപ്പെട്ടു. നിലപാടുകളുടെ പേരിലാണ് ഭീഷണിയെന്ന് കെ.എം ഷാജി പറഞ്ഞു. ഓഡിയോ ക്ലിപ്പില്‍ വധ ഗുഢാലോചന വ്യക്തമായിട്ടുണ്ട്. സംസാരിക്കുന്ന ആളുകള്‍ക്ക് രാഷ്ട്രീയ ബന്ധമുണ്ട്. ടി. പി ചന്ദ്രശേഖരന്‍ വധക്കേസിലെ പ്രതികളെ ഒളിപ്പിച്ചവര്‍ക്ക് ഇതുമായി ബന്ധമുണ്ടെന്ന് കരുതുന്നു.

ബോംബെ ബന്ധമുള്ള പാപ്പിനിശേരിക്കാരന്‍ ആണ് ക്വട്ടേഷന്‍ നല്‍കിയതെന്നാണ് അറിയുന്നത്. വധഭീഷണിക്ക് പിന്നില്‍ സി.പി.എം ആണെന്ന് പറയുന്നില്ല. ഓഡിയോ അടക്കം മുഖ്യമന്ത്രിക്കും സ്പീക്കര്‍ക്കും ഡിജിപിക്കും പരാതി നല്‍കി. പ്രതിപക്ഷ നേതാവിനെ നേരില്‍ കണ്ടുവെന്നും കെ.എം ഷാജി പറഞ്ഞു.


എപ്രില്‍ മാസത്തില്‍ സോഷ്യല്‍മീഡിയയിലൂടെയും കെഎം ഷാജി എംഎല്‍എക്ക് വധഭീഷണി ലഭിച്ചിരുന്നു. അന്നും ഡിജിപിക്ക് പരാതി നല്‍കിയിരുന്നു. എംഎല്‍എയുടെ സെക്രട്ടറി സ്‌ക്രീന്‍ഷോട്ടുകള്‍ സഹിതം നേരിട്ട് ഡിജിപി ഓഫീസില്‍ എത്തിയാണ് പരാതി നല്‍കിയത്. ഇതിന്റെ അടിസ്ഥാനത്തില്‍ ഡിജിപിയുടെ നിര്‍ദ്ദേശമനുസരിച്ച് കോഴിക്കോട് ചേവായൂര്‍ പൊലീസെത്തി എംഎല്‍എയില്‍ നിന്നും വിശദാംശങ്ങള്‍ ശേഖരിച്ചു. എന്നാല്‍ അതിലും നടപടികള്‍ ഒന്നും പോലീസ് സ്വീകരിച്ചിരുന്നില്ല. അതിന് പിന്നാലെയാണ് വീണ്ടും കെ.എം ഷാജിക്കെതിരെ വധഭീഷണിയുണ്ടായിരിക്കുന്നതെന്നതും ശ്രദ്ധേയമാണ്.