ഇന്തൊനീഷ്യയിലെ സുലവേസി ദ്വീപില്‍ അതിതീവ്ര ഭൂചലനം. ഇന്നു പുലര്‍ച്ചെ ഒരു മണിയോടെയാണ് ഭൂകമ്പം ഉണ്ടായത്. റിക്ടര്‍ സ്‌കെയിലില്‍ 6.2 തീവ്രത രേഖപ്പെടുത്തിയ ഭൂചലനം ഏഴു സെക്കന്‍ഡ് നീണ്ടുനിന്നു. അതേസമയം സുനാമി മുന്നറിയിപ്പ് പ്രഖ്യാപിച്ചിട്ടില്ല. ഏഴു പേര്‍ മരിച്ചതായും 24 പേര്‍ക്ക് പരിക്കേറ്റുവെന്നുമാണ് ആദ്യം റിപ്പോര്‍ട്ടുകള്‍ പുറത്തെത്തിയത്. ഇതിനു പിന്നാലെയാണ് മരണസംഖ്യയും പരിക്കേറ്റവരുടെയും സംഖ്യ ഉയര്‍ന്നത്. നിരവധി കെട്ടിടങ്ങള്‍ക്ക് കേടുപാടുകള്‍ സംഭവിച്ചതിനു പിന്നാലെ താമസക്കാര്‍ സുരക്ഷിത സ്ഥാനങ്ങളിലേക്ക് മാറിയിട്ടുണ്ട്.

മജെനെ സിറ്റിക്ക് ആറുകിലോമീറ്റര്‍ വടക്കുകിഴക്കാണ് ഭൂകമ്പത്തിന്റെ പ്രഭവകേന്ദ്രം. രണ്ടു ഹോട്ടലുകള്‍, ആശുപത്രി, ഗവര്‍ണറുടെ ഓഫീസ്, ഒരു മാള്‍, നിരവധി കെട്ടിടങ്ങള്‍ തുടങ്ങിയവ ഭൂകമ്പത്തെ തുടര്‍ന്ന് തകര്‍ന്നവയില്‍ ഉള്‍പ്പെടുന്നു. ഭൂകമ്പത്തില്‍ തകര്‍ന്ന ആശുപത്രിയില്‍ പന്ത്രണ്ടില്‍ അധികം രോഗികളും ജീവനക്കാരും കുടുങ്ങിക്കിടക്കുകയാണ്. പരിഭ്രാന്തരായ പ്രദേശവാസികള്‍ സുരക്ഷ തേടി വീടുകളില്‍നിന്ന് പുറത്തിറങ്ങിയോടി.

ഒരു ഹോട്ടലിനും വെസ്റ്റ് സുലവേസി ഗവര്‍ണറുടെ ഓഫിസിനും സാരമായ കേടുപാടുകള്‍ സംഭവിച്ചതായും വൈദ്യുതി വിതരണം തടസ്സപ്പെട്ടതായും ദുരന്ത നിവാരണ ഏജന്‍സി അറിയിച്ചു. മണിക്കൂറുകള്‍ക്ക് മുന്‍പ് ഇവിടെ 5.9 തീവ്രത രേഖപ്പെടുത്തിയ ഭൂചലനത്തില്‍ നിരവധി വീടുകള്‍ക്ക് നാശനഷ്ടമുണ്ടായി.

2018 യില്‍ മജനെ ദ്വീപുകള്‍ക്ക് സമീപമുള്ള പാലു ദ്വീപില്‍ 6.2 രേഖപ്പെടുത്തിയ ഭൂചലനത്തെ തുടര്‍ന്ന് ശക്തമായ സുനാമിയുണ്ടാകുകയും ആയിരക്കണക്കിന് ജീവനുകള്‍ അപഹരിക്കുകയും ചെയ്തിയിരുന്നു. എന്നാല്‍ ഇപ്പോഴത്തെ ഭൂചലനത്തെ തുടര്‍ന്ന് സുനാമി മുന്നറിപ്പില്ലാത്തത് ആശ്വാസം നല്‍കുന്നതാണ്. ഇന്തൊനീഷ്യ ദ്വീപുകളില്‍ ഭൂചലനവും സുനാമിയും സ്ഥിരം സംഭവമായി മാറിയിരിക്കുകയാണ്.

2019 യില്‍ ഇന്തൊനീഷ്യയില്‍ ഉണ്ടായ ഭൂകമ്പത്തില്‍ പിഞ്ചുകുട്ടിയുള്‍പ്പടെ 20 പേര്‍ മരിച്ചിരുന്നു. മാലുകു ദ്വീപിലായിരുന്ന അന്ന് ഭൂകമ്പം. നൂറോളം പേര്‍ക്ക് പരിക്കേറ്റതായും റിപ്പോര്‍ട്ടുണ്ടായിരുന്നു. മണ്ണിടിച്ചിലിനെ തുടര്‍ന്നും ഒരാള്‍ മരിച്ചു. റിക്ടര്‍ സ്‌കെയിലില്‍ 6.5 തീവ്രത രേഖപ്പെടുത്തിയ ഭൂകമ്പമാണുണ്ടായത്. അന്നും കെട്ടിടങ്ങള്‍ നിലംപതിക്കുന്നതു കണ്ട് ആളുകള്‍ പരിഭ്രാന്തരായി തെരുവിലൂടെ ഇറങ്ങി ഓടുകയായിരുന്നു. നിരവധി കെട്ടിടങ്ങളും ആരാധനാലയങ്ങളും തകര്‍ന്നിരുന്നു.