പോലീസിന്റെ ബാരിക്കേഡുകള് ഇടിച്ചു തകര്ത്തു; കര്ഷകരുടെ ട്രാക്ടര് റാലി ആരംഭിച്ചു; കര്ഷക റാലിക്ക് നേരെ പോലീസ് കണ്ണീര്വാതകം പ്രയോഗിച്ചു; മുന്കൂര് നിശ്ചയിച്ചിരുന്നതിലും നേരത്തെ കര്ഷക മാര്ച്ച് ആരംഭിച്ചു; ഡല്ഹിയില് കനത്ത ഗതാഗതകുരുക്ക്, സംഘര്ഷാവസ്ഥ
കേന്ദ്രസര്ക്കാരിന്റെ കാര്ഷിക നിയമങ്ങളില് പ്രതിഷേധിച്ച് സമരം നടത്തുന്ന കര്ഷകരുടെ ട്രാക്ടര് റാലി ആരംഭിച്ചു. പോലീസ് സ്ഥാപിച്ച ബാരിക്കേഡുകള് കര്ഷകര് ട്രാക്ടര് ഉപയോഗിച്ച് തകര്ത്ത് മുന്നോട്ട് നീങ്ങി. റിപ്പബ്ലിക് ദിനത്തില് അവകാശ പോരാട്ട മുദ്രാവാക്യങ്ങള് ഉയര്ത്തി ആരംഭിച്ച കര്ഷക മാര്ച്ച് പോലീസ് തടഞ്ഞു. പോലീസും കര്ഷകരും നേര്ക്കുനേര് നിലയുറപ്പിച്ചിരിക്കുകയാണ്. കര്ഷകരെ നിയന്ത്രിക്കാന് പോലീസ് കണ്ണീര്വാതകം പ്രയോഗിച്ചു. മുന്കൂര് നിശ്ചയിച്ചിരുന്നതിലും നേരത്തെയാണ് കര്ഷക മാര്ച്ച് ആരംഭിച്ചത്.
റിപ്പബ്ലിക്ക് ദിന പരേഡിന് ശേഷം റാലി നടത്താനാണ് അനുമതി നല്കിയതെങ്കിലും നേരത്തെ നിശ്ചയിച്ചിരുന്ന സമയത്തെക്കാള് കര്ഷകര് തങ്ങളുടെ പ്രതിഷേധം ആരംഭിക്കുകയായിരുന്നു. നേരത്തെ, സിംഘു, തിക്രി അതിര്ത്തികളില് ബാരിക്കേഡുകള് മറികടന്ന് ഡല്ഹിയിലേക്കു പ്രവേശിച്ച കര്ഷകരെ പിന്തിരിപ്പിക്കാനുള്ള പോലീസ് ശ്രമം പരാജയപ്പെട്ടു. തുടര്ന്ന് ഇവര് സഞ്ജയ് ഗാന്ധി ട്രാന്സ്പോര്ട് നഗറില് പ്രവേശിച്ചു. അവിടെ ബാരിക്കേഡ് സ്ഥാപിച്ച് പോലീസ് മാര്ച്ച് തടഞ്ഞു.
രാജ്യ തലസ്ഥാനമൊട്ടാകെ പൊലീസ് കനത്ത സുരക്ഷയാണ് ഏര്പ്പെടുത്തിയിരിക്കുന്നത്. ഡല്ഹിയിലും ഹരിയാനയിലുമായി ആറ് മേഖലകളിലാണ് ട്രാക്ടറുകള് ഒരേസമയം റാലി നടത്തുന്നത്. ഡല്ഹി പോലീസ് മൂന്ന് റൂട്ടുകളും പരിശോധിക്കുകയും സുരക്ഷാ ക്രമീകരണങ്ങള് ശക്തമാക്കുകയും ചെയ്തിട്ടുണ്ട്. പഞ്ചാബ്, ഹരിയാന, രാജസ്ഥാന്, മദ്ധ്യപ്രദേശ്, ഉത്തര്പ്രദേശ്, ഉത്തരാഖണ്ഡ്, തമിഴ്നാട്, കേരളം തുടങ്ങിയ സംസ്ഥാനങ്ങളില് നിന്നുളള കര്ഷകരാണ് റാലിയില് അണിചേരുന്നത്.
ഒരു ലക്ഷത്തിലധികം ട്രാക്റ്ററുകള് ദില്ലിയിലേക്ക് ഉരുളുമെന്ന് കര്ഷകസംഘടനകള് അവകാശപ്പെടുന്നു. ഓരോ അതിര്ത്തിയില് നിന്നും അയ്യായിരം ട്രാക്റ്ററുകള്ക്കാണ് അനുമതിയെന്നാണ് പൊലീസ് വ്യക്തമാക്കിയിരിക്കുന്നത്. അതല്ല, ഒരു ലക്ഷത്തിലധികം ട്രാക്റ്ററുകള് അണിനിരക്കുമെന്നും കര്ഷകസംഘടനകള് അറിയിക്കുന്നു.
പോലീസ് നേരത്തേ നിശ്ചയിച്ച ട്രാക്ടര് പരേഡ് റൂട്ട് മാപ്പിലൂടെ യാത്ര അനുവദിക്കുന്നില്ലെന്ന് കര്ഷകര്. ഇതോടെ ഡല്ഹിയില് കടുത്ത ഗതാഗതനിയന്ത്രണം രൂപപ്പെട്ടു. സഞ്ജയ് ഗാന്ധി ട്രാന്സ്പോര്ട്ട് ജങ്ഷനില് ബാരിക്കേഡ് വച്ചു. കര്ഷകര് ഡല്ഹിലേക്ക് ഒഴുകിയെത്തുകയാണ്. ഇത്രയധികം സമരക്കാരെ ഉള്ക്കൊള്ളാനുള്ള ഇടമുണ്ടോ എന്നതാണ് മറ്റൊരു പ്രധാനപ്പെട്ട പ്രശ്നം.
https://www.facebook.com/Malayalivartha
