കെട്ടിട നിര്‍മാണ രംഗത്ത് അപകടങ്ങള്‍ ഒഴിവാക്കി തൊഴിലാളികളുടെ സുരക്ഷ ഉറപ്പാക്കാന്‍ 'സീറോ ആക്‌സിഡന്റ് കണ്‍സ്ട്രക്ഷന്‍ ചലഞ്ചുമായി' ദുബായ് മുനിസിപ്പാലിറ്റി. കോണ്‍ട്രാക്ടിങ് കമ്പനികള്‍ക്കും കെട്ടിട നിര്‍മാതാക്കള്‍ക്കുമാണ് ആറ് മാസത്തെ ചലഞ്ച് ഒരുങ്ങുന്നത്. സുരക്ഷാ നിയമങ്ങള്‍ ലംഘിക്കാതെ, അപകടങ്ങളില്ലാതെ ഏറ്റവും കൂടുതല്‍ സമയം ജോലി ചെയ്യുകയാണ് ചലഞ്ച് മുന്നോട്ടു വെക്കുന്ന വെല്ലുവിളി .

ദുബായ് മുനിസിപ്പാലിറ്റിക്ക് കീഴില്‍ രജിസ്റ്റര്‍ ചെയ്തിരിക്കുന്ന ചുരുങ്ങിയത് 30 തൊഴിലാളികളെങ്കിലുമുള്ള കമ്പനികള്‍ക്ക് ഇത് ബാധകമാണ്. 1000 കമ്പനികളെങ്കിലും ചലഞ്ചിന് കീഴില്‍ വരുമെന്നാണ് കരുതുന്നത്. ഒക്ടോബര്‍ ഒന്നിന് ആരംഭിക്കുന്ന ചലഞ്ചിന്റെ കാലാവധി അടുത്ത വര്‍ഷം മാര്‍ച്ച് 31 വരെ നീളും. പരിശോധന കര്‍ശനമാക്കുന്നതിലും നടപടികള്‍ ഗുണകരമാകും. സുരക്ഷ സ്വന്തം ഉത്തരവാദിത്വം ആയി ഏറ്റെടുക്കല്‍ ഇതാണ് ചലഞ്ചിന്റെ ലക്ഷ്യമെന്ന് മുനിസിപ്പാലിറ്റിയുടെ കെട്ടിട നിയന്ത്രണ വിഭാഗം തലവന്‍ അബ്ദുല്ല അലി മുഹമ്മദ് പറഞ്ഞു. എല്ലാ കെട്ടിട നിര്‍മാണ സൈറ്റുകളിലും പോയി ഇതിനാവശ്യമായ സാങ്കേതിക നിര്‍ദേശവും പരിശീലനവും കോണ്‍ട്രാക്ടിങ് കമ്പനികള്‍ക്ക് നല്‍കുമെന്നും അദ്ദേഹം പറഞ്ഞു.

വിജയികള്‍ക്ക് ലോക തൊഴിലാളിദിനത്തില്‍ നിരവധി ആനുകൂല്യങ്ങളും സമ്മാനങ്ങളും നല്‍കും. 22,000 കെട്ടിടങ്ങളാണ് ദുബായില്‍ നിലവില്‍ നിര്‍മാണത്തിലിരിക്കുന്നത്. തൊഴിലാളികള്‍ക്കും സ്ഥാപനങ്ങള്‍ക്കുമിടയില്‍ സുരക്ഷാവബോധം ശാസ്ത്രീയമായി വര്‍ധിപ്പിക്കാനുള്ള അവസരമാണ് മുനിസിപ്പാലിറ്റിയുടെ പുതിയ പദ്ധതി.