ദുബായിയുടെ അഭിമാനത്തിന് ഒമ്പതാണ്ട്. ദുബായിലെ പ്രമുഖ പൊതുഗതാഗത സംവിധാനമായ ദുബായ് മെട്രോ ഒന്‍പതു വര്‍ഷം പൂര്‍ത്തിയാക്കുന്നു. നിര്‍മാണത്തിന്റെയും, പരിപാലനത്തിന്റെയും, സേവനത്തിന്റെയും കാര്യത്തില്‍ ലോകത്തിനു തന്നെ മാതൃകയാകുയാണ് ദുബായ് മെട്രോ.
യുഎഇ വൈസ് പ്രസിഡന്റും, പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ ദീര്‍ഘ വീക്ഷണത്തിന്റെയും, ഇച്ഛാശക്തിയുടെയും പ്രതീകമാണ് ദുബായ് മെട്രോ. 2009 സെപ്റ്റംബര്‍ 9 രാത്രി ഒന്‍പതു മണിക്ക് ഷെയ്ഖ് മുഹമ്മദ് ദുബായ് മെട്രോയിലെ ആദ്യ യാത്രക്കാരനായി. ആധുനിക സാങ്കേതിക വിദ്യയും, സുരക്ഷാ സംവിധാനങ്ങളും ഇഴ ചേര്‍ത്ത ദുബായ് മെട്രോ കഴിഞ്ഞ വര്‍ഷം ഇരുനൂറ് മില്യണിലേറെ യാത്രക്കാര്‍ ഉപയോഗപ്പെടുത്തി എന്നാണ് കണക്ക്.
കൃത്യമായ സമയക്രമം പാലിച്ച് ഓടുന്ന മെട്രോ സര്‍വീസ്, പരിസ്ഥിതി സംരക്ഷണത്തിന്റെ കാര്യത്തിലും വലിയ സംഭാവനകള്‍ ചെയ്യുന്നുണ്ട്. പൊതുഗതാഗത സംവിധാനത്തിലേക്ക് ആളുകളെ ആകര്‍ഷിക്കുന്നതിലൂടെ ദുബായ് നിരത്തുകളിലെ തിരക്ക് കുറക്കാനും ദുബായ് മെട്രോ സഹായിക്കുന്നു. ചുവപ്പ്, പച്ച പാതകളില്‍ 49 സ്‌റ്റേഷനുകളാണ് ഇന്ന് ദുബായ് മെട്രോക്കുള്ളത്. 2020 എക്‌സ്‌പോയുടെ ഭാഗമായുള്ള വികസന പ്രവര്‍ത്തനങ്ങള്‍ നടക്കുകയാണ്. ജപ്പാനിലെ പ്രശസ്തമായ മിത് സുബിഷി കോര്‍പ്പറേഷന്‍ നേതൃത്വം നല്‍കുന്ന ദുബായ് റാപിഡ് ലിങ്ക് എന്ന വിവിധ കമ്പനികളുടെ കൂട്ടായ്മക്കാണ് ദുബായ് മെട്രോയുടെ നിര്‍മാണത്തിന്റെയും, പരിപാലനത്തിന്റെയും ചുമതല. വൃത്തിയുടെ കാര്യത്തിലും ഏറെ ശ്രദ്ധയും, അതിനായുള്ള കര്‍ശന നിയന്ത്രണങ്ങളും ദുബായ് മെട്രോയില്‍ ഉണ്ട്. ട്രെയിനുകള്‍ക്കുള്ളില്‍ ചൂയിങ്കം ചവക്കാനോ, ഭക്ഷണ പാനീയങ്ങള്‍ കഴിക്കാനോ പാടില്ല. മെട്രോ സ്‌റ്റേഷനുകളില്‍ ഉറങ്ങുന്നതും നിയമ വിരുദ്ധമാണ്. ഇത്തരത്തില്‍ ഏറെ ശ്രദ്ധയോടെ പരിപാലിക്കപ്പെടുന്ന ദുബായിയുടെ സ്വന്തം പൊതു ഗതാഗത സംവിധാനമായ ദുബായ് മെട്രോ അതുകൊണ്ടു തന്നെ യാത്രകകര്‍ക്ക് ഏറെ പ്രിയപ്പെട്ടതുമാകുന്നു.