നാശംവിതച്ച മാങ്ഖുട്ട് ചുഴലിക്കാറ്റ് ഹോങ്കോങ്ങിലേക്കും ദക്ഷിണ ചൈനയിലേക്കും നീങ്ങി. ചുഴലിക്കാറ്റിനെ തുടര്‍ന്ന് ചൈനയില്‍ 24.5 ലക്ഷം ആളുകളെ മാറ്റിപ്പാര്‍പ്പിച്ചു. 400 വിമാന സര്‍വിസുകള്‍ റദ്ദാക്കി. തെക്കുകിഴക്കന്‍ മേഖലയിലെ ഗ്വാങ്‌ഡോങ് പ്രവിശ്യയില്‍ മണ്ണിടിച്ചിലുണ്ടായി. ഞായറാഴ്ച വൈകീട്ടാണ് ചുഴലിക്കാറ്റ് ചൈനീസ് തീരം തൊട്ടത്. മണിക്കൂറില്‍ 165 കിലോമീറ്ററാണ് കാറ്റിന്റെ വേഗം. 48,000 മത്സ്യബന്ധന ബോട്ടുകള്‍ തിരിച്ചുവിളിച്ചു. 29,000ത്തിലേറെ നിര്‍മാണ മേഖലകളിലെ ജോലി നിര്‍ത്തിവെച്ചു.

632 വിനോദ സഞ്ചാരയിടങ്ങളും അടച്ചുപൂട്ടി. ചുഴലിക്കാറ്റ് ദക്ഷിണ ചൈനയില്‍ കടുത്ത നാശംവിതക്കാന്‍ സാധ്യതയുണ്ടെന്ന് നാഷനല്‍ മീറ്റിയറോളജിക്കല്‍ സന്റെര്‍ മുന്നറിയിപ്പു നല്‍കി. ഗ്വാങ്‌ഡോങ്ങിനെ കൂടാതെ ഹൈനാന്‍, ഗ്വാങ്‌സി ഷുവാങ് തുടങ്ങിയ സ്വയംഭരണ പ്രദേശങ്ങളിലാണ് ചുഴലിക്കാറ്റ് കൂടുതല്‍ നാശംവിതക്കുക. ഈ പ്രവിശ്യകളില്‍ വ്യാപാരസ്ഥാപനങ്ങളും സ്‌കൂളുകളും അടച്ചു. ഗ്വാങ്‌ഡോങ്ങില്‍ ഒഴിപ്പിക്കുന്നവര്‍ക്കായി 3777 അഭയകേന്ദ്രങ്ങള്‍ സജ്ജമാക്കി. തുറമുഖ നഗരങ്ങളില്‍ സ്ഥിതിഗതികള്‍ നിരീക്ഷിക്കാന്‍ സൈന്യത്തെ അയച്ചു. രക്ഷാപ്രവര്‍ത്തനത്തിനായി 1000 ബോട്ടുകളും ഏര്‍പ്പാടാക്കി. ഹോങ്കോങ്ങും ചുഴലി ഭീതിയിലാണ്. ചുഴലിക്കാറ്റ് ഹോങ്കോങ് തീരത്തെത്തിയപ്പോള്‍ ഉണ്ടായ അപകടങ്ങളില്‍ നൂറോളം പേര്‍ക്ക് പരിക്കേറ്റു. ഇവിടെ അലര്‍ട്ട് ലെവല്‍ 10ലേക്ക് ഉയര്‍ത്തി. നഗരത്തിന്റെ പലഭാഗത്തും അതിശക്തമായ കാറ്റുവീശാന്‍ സാധ്യതയുണ്ടെന്ന് മുന്നറിയിപ്പു നല്‍കി. മാങ്ഖുട്ടിനെ തുടര്‍ന്നുണ്ടായ മണ്ണിടിച്ചിലിലും വെള്ളപ്പൊക്കത്തിലും ഫിലിപ്പീന്‍സില്‍ 64 പേരുടെ ജീവന്‍ പൊലിഞ്ഞു. നിരവധി വീടുകളും തകര്‍ന്നു. നിരവധി പേരെ കാണാതായിട്ടുണ്ട്. ഹോങ്കോങ്ങിലും ദക്ഷിണ ചൈനയിലും റെഡ്അലര്‍ട്ട് പ്രഖ്യാപിച്ചു.

മണിക്കൂറില്‍ 200 മൈലില്‍ കൂടുതല്‍ ദൂരം സഞ്ചരിക്കുന്ന ചുഴലിക്കാറ്റിനു സാധ്യതയുണ്ടെന്ന് ശാസ്ത്രലോകത്തിന്റെ മുന്നറിയിപ്പ്. പ്രഹരശേഷി കണക്കിലെടുത്ത് കാറ്റഗറി ആറിലാണ് ഈ ചുഴലിക്കാറ്റിനെ ഉള്‍പ്പെടുത്തിയിരിക്കുന്നത്. കടന്നുപോകുന്ന മേഖലകളെ ഒന്നടങ്കം തൂത്തെറിയാന്‍ ശക്തിയുള്ളതാകും ഈ ചുഴലി. കാറ്റഗറി അഞ്ചിലുള്ള ചുഴലിക്കാറ്റിന് യു.എസിലെ ന്യൂ ഒര്‍ലിയന്‍സ്, ന്യൂയോര്‍ക് നഗരങ്ങളെ ഒന്നടങ്കം നശിപ്പിക്കാന്‍ ശക്തിയുണ്ടെന്നോര്‍ക്കണം.

അതിനു മുകളില്‍ പ്രഹരശേഷിയുള്ള ചുഴലിക്കാറ്റിനെ കുറിച്ച് ശാസ്ത്രലോകം ഓര്‍ത്തിട്ടുപോലുമുണ്ടായിരുന്നില്ല. ശക്തമായ കാറ്റും പേമാരിയും സൃഷ്ടിച്ച് ഒരു ന്യൂനമര്‍ദ കേന്ദ്രത്തിനു ചുറ്റും ചുഴറ്റിനില്‍ക്കുന്ന കൊടുങ്കാറ്റുകളുടെ ഒരു കൂട്ടമാണ് ചുഴലിക്കാറ്റ്. കടല്‍ ചൂടാവുന്നതും ഭൗമാന്തരീക്ഷത്തിലെ ജലനിരപ്പ് ഉയരുന്നതുമാണ് ഇത്തരം ചുഴലിക്കാറ്റുകളുടെ ആവിര്‍ഭാവത്തിന് കാരണം. വിശാലമായ സമുദ്രങ്ങളിലാണ് ഇത് രൂപംകൊള്ളുന്നത്. 1780ല്‍ വീശിയടിച്ച ചുഴലിക്കാറ്റാണ് ഏറ്റവും വലിയത്.