യുഎഇയില്‍ അതിശക്തമായ ചൂട് വര്‍ദ്ധിക്കുന്ന സാഹചര്യത്തില്‍ തൊഴില്‍ നിയമങ്ങളില്‍ വരുത്തിയ മാറ്റങ്ങള്‍ക്കായി കമ്പനികള്‍ നടത്തിയ മുന്നൊരുക്കങ്ങള്‍ പരിശോധിച്ച് ഉദ്യോഗസ്ഥര്‍. മാനവ വിഭവശേഷി, സ്വദേശിവല്‍ക്കരണ മന്ത്രാലയത്തിലെ ഉദ്യോഗസ്ഥരാണ് വിവിധ നിര്‍മ്മാണ സ്ഥലങ്ങളില്‍ പരിശോധന നടത്തിയത്. ജൂണ്‍ 15 ഞായറാഴ്ച മുതല്‍ യുഎഇയില്‍ തൊഴിലാളികള്‍ നേരിട്ട് സൂര്യപ്രകാശം ഏല്‍ക്കുന്ന രീതിയില്‍ഉച്ചയ്ക്ക് 12.30 നും 3 നും ഇടയില്‍ ജോലി ചെയ്യുന്നത് സര്‍ക്കാര്‍ നിരോധിച്ചിരുന്നു .

രാജ്യത്ത് ഏറ്റവും ഉയര്‍ന്ന വേനല്‍ച്ചൂട് അനുഭവപ്പെടുന്ന സമയമാണിത്. അത് കൊണ്ടാണ് തൊഴിലാളികളുടെ സുരക്ഷ മുന്‍ നിര്‍ത്തി സര്‍ക്കാര്‍ തൊഴില്‍ സമയം പുനഃക്രമീകരിച്ചിരിക്കുന്നത്. മാനവ വിഭവശേഷി വകുപ്പ് ദുബായിലെ നിര്‍മ്മാണ സ്ഥലങ്ങളില്‍ ഇന്ന് പരിശോധന നടത്തി.

സൂര്യാഘാതത്തില്‍ നിന്ന് തൊഴിലാളികളെ സംരക്ഷിക്കുന്നതിന് വേണ്ടി ജോലിസ്ഥലങ്ങളില്‍ തണലുള്ള സ്ഥലങ്ങള്‍, നിര്‍ജ്ജലീകരണം തടയാനായി ആവശ്യമായ വെള്ളം, പ്രഥമശുശ്രൂഷ ഉപകരണങ്ങള്‍, എന്നിവ കമ്പനികള്‍ ഒരുക്കണമെന്ന് മന്ത്രി പറഞ്ഞു.ജലവിതരണത്തിലോ, വൈദ്യുതി വിതരണത്തിലോ ഉണ്ടാകുന്ന തടസ്സങ്ങള്‍, ഗതാഗതക്കുരുക്ക് എന്നിവ പോലുള്ള ഉടന്‍ പരിഹരിക്കേണ്ട ഇത്തരം സംഭവങ്ങളില്‍ ജോലി ചെയ്യുന്ന തൊഴിലാളികളെ നിയന്ത്രണത്തില്‍ നിന്ന് ഒഴിവാക്കി.

നിയമലംഘനം കണ്ടെത്തിയാല്‍ ഒരു തൊഴിലാളിക്ക് 5,000 ദിര്‍ഹം പിഴയും , ഒന്നിലധികം തൊഴിലാളികള്‍ ഉള്‍പ്പെട്ടാല്‍ പരമാവധി 50,000 ദിര്‍ഹം വരെ പിഴയും കമ്പനികള്‍ക്ക് ചുമത്തുന്നതാണ്.