ചികിത്സ വൈകിയാല് വെടിവച്ചുകൊല്ലുമെന്ന് ഭീഷണിപ്പെടുത്തി: തോക്കുമായി ആശുപത്രിയില് എത്തിയ യുവാവ് പിടിയില്
പത്തനംതിട്ട കുന്നന്താനം കമ്യൂണിറ്റി ഹെല്ത്ത് സെന്ററില് ചികിത്സ വൈകിയാല് വെടിവച്ചുകൊല്ലുമെന്ന് യുവാവിന്റെ ഭീഷണി. കുന്നന്താനം സ്വദേശി ലിനു തോമസ് (38) ആണ് എയര്ഗണ്ണുമായി എത്തി ആശുപത്രി ജീവനക്കാര്ക്കും രോഗികള്ക്കും നേരെ തോക്കുചൂണ്ടി ഭീകരാന്തരീക്ഷം സൃഷ്ടിച്ചത്. കുന്നന്താനം സിഎച്ച്സിയില് രാവിലെയാണ് സംഭവം നടന്നത്.
ലാബില് എത്തിയ കുന്നന്താനം സ്വദേശി ലിനു (38) തോക്ക് എടുത്ത് മേശമേല് വച്ചു. ശേഷം ജീവനക്കാര്ക്ക് നേരെ തോക്ക് ചൂണ്ടി. നേഴ്സുമാരുടെ മുറിയിലേക്ക് കടന്നുചെന്ന ഇയാള് ജീവനക്കാര്ക്ക് നേരെ തോക്കുചൂണ്ടി. തോക്ക് അവിടെ ഇരിക്കട്ടെ എന്ന് പറയുകയും ചെയ്തു.
മെഡിക്കല് പ്രാക്റ്റീസിനായി എത്തിയ വിദ്യാര്ഥികളും മറ്റ് ജീവനക്കാരും രോഗികളും തോക്ക് കണ്ട് പരിഭ്രാന്തരായി പ്രാണരക്ഷാര്ഥം പുറത്തേക്ക് ഓടി. ഇതോടെ ആശുപത്രി പരിസരത്ത് വലിയ തോതിലുള്ള പരിഭ്രാന്തിയാണുണ്ടായത്. മെഡിക്കല് ഓഫീസര് എത്തിയതോടെ ലിനു വാഹനത്തില് കയറി സ്ഥലം വിട്ടു. ആശുപത്രി അധികൃതര് അറിയിച്ചതിനെത്തുടര്ന്ന് കീഴ്വായ്പ്പൂര് പൊലീസ് നടത്തിയ അന്വേഷണത്തില് ഉച്ചയോടെ പ്രതി പിടിയിലായി.
ഇയാളുടെ കൈയില്നിന്നും എയര്ഗണ്ണും സ്റ്റെതസ്കോപ്പും കണ്ടെടുത്തു. താന് ഡോക്ടറാണെന്നും സിഎച്ച്സിയില് വരാമെന്നും പൊലീസ് പിടിയിലായപ്പോള് ഇയാള് അവകാശപ്പെട്ടു. പരസ്പര വിരുദ്ധമായ കാര്യങ്ങളാണ് ഇയാള് സംസാരിച്ചത്. പരിശോധനയില് ഇയാള് ഉപയോഗിച്ചത് എയര്ഗണ്ണാണെന്ന് വ്യക്തമായി. എയര്ഗണ്ണാണെങ്കില് പോലും ആയുധവുമായി സര്ക്കാര് ആശുപത്രിയില് എത്തുകയും ജീവനക്കാരെ ഭീഷണിപ്പെടുത്തുകയും ചെയ്ത സാഹചര്യത്തില് ആംസ് ആക്ട് പ്രകാരം ഇയാള്ക്കെതിരെ കേസെടുക്കുമെന്ന് പൊലീസ് അറിയിച്ചു.
https://www.facebook.com/Malayalivartha
